ގައުމީ ބާސްކެޓްބޯޅަ ލީގުގެ ފުރަތަމަ ޑިވިޝަންގެ ފިރިހެން ބައިގައި އިއްޔެ ރެޕްޓާސް ބާސްކެޓްބޯޅަ ކުލަބް އަތުން ރެޑްވިންގްސް ބާސްކެޓްބޯޅަ ކްލަބް މޮޅުވިއިރު، ބައުސް ސްޕޯޓްސް ކްލަބާ ކުޅެގެން ޓީރެކްސް ބާސްކެޓްބޯޅަ ކްލަބް މޮޅުވެއްޖެ އެވެ.
ގައުމީ ބާސްކެޓްބޯޅަ ލީގުގެ ފުރަތަމަ ޑިވިޝަންގައި މިފަހަރު ހަ ޓީމް ވާދަކުރެ އެވެ. އެއީ ރެޕްޓާސް، ރެޑްވިންގްސް، ޓީރެކްސް، ބައުސްގެ އިތުރުން އެންމެ ފަހުގެ ޗެމްޕިއަން ކިންގްސް ބާސްކެޓްބޯލް ކްލަބް އާއި ސްޓިންގާސް ބާސްކެޓްބޯލް ކްލަބް އެވެ.
ފުރަތަމަ ޑިވިޝަންގެ ފިރިހެން ބައިގެ ފުރަތަމަ މެޗުގައި ވާދަކުރީ ޓީރެކްސް އާއި ބައުސް އެވެ. މި މެޗު ޓީރެކްސްއިން ކާމިޔާބުކުރީ 80-71 އިންނެވެ. މެޗު ފަށައިގެން ފުރަތަމަ ކުއާޓާ ޓީރެކްސްއިން ނިންމާލީ ލީޑްގައި އޮވެ އެވެ. ފުރަތަމަ ކުއާޓާގައި އެޓީމުން ހަ ޕޮއިންޓްގެ ލީޑެއް ނެގިއިރު، ދެ ވަނަ ކުއާޓާގައި ލީޑް 12 ޕޮއިންޓަސް ފުޅާކުރި އެވެ. ބައުސް އިން ވަނީ ނިސްބަތުން ރަނގަޅު ކުޅުމެއް ފަހު ދެ ކުއާޓާގައި ދައްކައިފަ އެވެ. ތިން ވަނަ ކުއާޓާ ނިމުނުއިރު ޓީރެކްސްގެ ލީޑް އޮތީ 13 ޕޮއިންޓަށް ފުޅާވެފަ އެވެ. ނަމަވެސް ފަހު ކުއާޓާގައި ރަނގަޅު ކުޅުމެއް ދައްކައި ލީޑް ނުވަ ޕޮއިންޓަށް ކުޑަކުރިއެވެ.
މެޗުގައި ޓީޜެކްސް އަށް އެންމެ ރަނގަޅު ކުޅުމެއް ދައްކައިދިނީ މެޗުގެ މޮޅު ކުޅުންތެރިޔާގެ މަގާމު ހޯދީ ސާބިއާ ކުޅުންތެރިޔާ ފްލިޕް ވުކޮސަލްޔެވިޗް އެވެ. ބައުސް އަށް އެންމެ ރަނގަޅު ކުޅުމެއް ދައްކައިދިނީ މުހައްމަދު ސަމޫހު އެވެ.
ފުރަތަމަ ޑިވިޝަންގެ ދެވަނަ މެޗުގައި ރެޕްޓާސް އަތުން ރެޑްވިންގްސް މޮޅުވީ 94-82 އިންނެވެ. މި މެޗުގެ އެންމެ ބޮޑު ތަފާތަކަށްވީ ދެ ޓީމްގެވެސް ބިދޭސީ ކުޅުންތެރިންނެވެ. ފުރަތަމަ ކުއާޓާ ނިމުނުއިރުު ބިދޭސީ ކުޅުންތެރިޔާ ތޯމަސް މަލިކްގެ މޮޅު ކުޅުމުން ރެޑްވިންގްސް ލީޑް ނެގިއިރު، ދެވަނަ ކުއާޓާގައި ރެޕްޓާސް ފެނުނީ ތަންކޮޅެއް ދަށްކޮށެވެ.
މި ކުއާޓާ ނިމުނުއިރު ރެޑްވިންގްސް އޮތީ 63-42 ޕޮއިންޓުން ކުރީގަ އެވެ. ތިން ވަނަ ކުއާޓާގައި ނިކުމެ ރެޕްޓާސް އިން 21 ޕޮއިންޓްގެ ލީޑް އަށް ޕޮއިންޓަށް ހަނިކުރި އެވެ. ނަމަވެސް ފަހު ކުއާޓާގައި ރެޑްވިންގްސް އިން ކުޅުން ރަނގަޅުކޮށް 12 ޕޮއިންޓްގެ ތަފާތަކާ އެކު މެޗު ކާމިޔާބުކުރި އެވެ.
ގައުމީ ބާސްކެޓްބޯޅަ ލީގުގައި ރެޕްޓާސް ބީސީ އާއި ރެޑްވިންގްސް ބީސީ ވާދަކުރި މެޗުގެ ތެރެއިން: ފޮޓޯ/ އެމްބީއޭ
މެޗުގައި ރެޑްވިންގްސް އަށް އެންމެ ރަނގަޅު ކުޅުމެއް ދައްކައިދިނީ މަލިކް އެވެ. ރެޕްޓާސް އަށް އެންމެ ރަނގަޅު ކުޅުމެއް ދައްކައިދިނީ މެޗުގެ މޮޅު ކުޅުންތެރިޔާގެ މަގާމް ހޯދި ކޯބީ އެވެ.
މުބާރާތުގެ ފުރަތަމަ ޑިވިޝަންގެ އަންހެން ބައިގެ ކުޅުންވެސްވަނީ އިއްޔެ ފަށައިފަ އެެވެ. ފުރަތަމަ މެޗުގައި ކުއީންސް ބީސީން ވަނީ ލަޔަނެސް ސްޕޯޓްސް އަތުން 113-28 ޕޮއިންޓުން މޮޅުވެފަ އެވެ. މެޗުގެ ކޮންމެ ކުއާޓާއެއްގައި ވެސް ސީނިއާ ގައުމީ ޓީމްގެ ގިނަ ކުޅުންތެރިންތަކެއް ހިމެނޭ ކުއީންސް އިން މަދުވެގެން 25 ޕޮއިންޓް ސްކޯ ކުރި އެވެ. ޒުވާން ގިނަ ކުޅުންތެރިން ހިމެނޭ ލަޔަނެސް އަށް އެންމެ ގިނަ ޕޮއިންޓް ހޯދުނީ ތިން ވަނަ ކުއާޓާގަ އެވެ. އެއީ 11 ޕޮއިންޓެވެ.
މެޗުގައި ކުއީންސް އަށް އެންމެ ރަނގަޅު ކުޅުމެއް ދައްކައިދިނީ މެޗުގެ މޮޅު ކުޅުންތެރިއާގެ މަގާމް ހޯދި ރައިފާ އިބްރާހިމް އެވެ. ލަޔަނެސް އަށް އެންމެ ރަނގަޅު ކުޅުމެއް ދައްކައިދިނީ ރުވެއިޝަމް ރިޔާޒް އެވެ.
މުބާރާތުގައި މިއަދުވެސް ތިން މެޗެއް ކުޅޭނެ އެވެ. މިއަދު ހަވީރު ކުޅޭ ފުރަތަމަ ޑިވިޝަންގެ ފިރިހެން ބައިގެ މެޗުގައި ވާދަކުރާނީ ކިންގްސް ބާސްކެޓްބޯލް ކްލަބާއި ސްޓިންގާސް ބާސްކެޓްބޯލް ކްލަބް އެވެ.
މިރޭ ކުޅޭނީ ދެވަނަ ޑިވިޝަންގެ ދެ މެޗެވެ. ފުރަތަމަ މެޗުގައި ގްރޫޕް ބީގެ ސްޕާޓަންސް ނިކުންނާނީ ޔޫއެން ފްރެންޑްސް އާއި ދެކޮޅަށެވެ. ދެވަނަ މެޗުގައި ރޯޔަލްސް ބީސީ ނިކުންނާނީ ވުލްވްސް ބީސީ އާއި ދެކޮޅަށެވެ.
