ނިއުކާސަލް (ފެބްރުއަރީ 8) - ކުރިއަށް އޮތްތަނުގައި އާސެނަލަށް ވުރެ ބޮޑު ކްލަބެއްގެ ގޮތުގައި ނިއުކާސަލް ޔުނައިޓެޑް ފެނުމުގެ ފުރުސަތު އެބައޮތް ކަމަށް އެ ޓީމަށް މިދިޔަ މަހުގެ ޓްރާންސްފާ މާކެޓްގައި ބޮޑު އަގުގައި ބަދަލުވި ބްރެޒިލްގެ މިޑްފީލްޑަރު ބްރޫނޯ ގިމާރޭސް ބުނެފި އެވެ.
މީގެ ހަަތަރު މަހެއްހާ ދުވަސް ކުރިން ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން އިސްވެ، ނިއުކާސަލް ގަތްއިރު، އެ ޓީމުން ވަނީ މިދިޔަ މަހުގެ ޓްރާންސްފާ މާކެޓްގައި ކުޅުންތެރިން ގަންނަން 122 މިލިއަން ޑޮލަރު ހަރަދުކޮށްފަ އެވެ.
ނިއުކާސަލް އިން އެންމެ ބޮޑު އަގެއްދީފައި ގަތް ކުޅުންތެރިއަކީ ފްރާންސްގެ ލިޔޯނަށް ކުޅެމުން އައި ހުނަރުވެރި ތަރި، ގިމާރޭސް އެެވެ. ބްރެޒިލްގެ ސީނިއާ ގައުމީ ޓީމަށް ވެސް ކުޅެމުން އަންނަ އުމުރުން 24 އަހަރުގެ ގިމާރޭސް ގަންނަން ނިއުކާސަލް އިން ވަނީ 57 މިލިއަން ޑޮލަރު ހަރަދުކޮށްފަ އެވެ.
އިނގިރޭސި ފުޓްބޯޅައިގެ ސަޕޯޓަރުން ގިނަ ކްލަބެއްގެ ގޮތުގައި އޮތް، ނިއުކާސަލާ އެކު ހަތަރު އަހަރުގެ ކޮންޓްރެކްޓެއްގައި ސޮއިކުރި ގިމާރޭސް ހޯދަން އާސެނަލުން ވެސް މަސައްކަތްކުރި އެވެ. އެކަމަކު، އޭނާ ނިންމީ މި ވަގުތު ރެލިގޭޝަނުގައި ކުޅެމުން އަންނަ ނިއުކާސަލާ ގުޅޭށެވެ.
ނިއުކާސަލަށް ސޮއިކުރި ސަބަބު އޮޅުންފިލުވައިދެމުން ގިމާރޭސް ބުނީ ކުރިއަށް އޮތް އަހަރުތަކުގެ ތެރޭގައި ނިއުކާސަލަކީ އާސެނަލަށް ވުރެ "ބޮޑު ކްލަބަކަށް ވާނެ ކަމުގެ" ޔަގީންކަން އެބައޮތް ކަމަށެވެ.
"ނިއުކާސަލަށް އައުމަށް އަހަރެން ޝައުގުވެރިވީ ގިނަ ސަބަބުތަކެއް ވެސް އޮތީމަ. މި ކްލަބްގެ ވެރިން އަހަރެން ގާތުގައި ބުނި ވާހަކަ އަހަރެން ކަނުލާ އަޑުއެހިން. މި ކްލަބްގައި ކުރިއަށްދާން އޮތް ޕްރޮޖެކްޓަށް އަހަރެން އިތުބާރު ކުރަން. ކުރިއަށް އޮތް އަހަރުތަކުގެ ތެރޭގައި މި ކްލަބް (ނިއުކާސަލް) އަކީ ފުޓްބޯޅައިގެ ބޮޑު ބާރަކަށް ވާނެ،" ނިއުކާސަލުން މިހާތަނަށް ގެނައި އެންމެ އަގުބޮޑު ކުޅުންތެރިއާގެ ގޮތުގައި އެ ޓީމަށް ސޮއިކުރި ގިމާރޭސް ބުންޏެވެ.
ނިއުކާސަލްގެ މެޖޯރިޓީ ހިއްސާ މިހާރު އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓްބޯޅަ ކްލަބެއް ހިންގާ ބައެއްގެ އެންމެ ބޮޑު މިލްކިއްޔާތެވެ. ދެން އެ ޓީމާ އެންމެ ކައިރި ކުރަނީ މެންޗެސްޓާ ސިޓީ ހިންގަމުން އަންނަ ސިޓީ ފުޓްބޯލް ގްރޫޕްގެ ވެރިޔާ ޔޫއޭއީގެ ޝެއިހް މަންސޫރްގެ މިލްކިއްޔާތެވެ. އޭނާގެ މިލްކިއްޔާތުގައި 32 ބިލިއަން ޑޮލަރު އެބަހުއްޓެވެ.
ޖެނުއަރީ ޓްރާންސްފާގައި ނިއުކާސަލް އިން ގިމާރޭސްގެ އިތުުރުން ގެނައީ އެތުލެޓިކޯ މެޑްރިޑަށް ކުޅެމުން އައި އިނގިރޭސި ފުލްބެކް، ކިއެރަން ޓްރިޕިއޭ، ބްރައިޓަންގެ ޑެން ބާން، ބާންލީގެ ކްރިސް ވުޑް އަދި ލޯން އެއްބަސްވުމަކުން އެސްޓަން ވިލާ އިން މެޓް ޓާގެޓް އެވެ.
ނިއުކާސަލް މި ވަގުތު ލީގުގެ 19 ވަނައިގައި އޮތީ ކުޅުނު 21 މެޗުން ލިބުނު 15 ޕޮއިންޓާ އެކު އެވެ. ނިއުކާސަލް އިން ރެލިގޭޝަނުން ސަލާމަތްވާން މަސައްކަތް ކުރަމުން އަންނައިރު، މިދިޔަ މަހު އެ ޓީމުން ގެނައި ކުޅުންތެރިންނަށް ވަނީ ރެލިގޭޝަނުން ޓީމު ސަލާމަތްވެއްޖެނަމަ ބޮޑު ބޯނަސްތަކެއް ދޭން އެއްބަސްވުމުގައި ހިމަނައިފަ އެވެ.
