ދިވެހި ޕްރިމިއާ ލީގު 2022ގެ މައި ސްޕޮންސަރަކަށް އުރީދޫ މޯލްޑިވްސް ހަމަޖައްސައިފި އެވެ.
އެންމެ ފަހުން އުރީދޫ މޯލްޑިވްސް, އިން ރާއްޖޭގެ އެންމެ ބޮޑު ލީގު، ދިވެހި ޕްރިމިއާ ލީގުގެ މައި ސްޕޮންސަރުގެ ގޮތުގައި ހަރަކާތްތެރިވީ 2017 ވަނަ އަހަރުގަ އެވެ.
ދިވެހި ލީގުގެ ނަން ދިވެހި ޕްރިމިއާ ލީގަށް ރީބްރޭންޑްކޮށްފައިވަނީ 2015 ވަނަ އަހަރުގަ އެވެ. އުރީދޫ އަކީ ޕްރިމިއާ ލީގުގެ ފުރަތަމަ ސްޕޮންސަރެވެ. ފުރަތަމަ އަހަރުގެ ފަހުން 2017 ވަނަ އަހަރާ ހަމައަށް ލީގުގެ މައި ސްޕޮންސަރަކީ އުރީދޫ އެވެ.
އޭގެ ފަހުން މިދިޔަ ތިން ސީޒަނުގައި ލީގުގެ ސްޕޮންސަރުކަން ކުރީ ދިރާގުންނެވެ.
މި އަހަރު ދިވެހި ޕްރިމިއާ ލީގު ފަށާނީ މިއަދު ހަވީރެވެ. ފުރަތަމަ މެޗުގައި ވާދަކުރާނީ ކުލަބު ގްރީން ސްޓްރީޓްސްއާއި ދަ ގްރާންޑޭއެވެ.
ދިވެހި ޕްރިމިއާ ލީގު 2022ގެ މައި ސްޕޮންސަރު އުރީދޫ ހަމަޖެއްސުމަށް ވަނީ ހާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ގައުމީ ޓީމްގެ ޖާޒީއެއް އުރީދޫ މޯލްޑިވްސްގެ ސީއީއޯ ހާލިދު ހަސަން އަލް ހަމަދީ އަށް ވަނީ އަރުވައިފަ އެވެ. މި ޖާޒީ ހަވާލުކޮށްދެއްވީ އެފްއޭއެމްގެ ރައީސް ބައްސާމް އަދީލް ޖަލީލެވެ.
އުރީދޫ މޯލްޑިވްސްއަކީ މިދިޔަ އަހަރު ނިމުނު ސާފް ޗެމްޕިއަންޝިޕް 2021ގެ ވެސް މައި ސްޕޮންސަރެވެ. ރާއްޖޭގެ ފުޓްބޯޅައިގެ ކުރިއެރުމަށް އުރީދޫން އަންނަނީ މީގެ ކުރިންވެސް ގިނަ ހިދުމަތްތަކެއް ކުރަމުންނެވ
އެ ގޮތުން މުބާރާތްތައް ސްޕޮންސަަރު ކުރުމުގެ އިތުރުން ފުރަތަމަ ޑިވިޝަންގެ ބައެއް ކުލަބުތަކާ އެކު ވެސް އުރީދޫ އިން ވަނީ އެމްބަސަޑަރުންގެ އެއްބަސްވުންތަކެއްގައި މަސައްކަތްކޮށްފަ އެވެ.
އުރީދޫ އިން ސްޕޮންސަރެއްގެ ގޮތުގައި މީގެ ކުރިން ނިއު ރޭޑިއަންޓް ސްޕޯޓްސް ކްލަބާ އެކު ފެނުނެވެ. މިހާރު އެމްބަސަޑަރެއްގެ ރޯލު ދީގެން މާޒިޔާ އަށް އުރީދޫ އިން ވަނީ ސްޕޮންސަރުކަން ދީފަ އެވެ.
ރާއްޖޭގެ އެންމެ ފުޅާދާއިރާއެއްގައި މުވާސަލާތީ ހިދުމަތް ދެމުން އަންނަ އުރީދޫ އިން އަންނަނީ ކުޅިވަރުގެ އެކި ލެވަލްގެ މުބާރާތްތަކުގައި ޕާޓްނަރުންގެ ގޮތުގައި މަސައްކަތްކުރަމުންނެވެ. އެ ގޮތުން ފުޓްސަލް މުބާރާތްތަކާއި އެހެނިހެން ގައުމީ ލެވަލްގެ މުބާރާތްތައް ހިމެނެ އެވެ.
