ރޯމް (ފެބްރުއަރީ 14) - މެޗުގެ އިތުރު ވަގުތުގައި ޑިފެންޑަރު ޑަނީލޯ ޖެހި ލަނޑާ އެކު، އިޓާލިއަން ސީރިއާގައި ރޭ ޔުވެންޓަސް ކުޅުނު މެޗުގައި އެޓަލަންޓާއާ އެއްވަރުވެއްޖެ އެވެ.
އެޓަލާންޓާގެ ދަނޑުގައި ކުޅުނު މެޗުގެ 76 ވަނަ މިނިޓުގައި އެ ޓީމުގެ ޔޫކްރޭން މިޑްފީލްޑަރު ރުސްލާން މަލިނޮވްސްކީ ޖެހި ލަނޑާއެކު އެޓަލާންޓާ އިން ލީޑު ނެގި އެވެ. ހާފުގެ މެދެއްހާ ހިސާބުން މަލިނޮވްސްކީ މި ގޯލު ޖެހި ހިލޭ ޖެހުމަކުންނެވެ. އޭނާ ފޮނުވާލި ބާރު ބޯޅަ ޔުވެންޓަސްގެ ކީޕަރު ވޮޒްޝިއޭ ޝެޒްނީ އަތްމަތިން ގޮސް އަމާޒުވީ ގޯލުގެ މަތީ ކަނަށެެވެ. އޭގެ ފަހުން މަލިނޮވްސްކީ ދިން ބޯޅައަކުން ހަންޒް ހަޓެބޯ ހުސްކޮށްއަރައި ޖެހި ބޯޅަ ބޭރުވީ ގޯލުގެ ހުރަސްދަނޑީގައި ޖެހިފަ އެވެ.
މެޗުގެ ފުރިހަމަ ވަގުތު ހަމަވިއިރު ވެސް، ބެލެވިފައި އޮތީ ޔުވެންޓަސް ފަހަތަށް ޖައްސާލައި، އެޓަލާންޓާ ގަދަ ހަތަރަކަށް އަރާނެ ކަމަށެވެ. އެކަމަކު މެޗުގެ އިތުރު ވަގުތުގައި ޕައޮލޯ ޑިބާލާ ނެގި ކޯނަރަކުން، ޑަނީލޯ ވަނީ ލަނޑު ޖަހައި، ޔުވެންޓަސް އަށް މުހިންމު ޕޮއިންޓެއް ހޯދައިދީފަ އެވެ.
ޔުވެންޓަސް ތާވަލްގެ ހަތަރު ވަނައިގައި އޮތީ 46 ޕޮއިންޓާ އެކު އެވެ. އެޓަލާންޓާ ފަސް ވަނައިގައި އޮތީ 44 ޕޮއިންޓް ހޯދައިގެންނެވެ. އެކަމަކު، ޔުވެންޓަސް ވަނީ އިތުރަށް އެއް މެޗު ކުޅެފަ އެވެ.
އިޓާލިއަން ސީރިއާގައި ރޭ ރޯމާ އާއި ސަސުއޯލޯ ބައްދަލުކުރި މެޗު ނިމުނީ 2-2 އިން ދެ ޓީމު އެއްވަރުވެގެނެވެ. ސަސުއޯލޯގެ ދަނޑުގައި ކުޅުނު މެޗުގެ ފުރަތަމަ ހާފު ނިމެނިކޮށް ރޯމާ އަށް ލިބުނު ޕެނަލްޓީއަކުން އެ ޓީމަށް ލީޑު ހޯދައިދިނީ ޓެމީ އަބްރަހަމް އެވެ. މިއީ މި ފަހަރު ލީގުގައި އަބްރަހަމް ޖެހި 11 ވަނަ ގޯލެވެ.
ދެ ވަނަ ހާފުގެ ކުރީކޮޅު، ރޯމާގެ ޑިފެންޑަރު ކްރިސް ސްމޯލިން އަތުން ބައިކޮޅަށް ވަތް ލަނޑާ އެކު މެޗުގެ ނަތީޖާ ހަމަހަމަވި އެވެ. ސަސުއޯލޯ އިން ލީޑު ނެގީ 76 ވަނަ މިނިޓުގައި ހަމަދް ޓްރައޯރޭ ޖެހި ލަނޑުންނެވެ. ރޯމާ މެޗުން ޕޮއިންޓެއް ހޯދީ މެޗުގެ އިތުރު ވަގުތުގައި ބްރަޔަން ކްރިސްޓަންޓޭ ޖެހި ލަނޑުންނެވެ.
ހޯސޭ މޮރީނިއޯ ކޯޗުކޮށްދޭ ރޯމާ ތާވަލްގެ ހަތް ވަނައިގައި މިހާރު އޮތީ 40 ޕޮއިންޓާއެކު އެވެ. ރޭ އޭސީ މިލާނުން ވަނީ 1-0 އިން ސަމްޑޯރިއާ ބަލިކޮށް ލީގުގެ އެއް ވަނަ އަށް ޖެހިލައިފަ އެވެ. -- އޭއެފްޕީ
