ސްރީ ލަންކާގެ ފޯވާޑް މުހައްމަދު އާކިބްގެ ގޯލުން 1-1 އިން އެއްވަރުކޮށް، އުރީދޫ ދިވެހި ޕްރިމިއާ ލީގުގެ ފުރަތަމަ މެޗުގައި ދަ ގްރާންޑޭ ސްޕޯޓްސް ކުލަބުން ގްރީން ސްޓްރީޓްސް އަތުން ޕޮއިންޓެއް ހޯދައިފި އެވެ.
ޕްރިމިއާ ލީގުގެ ފުރަތަމަ މެޗަށް ދެ ޓީމުން ނުކުތީ މިދިޔަ މަހު ނިމުނު ޕްރެޒިޑެންޓްސް ކަޕާއި އަޅާ ބަލާއިރު ބަދަލުތަކާ އެކުގަ އެވެ. އެ ގޮތުން ދަ ގްރާންޑޭ އިން ވަނީ ލީގަށް ލަންކާގެ ގައުމީ ޓީމްގެ ދެ ކުޅުންތެރިން ކަމަށްވާ މުހައްމަދު އާކިބާއި ޗަމޯދް ދިލްޝަން ގެނެސްފަ އެވެ. ގްރީނުން މި މެޗަށް ނުކުތްއިރު ސްޕެއިނުގެ މިޑްފީލްޑަރު އެންހެލް ކަރަސްކޯސާ މުނޯޒް ހުރީ އަނިޔާގަ އެވެ. އެޓީމުން ވަނީ ބިދޭސީ ދެ ފޯވާޑުން ކަމަށްވާ ކުރިން އެ ޓީމަށް ކުޅުނު އެލެކްސަންޑާ އަވީލާގެ އިތުރުން ޖޯޑީ ބާޓް ލީގަށް ގެނެސްފަ އެވެ.
މެޗު ފަށައިގެން ގްރީނުން ދިޔައީ ދަ ގްރާންޑޭގެ ގޯލަށް ނުރައްކާ ކުރަމުންނެވެ. އެޓީމުން ފުރަތަމަ ހަމަލާ އުފެއްދީ މެޗުގެ ފަސް ވަނަ މިނިޓްގަ އެވެ. ބިދޭސީ ފޯވާޑް ޖޯޑީ ބާޓް ނަގައިދިން ހުރަހުން އަލީ ޝާމިއު (ތޮއްޕޭ) ބޮލުން ފޮނުވާލި ބޯޅަ ދިޔައީ ބޭރަށެވެ.
ގްރީނުން ފުރަތަމަ ގޯލް ޖެހީ އެ ޓީމަށް ލިބުނު ޕެނަލްޓީ އަކުންނެވެ. ހަތް ވަނަ މިނިޓްގައި ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) އަށް އޭރިއާ ތެރެއިން ދަ ގްރާންޑޭ އަށް ކުޅޭ އާކިބް ފައުލް ކުރުމުން ރެފްރީ ވަނީ ޕެނަލްޓީ އެއް ދީފަ އެވެ. ގްރީން ސްޓްރީޓްސް މި ޕެނަލްޓީ ކާމިޔާބުކޮށްދިނީ ކެޕްޓަން ރިލްވާން ވަހީދު (ރިލޭ) އެވެ. ރިލޭ ފޮނުވާލި ބޯޅަ ވަނީ ގޯލްގެ އަރިމަތީ ކަނަށެވެ.
އޭގެ ފަހުން ޗޯޓަށް އޭރިއާ ބޭރުން ލިބުނު ބޯޅަ ހިފައިން އެރިއާ ތެރެއަށް ވަދެ ދެ ކުޅުންތެރިން ކައިރިން ނައްޓާފައި ޗޯޓު ފޮނުވާލުމުން ދިޔައީ އަރިމަތިން ބޭރަށެވެ. އޭގެ ދެ މިނެޓު ފަހުން ފޯވާޑް އަވީލާ ފޮނުވާލި ބޯޅަ ލިބުނީ އުނދަގޫކަމެއް ނެތިއެވެ.
މެޗުގައި ދަ ގްރާންޑޭ އިން ފުރަތަމަ ހަމަލާއެއް އުފެއްދީ 29 ވަނަ މިނިޓްގަ އެވެ. އާކިބް އަރިމަތިން ބޯޅަ ހިފައިންގެ ގޮސް ގްރީންގެ ދެ ޑިފެންޑަރުން ކައިރިން ނައްޓާފައި އޭރިއާ ތެރެއަށް ވަދެ ނަގައިދިން ހުރަސް ލިބުނީ އިސްމާއިލް ނަޒީހު އަށެވެ. ނަޒީހު އެއް ފަހަރުން ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ.
އޭގެ މިނެޓެއް ފަހުން ގްރީންގެ ޗޯޓުއަށް ގޯލެއް ޖަހަން ފުރުސަތެއް ލިބުނެވެ. ކައުންޓަ އެޓޭކެއްގައި ޗޯޓު ބޯޅަ ހިފައިން ގޮސް އޭރިއާ ތެރެއަށް ވަދެ ފޮނުވާލުމުގެ ކުރިން ގާސިމް ސަމާމް އެ ބޯޅަ ދިފާއުކުރި އެވެ. އޭގެ ފަހުން ބޯޅަ ލިބުނީ އަވީލާ އަށެވެ. ކީޕަރު ކުރިއަށް ނުކުމެ ހުރުމާ އެކު އަވީލާ މަސައްކަތް ކުރީ ގޯލްގެ މަތީ ކަނަށް ބޯޅަ ފޮނުވާލާށެވެ. ނަމަވެސް އެ ބޯޅަ ދިޔައީ ހުރަސް ދަނޑިމަތިން ބޭރަށެވެ.
ދް ގްރާންޑޭ އިން ވަނީ ކުޅުން ރަނގަޅުކޮށް ފުރަތަމަ ހާފުގެ ފަހު 15 މިނިޓްގައި ގްރީންގެ ގޯލަށް ނުރައްކާކުރަން ފަށައިފަ އެވެ. އެ ގޮތުން މެޗުގެ 33 ވަނަ މިނިޓްގައި އާކިބް ފޮނުވާލި ބޯޅަ ގްރީން ސްޓްރީޓްސްގެ ކީޕަރު ޕާކިސްތާންގެ ހަނީފް ސާގިބް ދިފާއުކުރިއިރު، އޭގެ ތިން މިނެޓު ފަހުން އިސްމާއިލް މަފާޒް ފޮނުވާލި ބޯޅަ ދިޔައީ ގޯލާ އަމާޒުނުވެ ބޭރަށެވެ.
ދަ ގްރާންޑޭ އިން ނަތީޖާ ހަމަހަމަކުރީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. އަރިމަތިން ލަންކާގެ ޗަމޯދް ނަގައިދިން ހުރަސް އާކިބް ބޮލުން ފޮނުވާލުމުން އަމާޒުވީ ގޯލްގެ ކަނަށެވެ. ކީޕަރު ސާގިބަށް ބޯޅަ ދިފާއުކުރަން މާ ބޮޑު ކަމެއް ނުކުރެވުނެވެ.
ދެ ވަނަ ހާފުގެ ފެށުން ވެސް ދަ ގްރާންޑޭ އަށް ދިޔައީ ރަނގަޅަށެވެ. މި ހާފު ފަށައިގެން ފަސް ވަނަ މިނިޓްގައި މަފާޒަށް ލިބުނު ބޯޅަ އޭނާ ތިރިތިރިން ގޯލްގެ ކަނަށް ފޮނުވާލުމުން ކީޕަރު ސާގިބް ވަނީ އެ ބޯޅަ ދިފާއުކޮށްފަ އެވެ.
ޖުމްލަކޮށް ބަލާއިރު ދެ ވަނަ ހާފުގައި ދެ ޓީމުގެ ފަރާތުން ވެސް ފެނުނީ ދަށް ކުޅުމެކެވެ. މާ ރަނގަޅު ހަމަލާތަކެއް ދެ ޓީމަށް ވެސް އުފެއްދިފައެއް ނުވެ އެވެ. އަދި ފަހުކޮޅަށް ދިޔައިރު ދެ ޓީމުންގެ ކުޅުންތެރިންގެ ފަރާތުން ވެސް ވަރުބަލިކަން ފާހަގަ ކުރެވުނެވެ.
މެޗުގެ މޮޅު ކުޅުންތެރިޔާގެ މަގާމް ލިބުނީ ގްރީން ސްޓްރީޓްސްގެ މިޑްފިލްޑް ލައިނުގައި ރަނގަޅު ކުޅުމެއް ދެއްކި ކެޕްޓަން ރިލޭ އަށެވެ. ރިލޭވަނީ ދަ ގްރާންޑޭގެ ބޯޅަތައް ހުއްޓުވުމުގައި މުހިންމު ދައުރެއް އަދާކުރުމުގެ އިތުރުން ގްރީނުން އުފެއްދި ހަމަލާތަކުގައި މުހިންމު ދައުރެއް އަދާކޮށްފައެވެ.
އުރީދޫ ދިވެހި ޕްރިމިއާ ލީގުގައި މިރޭ ކުޅޭ މެޗުގައި ވާދަކުރާނީ ޕްރެޒިޑެންޓްސް ކަޕްގެ ޗެމްޕިއަން ކްލަބް ވެލެންސިއާ އާއި ޔުނައިޓެޑް ވިކްޓްރީ (ޔޫވީ) އެވެ.
