މުޅި ރާއްޖެ އަށް ހުޅުވާލައިގެން 2023/2024 ވަނަ އަހަރުގެ ދިވެހި ޕްރިމިއާ ލީގު ކުޅެން ނިންމާފައިވާއިރު، އެ މުބާރާތުގެ ކޮލިފިކޭޝަން ބައިގައި ރަޖިސްޓްރީވާން ދީފައިވާ މުއްދަތު މާދަމާގެ ނިޔަލަށް ހަމަވާނެ އެވެ.
އެފްއޭއެމްގެ އޮފިޝަލަކު މިއަދު "އަދަދު" އަށް ބުނީ މުޅި ރާއްޖެ އަށް ހުޅުވާލައިގެން ފަށަން ނިންމާފައިވާ ދިވެހި ޕްރިމިއާ ކޮލިފިކޭޝަންގައި ބައިވެރިވާ ޓީމުތައް އިތުރުވަމުން އަންނަ ކަމަށެވެ. އަދި ކަނޑައަޅާފައިވާ މުއްދަތުގެ ތެރޭގައި ހުރިހާ ޓީމެއް ވެސް ރަޖިސްޓްރީވުމުގެ ކަންތައްތައް ނިންމުމަށް އެފްއޭއެމުން ވަރަށް ބޮޑަށް އެދެ އެވެ.
ކޮލިފިކޭޝަންގައި ބައިވެރިވާން އެދޭ ފަރާތްތަކުން (ޓީމުތަކުން) މާދަމާގެ 14:00 ގެ ކުރިން އެފްއޭއެމަށް ލިޔުމަކުން ހުށަހަޅަން ޖެހޭނެ އެވެ. މުބާރާތުގައި ބައިވެރިވުމަށް ލިޔުން ފޮނުވާއިރު، އީމެއިލްގެ ޒަރިއްޔާއިން ފޮނުވޭނެ އިންތިޒާމް ވެސް އެފްއޭއެމުން ވަނީ ހަމަޖައްސައިފަ އެވެ. އެ ގޮތުން އީމެއިލް ކުރަން ޖެހޭނީ league@famaldives.com އަށެވެ. މި އީމެއިލް ފިޔަވައި އެހެން މެއިލްތަކަށް ފޮނުވޭ ލިޔުންތައް ބަލައިނުގަނެވޭނެ ކަމަށް އެފްއޭއެމުން ވަނީ އަންގައިފަ އެވެ.
މުބާރާތުގައި ބައިވެރިވެވޭނީ ކޮމިޝަނާ އޮފް ސްޕޯޓްސްގައި ރަޖިސްޓްރީވެފައިވާ ޓީމުތަކަށެވެ. އެފްއޭއެމުން މުބާރާތުގައި ޓީމުތައް ބައިވެރިވުމުގެ ފުރުސަތު ހުޅުވާލީ މިދިޔަ މަހު 10 ވަނަ ދުވަހު އެވެ. މިހާތަނަށް ގިނަ ޓީމުތަކަކުން އަންނަނީ މުބާރާތުގައި ބައިވެރިވަމުންނެވެ.
2023/2024 ދިވެހި ޕްރިމިއާ ލީގު: މުޅި ރާއްޖެ ބެހޭނީ ހަތަރު ޒޯނަކަށް!
އެފްއޭއެމުން 2023/2024 ވަނަ އަހަރު ދިވެހި ޕްރިމިއާ ލީގު ފުޅާކުރާއިރު، ރާއްޖެ ބެހިގެންދާނީ ހަަތަރު ޒޯނަކަށެވެ. ޒޯން އެކެއްގައި ހިމެނެނީ ހއ، ހދ، ށ، ނ، ރ އެވެ. ޒޯން ދޭއްގައި ބ، ޅ، ކ، އއ، އދ، ވ، މ، ފ، ދ ހިމެނޭއިރު، ޒޯން ތިނެއްގައި އޮތީ ތ، ލ، ގއ، ގދ، ޏ، ސ އެވެ. އަދި ޒޯން ހަތަރަކީ މިހާރު މާލޭގައި ކުރިއަށްދާ ފުރަތަމަ ޑިވިޝަނެވެ. މި ޑިވިޝަނުގައި ހިމެނޭނީ މާލެ، ހުޅުމާލެ، ވިލިމާލޭގެ ޓީމުތަކެވެ.
ފޯމެޓަށް އަންނަ އެންމެ ބޮޑު ބަދަލަކީ މީގެއިން ކޮންމެ ޒޯނެއްގައި (އެއް ވަނަ، ދެ ވަނަ އަދި ތިން ވަނަ ޑިވިޝަން) ތިން ޑިވިޝަނެއް ކުރިއަށް ގެންދިއުމެވެ. ތިން ޑިވިޝަނަށް ޓީމުތައް ހޮވުމުގައި އެންމެ ފުރަތަމަ ބޭއްވިގެންދާނީ ރަށު ފެންވަރުގައި ބޭއްވޭ "އޯޕަން ޑިވިޝަން" އެކެވެ. އޯޕަން ޑިވިޝަނުގެ ބޭނުމަކީ ކޮންމެ ރަށެއްގައި ވެސް އޮންނަ ކޮންމެ ޓީމަކަށް (ކޮންމެ ޖަމިއްޔާ އަކަށް) ބައިވެރިވުމުގެ ފުރުސަތު ދިނުމުގެ ގޮތުންނެވެ.
ލީގުތަކުގައި ބައިވެރިވެވޭނީ ކޮމިޝަނާ އޮފް ސްޕޯޓްސްގެ ދަށުން ރަޖިސްޓްރީ ކުރެވި ގާނޫނީ ގޮތުން ވެސް ބަލައިގަނެފައިވާ ޓީމުތަކަށެވެ.
ދިވެހި ޕްރިމިއާ ލީގު 2023/2024 ވަނަ އަހަރު ފަށާއިރު އޮންނާނީ މި ވަގުތު ވެސް ޕްރިމިއާ ލީގުގައި އޮތް އަށް ޓީމުގެ އިތުރުން ހަތަރު ޒޯންގެ ޗެމްޕިއަނުންނެވެ. މީގެ ތެރެއިން މާލެ ޒޯންގެ ޗެމްޕިއަން ގޮތުގައި ކަނޑައަޅާނީ 2022 ވަނަ އަހަރުގެ ދެ ވަނަ ޑިވިޝަނުގެ ޗެމްޕިއަނުން ކަމަށް ވަނީ ނިންމައިފަ އެވެ. ދެން އޮތް ތިން ޖާގަ ލިބޭނީ ޒޯން ޗެމްޕިއަނުންނަށެވެ.
ރާއްޖޭގެ ފުޓްބޯޅައިގެ އެންމެ ބޮޑު ލީގެއްގެ ގޮތުގައި އަންނަ އަހަރު ފަށަން ނިންމާފައިވާ ލީގަށް ކޮލިފައިވުމުގެ ގޮތުން ރަށްރަށުން މިހާރު ވަނީ ޓީމު އެކުލަވާލުމުގެ މަސައްކަތް ފަށައިފަ އެވެ. އެ ގޮތުން ފުޓްބޯޅައިގެ މަޝްހޫރު ރަށެއް ކަމަށްވާ ބ. އޭދަފުށިން ވަނީ ކްލަބް އޭދަފުށި ޓީމުގެ ކޯޗަކަށް ފުރަތަމަ ޑިވިޝަނުގެ ކްލަބްތަކާއި ގައުމީ އެކި ލެވަލްތަކުގެ ޓީމުތަކުގައި ފާހަގަކޮށްލެވޭ މަސައްކަތްތަކެއްކޮށްފައިވާ ކޯޗު މުހައްމަދު އާތިފް (އާތީ) ހަމަޖައްސައިފަ އެވެ.
