އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގެ ފައިނަލުގައި މިއަދު ހަވީރު ކްލަބް އީގަލްސްއާ ދެކޮޅަށް ނިކުންނައިރު އެއްވެސް ޕްރެޝަރެއް ޓީމަށް ނެތް ކަމަށާއި، އެ ޓީމަށް ގެއްލޭނެ އެއްވެސް އެއްޗެއް ނެތް ކަމަށް ސުޕަ ޔުނައިޓެޑް ސްޕޯޓްސް (ސަސް)ގެ ކޯޗު ފަރީދު މުހައްމަދު (ފަރިއްޓެ) ބުނެފިއެވެ.
ޔޫތު ޗެމްޕިއަންޝިޕްގެ ފައިނަލުން ސަސް ޖާގަ ހޯދީ ސެމީ ފައިނަލްގައި ޕެނަލްޓީ ޖަހައިގެން 3-2 އިން ޔުނައިޓެޑް ވިކްޓްރީ ބަލިކޮށްގެންނެވެ. ކުލަބު އީގަލްސް ފައިނަލުން ޖާގަ ހޯދީ ސެމީ ފައިނަލްގައި ޓީސީ ސްޕޯޓްސް ކުލަބު 1-0 އިން ބަލިކޮށްގެންނެވެ. ޔޫތު ޗެމްޕިއަންޝިޕްގެ ފައިނަލުގައި ހަތް ވަނަ ފަހަރަށް އީގަލްސް އިން ކުޅޭއިރު، މިއީ ސަސް އިން މި މުބާރާތުގައި ވެސް ކުޅޭ ފުރަތަމަ ފަަހަރެވެ. މިއީ ސަސްގެ އަލަތު ފައިނަލެވެ.
ފ.ނިލަންދޫގައި ޓާފް ދަނޑުގައި މިއަދު ކުޅޭ ފައިނަލް މެޗުގެ ކުރިން އިއްޔެ ބޭއްވި އެންމެ ފަހުގެ ފަރިތަކުރުންތަކަށް ފަހު ފަރިއްޓެ ބުނީ ސަސް އަށް ފައިނަލާ ހަމައަށް އާދެވުމަކީ ވެސް ބޮޑު ކާމިޔާބެއް ކަމަށެވެ. ފައިނަލަށް ނިކުންނައިރު އެ ޓީމަށް އެއްވެސް ޕްރެޝަރެއް ނެތް ކަމަށް ފަރިއްޓެ ގަބޫލުކުރެ އެވެ .
"އަސްލު މި ޓީމު މިހާ ހިސާބަށް އައުމަކީ ވެސް ބޮޑު ކާމިޔާބީ އެއް. ވަރަށް ބޮޑަށް މި ކުޅުންތެރިން ހިތްވަރު ކޮށްގެން މިހާ ހިސާބަށް މި އައީ. ފައިނަލަށް ނިކުންނައިރު ޓީމަށް ގެއްލޭނެ އެއްޗެއް ނެތް. އެގޮތަށް ކުޅުންތެރިންނަށްވެސް ވިސްނައިދެނީ މި،" ފަރިއްޓެ ބުންޏެވެ.
ސަސްގެ އެންމެ މުހިންމު އެއް ކުޅުންތެރިޔާ ކީޕަރު މީސަމް: ސެމީގައި ޔުނައިޓެޑް ވިކްޓްރީ އަތުން ސަސް މޮޅުވުމުގައި މީސަމް މުހިންމު ރޯލެއް ކުޅެފައިވޭ.-- ފޮޓޯ: މުހައްމަދު ޝާބިން/ އަދަދު
މުބާރާތުގެ ގްރޫޕް ސްޓޭޖުގައި ސަސް އަދި އީގަލްސް ހިމެނުނީ އެއް ގްރޫޕެއްގަ އެވެ. ގްރޫޕްގެ ސްޓޭޖުގެ މެޗުގައި ދެ ޓީމު ވާދަކޮށް ސަސް ބަލިވީ 1-0 އިންނެވެ.
ފަރިއްޓެ ބުނީ ގްރޫޕް ސްޓޭޖުގައި އީގަލްސް އަތުން ބަލިވުމުން ފައިނަލަށް ގޮސްފިނަމަ ވެސް އެ ޓީމާ ކުޅެން ޖެހިދާނެ ކަމަށް ބެލެވުނު ކަމަށެވެ. އީގަލްސް އަކީ ޔޫތު މުބާާރާތްތައް ހަތަރު ފަހަރު ކާމިޔާބުކޮށްފައިވާ ޓީމެއް ކަމަށްވާއިރު، އެ ޓީމުގެ އެ ކާމިޔާބީތަކަށް ފަރިއްޓެ ވަނީ އިހުތިރާމް އަދާކޮށްފަ އެވެ.
ކޯޗިން ކެރިއަރުގެ ކުރީކޮޅު ހެޑް ކޯޗެއްގެ ގޮތުގައި ސަސް ގޮވައިގެން ފައިނަލަށް އާދެވުން ދެކެނީ ކިހިނެއްތޯ ސުވާލުކުރުމުން ފަރިއްޓެ ބުނީ ކޯޗިން ކެރިއަރުގައި ހޯދި އެންމެ ބޮޑު ދެ ކާމިޔާބަކީ ދަ ގްރާންޑޭ ފުރަތަމަ ޑިވިޝަނަށް ކޮލިފައިކޮށްދިނުމުގެ އިތުރުން 19 އަހަރުން ދަށުގެ ޓީމުގެ ކޯޗިން ސްޓާފަކަށް ހުރެ ލޯ މެޑަލް ހޯދުން ކަމަށެވެ. އެ ދެ ކާމިޔާބީއާ ދެން ހަމަކުރުމާ ގާތަށް ދާނެ އެއް ކަމަކީ ސަސްއާ އެކު ޔޫތު މުބާރާތުގެ ފައިނަލަށް އާދެވުން ކަމަށް ފަރިއްޓެ ބުންޏެވެ.
ފަރިއްޓެ ބުނީ ކުޑަ ދުވަސްކޮޅެއްގައި ޒުވާން ޓީމެއް ތައްޔާރުކުރުމަކީ ބޮޑު ޗެލެންޖެއް ކަަމަށެވެ. ސަސް ގޮވައިގެން ކުރި އެ މަސައްކަތަށް އިޝާރާތްކޮށް، ފަރިއްޓެ ބުނީ ބޮޑެތި ޓީމްތައް ފަހަތަށް ޖައްސާލުމަށް ފަހު ސަސް މި ފައިނަލުގައި ކުޅުން އޭނާގެ ކެރިއަރުގައި ހާއްސަވާނެ ކަމަށެވެ.
"އަސްލު މިއީ ވަރަށް ހާއްސަ ފައިނަލެއް. ހުރިހާ ގޮތަކުން ވެސް. ކުޑަ ދުވަސްކޮޅެއްގައި ޓީމެއް ތައްޔާރުކޮށް މި މެނޭޖްމަންޓާ އެކު މިކަން ކުރެވުން މިއީ ވަރަށް ބޮޑު ކާމިޔާބެއްގެ ގޮތުގައި ދެކެނީ." ފަރިއްޓެ ބުންޏެވެ.
ފައިނަލަށް ނުކުންނައިރު، ފަރިއްޓެ ބުނީ ސަސްގެ ތައްޔާރީތަކާއި ފިޓްނަސް ހުރި ލެވަލާ މެދު ހިތްހަމަޖެހޭ ކަމަށާއި ރަނގަޅު މެޗެއް ކުޅެވޭނެ ކަމުގެ އުންމީދު އެބައޮތް ކަމަށެވެ.
ސަސް އާއި އީގަލްސް ކުޅޭ ފައިނަލް މެޗު ފަށާނީ މިއަދު ހަވީރު ހަތަރެއް ޖަހާއިރު އެވެ.
