ފްރާންސްގެ ޕެރިހުގައި 2024 ވަނަ އަހަރު ބާއްވާ އޮލިމްޕިކްސް އަށް ކޮލިފައިވުމަށް އެހީވުމުގެ ގޮތުން ކުރިއަށްގެންދާ އޮލިމްޕިކް ސްކޮލާޝިޕްގެ ފުރުސަތު ބެޑްމިންޓަނުން ނިބާލް އަހުމަދާއި އެތުލެޓިކްސްގެ އައިޝަތު ހިމްނާ ހަސަން، ސާފިން އިން އިސްމާއިލް ރަޝީދު (ސްމައިލީ) އަދި ޝޫޓިން އިން ޒިޔާން ޞިޔާއު އަށް ލިބިއްޖެ އެވެ.
އޮލިމްޕިކް ސްކޮލާޝިޕަކީ ދުނިޔޭގެ އެކި ގައުމުތަކުގެ އެތުލީޓުންގެ ތެރެއިން ހުނަރާއި ހޯދާފައިވާ ކާމިޔާބީތަކަށް ބަލައި އޮލިމްޕިކްސް އަށް ކޮލިފައިވުމުގެ ފުރުސަތު އޮންނަ އެތުލީޓުންނަށް އިންޓަނޭޝަނަލް އޮލިމްޕިކް ކޮމިޓީ (އައިއޯސީ)އިން ދޭ މާލީ އަދި ފަންނީ އެހީތެރިކަމެކެވެ.
މިގޮތުން އޮލިމްޕިކް ކުޅިވަރުތަކުގައި ހިމެނޭ ކުޅިވަރުތަކުގެ ޒުވާން އެތުލީޓުންގެ ހުނަރާއި ކާމިޔާބަށް ބެލުމަށްފަހު އައިއޯސީންވަނީ ފަސް ފުރުސަތެއް ޕެރިސް އޮލިމްޕިކްސްގެ ތައްޔާރީތަކަށް ދީފަ އެވެ. ނިބާލް، ހިމްނާ، ސްމައިލީ، ޒިޔާންގެ އިތުރުން ދެން ފުރުސަތު ލިބުނީ ރާއްޖޭގެ ޓީޓީ ތަރި ފާތިމަތު ދީމާ އަލީ އަށެވެ.
އޮލިމްޕިކް ސްކޮލަޝިޕް ލިބުނު އެތުލީޓުންގެ ތެރެއިން ނިބާލް އަހުމަދަކީ ގައުމީ ބެޑްމިންޓަން ޓީމްގެ މުހިންމު ކުޅުންތެރިއެކެވެ. ނިބާލް، 18، ވަނީ 2019 ވަނަ އަހަރު މޮރިޝަސްގައި އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ ލޯ މެޑަލް ހޯދި ފިރިހެން ބެޑްމިންޓަން ޓީމްގައި ވެސް މުހިންމު ދައުރެއް އަދާކޮށްފަ އެވެ. ގައުމީ ބެޑްމިންޓަން މުބާރާތުގެ ފިރިހެން ސިންގަލްސް އިވެންޓްގެ މިދިޔަ ތިން އަހަރުގެ ރަނަރަޕަކީ ނިބާލް އެވެ.
އެތުލެޓިކްސް އިން އޮލިމްޕިކް ސްކޮލަޝިޕް ލިބުނު އައިޝަތު ހިމްނާ ހަސަން އަކީ މިވަގުތު ރާއްޖޭގައި ހުރި އެންމެ ހުނަރުވެރި އަންހެން ދުވުންތެރިޔާ އެވެ. ގައުމީ އެތުލެޓިކްސް ޗެމްޕިއަންޝިޕްގެ މިދިޔަ ދެ ފަހަރުގެ އެންމެ މޮޅު އެތުލީޓު ހިމްނާއަކީ 400 މީޓަރު ދުވުމުގެ ގައުމީ ރެކޯޑް އޮންނަ އެތުލީޓެވެ. ލޯކަލް މުބާރާތްތަކުގައި އެހެން އިވެންޓްތަކުގައި ދުވެ ކާމިޔާބީތައް ހޯދާފައިވީކަމުގައި ވިޔަސް ހިމްނާގެ ރަސްމީ އިވެންޓަކީ 400 މީޓަރު ދުވުމެވެ.
ސާފިން ސްކޮލަޝިޕް ލިބުނު އިސްމާއިލް ރަޝީދު (ސްމައިލީ)އަކީ ރާއްޖޭގެ ގައުމީ ސާފިން ޓީމުގައި އެންމެ ހަލުވި ދުވެއްޔެއްގައި ކުރިއެރުން ހޯދަމުން އަންނަ ސާފަރެވެ. ސްމައިލީ އެންމެ ބޮޑަށް ފާހަގަވީ 2019 އަހަރު ގައުމީ ސާފިން ޓީމް ހޮވުމަށް ބޭއްވި "ޓްރަޔަލް"އިން އެއް ވަނަ ހޯދުމާ އެކުގަ އެވެ. އޭގެ ފަހުން އޭނާ އަންނަނީ ގައުމީ ޓީމުގައި އޭނާގެ މަގާމު ދަމަހައްޓަމުންނެވެ.
ގައުމީ ޓީމާ އެކު ސްމައިލީ ވަނީ 2019 ވަނަ އަހަރު ޗައިނާގައި ބޭއްވި އޭޝިއަން ސާފިން ޗެމްޕިއަންޝިޕްގައި ވާދަކޮށް އެ މުބާރާތުގެ ޝޯޓް ބޯޑް ކެޓަގަރީގެ ފައިނަލް ހީޓުގައި ވާދަކޮށްފަ އެވެ. ނަމަވެސް މެޑަލަކާ ހަމަ އަށް އެ ފަހަރު ދެވޭ ގޮތެއް ނުވި އެވެ. އޮލިމްޕިކްސްގައި ސާފިން ހިމަނާފައިވަނީ މިދިޔަ އަހަރު ޓޯކިޔޯގައި އޮތް އޮލިމްޕިކްސް އިން ފެށިގެންނެވެ.
ސަރަހައްދީ ގޭމްސްތަކުގައި ގަވާއިދުން ވާދަކުރަމުން އަންނަ ޝޫޓިން ޓީމްގެ އެންމެ އުއްމީދީ މެންބަރު ޒިޔާން ޞިޔާއު އަށް ވެސް ވަނީ އޮލިމްޕިކް ސްކޮލަޝިޕް ލިބިފަ އެވެ.
އުމުރުން 22 އަހަރުގެ ޒިޔާން އަކީ 10 މީޓަރު އެއާ ޕިސްޓަލް ފިރިހެން ބައިގެ ގައުމީ ރެކޯޑު އޮތް ޝޫޓަރެވެ. އޭނާ ފުރަތަމަ މި ރެކޯޑު ހެދީ 2019 ވަނަ އަހަރު އޮތް 14 ވަނަ އޭޝިއަން ޝޫޓިން ޗެމްޕިއަންޝިޕްގަ އެވެ. އޭގެ ފަހުން 2019 ގެ ސައުތު އޭޝިއަން ގޭމްސްގައި އޭނާ ވަނީ އަމިއްލަ ރެކޯޑު އާ ކޮށްފަ އެވެ. މީގެ އިތުރުން 10 މީޓަރު އެއާ ޕިސްޓަލް މިކްސް ޓީމު ބައިގެ ގައުމީ ރެކޯޑު ހެދި ޝޫޓަރުންގެ ތެރޭގައި ވެސް ޒިޔާން ހިމެނެ އެވެ.
އޮލިމްޕިކް ސްކޮލަޝިޕް ލިބުނު ހުރިހާ އެތުލީޓުންނަށްވެސް 2024 ގެ އޮގަސްޓް މަހުގެ ނިޔަލަށް އައިއޯސީ އެޕްރޫވްޑް ތަމްރީން ސެންޓަރުތަކުގެ ތެރެއިން އެތުލީޓަކު ބޭނުން ސެންޓަރެއްގައި ތަމްރީން ހެދުމުގެ ފުރުސަތު ލިބޭނެ އެވެ. މި ތަމްރީންތަކުގެ ހަރަދުތަކާއި ޓެކްނިކަލް އެހީތެރިކަން އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން ފޯރުކޮށްދޭނެ އެވެ.
