މިލާން (ފެބްރުއަރީ 13) - އިޓާލިއަން ލީގުގައި މިއަދު ސަމްޑޯރިއާ 1-0 އިން ބަލިކޮށް އޭސީ މިލާނުން ލީގުގެ އެއް ވަނަ އަށް ޖެހިލައިފި އެވެ.
ލީގުގެ އެއް ވަނައިގައި ކުރިން އޮތް އިންޓަ މިލާން ރޭ ކުޅުނު މެޗުން ވަނީ ނަޕޯލީއާ 1-1 އިން އެއްވަރުވެފަ އެވެ. އެ ނަތީޖާގެ ފައިދާނަގައި މިލާނުން އެއް ވަނަ އަށް އެރީ 25 މެޗުން 55 ޕޮއިންޓް ހޯދައިގެންނެވެ. ދެ ވަނައިގައި އެންމެ ފަހުގެ ޗެމްޕިއަން އިންޓަ އޮތީ 24 މެޗުން 54 ޕޮއިންޓާ އެކު އެވެ. ނަޕޯލީ ތިން ވަނައިގައި އޮތީ 25 މެޗުން 53 ޕޮއިންޓް ހޯދައިގެންނެވެ.
މި މެޗުގައި ފެނިގެންދިޔަ ހަމައެކަނި ގޯލު މިލާނުން ޖެހީ އަށް ވަނަ މިނިޓްގަ އެވެ. މިލާންގެ ކީޕަރު މައިކް މައިންގްނޯން ޖެހި ބޯޅައެއް ކޮންޓްރޯލް ކޮށްލުމަށް ފަހު އޭރިއާތެރެއަށް ހިފައިގެންވަދެ މި ގޯލު ޖެހީ ރަފައެލް ލެއާއޯ އެވެ. ލެއާއޯ ބޯޅަ ހިފައިގެން އޭރިއާތެރެއަށް ވަނީ އޭނާ އަތުން ބޯޅަ ހޯދަން އައި ސަމްޑޯރިއާގެ ޑިފެންޑަރު ބާޓޯޒް ބެރެޒިންސްކީ ކައިރިން ނައްޓާފައި ގޮހެވެ.
ދެ ވަނަ ހާފްގައި މިލާނުން ލީޑުފުޅާކުރެވޭތޯ ގިނަ މަސައްކަތްތަކެއް ކުރި އެވެ. މި ވަގުތު ރަނގަޅު ފޯމެއްގައި ހުރި މިލާންގެ ފްރާންސް ފޯވާޑް އޮލިވިއޭ ޖިރޫޑް ޖެހި ދެ ބޯޅަ ސަމްޑޯރިއާގެ ކީޕަރު ވްލަޑިމީރޯ ފަލްކޯނޭ ވަނީ މަތަކޮށްފަ އެވެ. ޖިރޫޑްގެ އިތުރުން ގޯލު ޖަހަން ލިބުނު ފުރުސަތުތައް މިލާނުގެ ސަންޑްރޯ ޓޮނާލީ އާއި ފްރޭންކް ކެސިއޭ އަދި އަންޓޭ ރެބިކް އަށް ބޭނުން ނުހިފުނެވެ.
އިޓާލިއަން ލީގުގައި މިރޭ ޔުވެންޓަސް އިން އެޓަލަންޓާއާ ކުޅޭއިރު، ރޯމާ އިން ބައްދަލުކުރާނީ ސަސުއޯލޯއާ އެވެ.
