މެޑްރިޑް (ފެބްރުއަރީ 11) - ރެއާލް މެޑްރިޑްގެ ކެޕްޓަން ކަރިމް ބެންޒެމާ އަށް މި ހަފްތާގައި ޗެމްޕިއަންސް ލީގުގެ ނޮކައުޓް ބުރުގައި ޕީއެސްޖީއާ ދެކޮޅަށް ކުޅޭ މެޗުގައި ނުކުޅެވުމުގެ ބިރު އެބައޮތް ކަމަށް ފްރާންސްގެ ނޫސްތަކުން ރިޕޯޓްކޮށްފި އެވެ.
މިދިޔަ މަހު ސްޕެނިޝް ލީގުގައި އެލްޗޭއާ ދެކޮޅަށް ރެއާލުން ކުޅުނު މެޗުގައި އުމުރުން 34 އަހަރުގެ ބެންޒެމާގެ ފަލަމަސްގަނޑަށް ލިބުނު އަނިޔާއެއްގެ ސަބަބުން އޭނާ ހުރީ ކުޅުމާ ދުރުގަ އެވެ.
ސްޕެނިޝް ކަޕްގައި އެތުލެޓިކް ބިލްބާއޯ އަތުން ބަލިވެ، ރެއާލް ކެޓި މެޗުގައި އަނިޔާގެ ސަބަބުން ބެންޒެމާ އަށް ނުކުޅެވުނެވެ. ކުރިން ބެލެވުނީ ރެއާލުން ޗެމްޕިއަންސް ލީގުގައި އަންނަ އަންގާރަ ދުވަހުގެރޭ ޕީއެސްޖީއާ ކުޅޭ މެޗަށް ބެންޒެމާ ފިޓްވާނެ ކަމަށެވެ. އެކަމަކު، އެ ފުރުސަތު މިހާރު އޮތީ ހަނިކޮށް ކަމަށް ފްރާންސްގެ ނޫސްތަކުން ބުނެ އެވެ.
ފްރާންސްގެ މަޝްހޫރު ނޫސް، ލެކިއުޕޭ އިން ރިޕޯޓްކުރާ ގޮތުގައި ބެންޒެމާގެ ރިކަވަރީގެ ކަންތައްތައް ލަސްކޮށްދާތީ، ރެއާލްގެ މެޑިކަލް ޓީމުން ވަނީ އެކަން އެ ޓީމުގެ ކޯޗު ކާލޯ އަންޗެލޮޓީގެ ސަމާލުކަމަށް ގެނެސްފަ އެވެ. ބެންޒެމާގެ ރިހެބިލިޓޭޝަންގެ ކަންކަން މި ވަގުތު ކުރިއަށްދާ ދުވެއްޔަށް ބަލާއިރު، ޕީއެސްޖީ މެޗު އޭނާ އަށް ގެއްލުމުގެ ފުރުސަތު އެބައޮތް ކަމަށް ރެއާލްގެ މެޑިކަލް ޓީމުން ވަނީ އަންޗެލޮޓީ ގާތުގައި ބުނެފަ އެވެ.
ދާދި ފަހުން ރެއާލްގެ ޓްރެއިނިންގައި ބެންޒެމާ ބައިވެރިވާން ފެށި ނަމަވެސް ކުރިއަށް ގެންދަނީ އިންޑިވިޖުއަލް ތަމްރީންތަކެވެ. ޓީމު ޓްރެއިނިންގައި ބައިވެރިވާން ބެންޒެމާ އަށް މުއްދަތެއް ނަގާނެ އެވެ.
މިހާރު އޮތްގޮތުން ސްޕެނިޝް ލީގުގައި މި ހަފްތާގައި ވިޔަރެއާލާ ދެކޮޅަށް ރެއާލުން ކުޅޭ މެޗުގައި ބެންޒެމާ ބޭނުމެއް ނުކުރާނެ އެވެ. އެއީ ވެސް ޕީއެސްޖީ މެޗަށް ބެންޒެމާ ފިޓްކުރަން ނިންމި ނިންމުމެކެވެ.
ބެންޒެމާ ވަނީ މި ސީޒަނުގައި މިހާތަނަށް ކުޅުނު 28 މެޗުން 24 ގޯލު ޖަހައި، ނުވަ ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޗެމްޕިއަންސް ލީގުގެ މި ފަހަރުގެ ނޮކައުޓް ބުރުގެ ގުރުއަތުލުން ދެ ފަހަރު ބާއްވަން ޖެހުނެވެ. އެއީ ދިމާވި ޓެކްނިކަލް މައްސަލައެއްގެ ސަބަބުންނެވެ. ފުރަތަމަ ބޭއްވި ގުރުއަތުލުމުން ރެއާލާ ކުޅެން ޖެހުނީ ބެންފީކާއާ އެވެ. އެކަމަކު، ދެ ވަނަ ފަަހަރަށް ގުރުއަތުލުމުން ޕީއެސްޖީއާ ކުޅެން ޖެހުނީ އެވެ.
