ޔައުންޑޭ، ކެމަރޫން (ފެބްރުއަރީ 4) - އެފްރިކަން ކަޕް އޮފް ނޭޝަންސް (އެފްކޮން)ގެ ދެ ވަނަ ސެމީ ފައިނަލުގައި މިރޭ ޕެނަލްޓީ ޖަހައިގެން 3-1 އިން ކެމަރޫން ކަޓުވާލައި މިސްރު މުބާރާތުގެ ފައިނަލުގެ ފަހު ޖާގަ ހޯދައިފި އެވެ.
އާދިއްތަ ދުވަހުގެރޭ ކުޅޭ ފައިނަލުގައި މިސްރު ނުކުންނާނީ ސެނެގާލާ ދެކޮޅަށެވެ. ސެނެގާލުން ސެމީގައި ބުރްކީނާ ފާސޯ އަތުން މޮޅުވެގެން ޖެހިޖެހިގެން ދެ ވަނަ ފަހަރު ފައިނަލުގައި ކުޅޭއިރު، އެ ޓީމަށް މި މުބާރާތުގެ ތަށި އުފުލާލެވިފައިނުވެ އެވެ. އެންމެ ފަހުން 2019 ވަނަ އަހަރުގެ ފައިނަލުގައި ސެނެގާލް ވަނީ އަލްޖީރިއާ އަތުން ބަލިވެފަ އެވެ.
ހަތް ފަހަރު އެފްރިކާގެ ޗެމްޕިއަންކަން ހޯދި މިސްރުން އަންނަ މަހު ވޯލްޑް ކަޕް ކޮލިފައިންގެ ޕްލޭއޮފްގައި ވެސް ސެނެގާލާ ދެކޮޅަށް ކުޅެން ޖެހޭނެ އެވެ. އެއީ ގަތަރުގައި މި އަހަރު ނޮވެމްބަރާއި ޑިސެމްބަރުގައި ބާއްވާ ފީފާ ވޯލްޑް ކަޕުން ޖާގައެއް ހޯދާށެވެ. އެކަމަކު، މި ވަގުތު މިސްރާއި ސެނެގާލްގެ ފޯކަސް އަކަށް ވާނީ އާދިއްތަ ދުވަހު ކުޅޭ ފައިނަލުން މޮޅުވެ، އެފްރިކާގެ ޗެމްޕިއަނަށް ވުމުގެ ޝަރަފް ހޯދުމެވެ.
މިރޭގެ މެޗުގައި މިސްރާއި ކެމަރޫނަށް ގޯލު ޖަހާނެ މާ ގިނަ ހުސް ފުރުސަތުތަކެއް ނުލިބެ އެވެ. ފުރަތަމަ ހާފުގައި މިސްރު އޭރިއާތެރެއިން ކެމަރޫންގެ ކާލް ޓޯކޯ އެކަމްބީ އަށް ލިބުނު ބޯޅައެއް އޭނާގެ ފަޔަށް ރަނގަޅަށް ނޭރުމުން ފޮނުވާނުލެވުނެވެ. ކެމަރޫނުން ފުރަތަމަ ހާފުގައި އުފެއްދި އެޓޭކެއްގައި މިސްރުގެ ގޯލު ހުރަސް ދަނޑިއަށް ވެސް ވަނީ ބޯޅަ އަމާޒުވެފަ އެވެ.
ކެމަރޫންގެ އަބޫބަކާރު (ވ) މިސްރުގެ މުހައްމަދު އެލްނެނީ ކައިރިން ބޯޅަ ފޮނުވާލަނީ.-- ފޮޓޯ: އޭއެފްޕީ
މެޗުގެ ދެ ވަނަ ހާފުގައި މިސްރުގެ ކެޕްޓަން މުހައްމަދު ސަލާހަށް ހުސް ފުރުސަތެއް ލިބުނެވެ. ކެމަރޫންގެ ޑިފެންޑަރު ނޯހޯ ޓޯލޯ ފަހަތަށް ޖައްސާލި ބޯޅަ ހޯދައި ސަލާހު މަސައްކަތްކުރީ ކެމަރޫންގެ ކީޕަރު އަންދްރޭ އޮނާނާ ކައިރިން ނައްްޓާފައި ގޯލު ޖަހާށެވެ. އެކަމަކު، އޮނާނާ ވަނީ ސަލާހު ބޯޅަ ކުރިއަށް ޖައްސާލި ވަގުތު އެ ބޯޅަ ހުއްޓުވައިފަ އެވެ.
މި މެޗުގެ ފުރިހަމަ ވަގުތު ހަމަވިއިރު، ދެ ޓީމު 0-0 އިން އެއްވަރުވެފައި އޮތްއިރު، މިސްރުގެ ކޯޗު ކާލޯސް ކުއެރޯޒް ވަނީ ދެ ރީނދޫ ކާޑާ އެކު ރަތް ކާޑު ދައްކައި ބެންޗުން ފޮނުވާލައިފަ އެެވެ. ކުއެރޯޒަށް ދެ ރީނދޫ ކާޑު ވެސް ދެއްކީ މެޗުގެ ރެފްރީ ބަކާރީ ގައްސާމާގެ ނިންމުންތަކާ ތަކުރާރުކޮށް ހިތްހަމަނުޖެހުން ފާޅުކުރުމުންނެވެ. މި ރަތް ކާޑުގެ ސަބަބުން ފައިނަލް މެޗުގައި ކުއެރޯޒަށް މިސްރުގެ ބެންޗުގައި ނީނދެވޭނެ އެވެ.
ނަތީޖާ ނެރެން ކުޅުނު އިތުރު ވަގުތުގެ ދެ ހާފަށް ބަލާއިރު، އެންމެ ރަނގަޅު ފުރުސަތު ހޯދީ މިސްރުންނެވެ. އެ ގޮތުން އިތުރު ވަގުތުގެ ދެ ވަނަ ހާފުގެ ފަހު ކޮޅުގައި މިސްރުގެ ވިންގް ރަމަދާން ސޯބީ އަރިމަތިން ހުސްކޮށް ވަދެ ހުރަސްކޮށްލި ބޯޅަ ޖަހަން އެރި މިސްރުގެ ތިން ކުުޅުންތެރިންގެ ތެރެއިން އެއްވެސް ކުޅުންތެރިއަކަށް ނުލިބުނެވެ.
މިސްރުން މި ފަހަރުގެ އެފްރިކަން ކަޕްގެ ނޮކައުޓް ތިން މެޗުން ވެސް މޮޅުވީ އިތުރު ވަގުތު ކުޅެގެންނެވެ. އޭގެ ތެރެއިން ގަދަ 16 ބުރުގައި އައިވަރީ ކޯސްޓް އަތުންނާއި މިރޭ ސެމީގައި ކެމަރޫން އަތުން މޮޅުވީ ޕެނަލްޓީ ޖަހައިގެންނެވެ. ދެ ޕެނަލްޓީ ޝޫޓްއައުޓްގައި ވެސް ތަފާތު ދެއްކީ ކީޕަރު މުހައްމަދު އަބޫގަބާލް (ގަބާސްކީ) އެވެ.
މިސްރުގެ އެއް ވަނަ ކީޕަރު މުހައްމަދު އެލް ޝަނާވީ އަށް އައިވަރީ ކޯސްޓާ ދެކޮޅަށް ކުޅުނު މެޗުގައި އަނިޔާވެގެން ގަބާސްކީ ކުޅެން އަރައި އައިވަރީ ކޯސްޓްގެ އެރިކް ބައީ ޖެހި ޕެނަލްޓީ މަތަކޮށް މިސްރު މޮޅުކޮށްދިނެވެ. މިރޭ ގަބާސްކީ ވަނީ ކެމަރޫނުން ޖެހި ދެ ޕެނަލްޓީއެއް މަތަކޮށްފަ އެވެ. ގަބާސްކީ މިރޭގެ މެޗުގައި ކުޅުނީ ކުއާޓާގައި މޮރޮކޯ އަތުން މިސްރު މޮޅުވި މެޗުގައި އަނިޔާވެގެން ބަދަލުކުރުމަށް ފަހު ރިކަވާވެގެންނެވެ.
މިސްރު ޕެނަލްޓީ ޖަަހައިގެން މޮޅުވުމުން އެ ޓީމުގެ ކުޅުންތެރިން އުފާފާޅުކުރަނީ.-- ފޮޓޯ: އޭއެފްޕީ
ޕެނަލްޓީގައި ފުރަތަމަ ޖަހަންދިޔަ ކެމަރޫންގެ ކެޕްޓަން ވިންސެންޓް އަބޫބަކާރު ވަނީ ޕެނަލްޓީ ކާމިޔާބުކޮށްފަ އެވެ. މިސްރުން ފުރަތަމަ ޕެނަލްޓީ ޖެހި ޒީޒޯ ވަނީ ޕެނަލްޓީ ވައްދާލައިފަ އެވެ. ކެމަރޫންގެ ދެ ވަނަ ޕެނަލްޓީ ހެރޯލްޑް މޮކޯޑީ ފޮނުވާލުމުން ގަބާސްކީ މަތަކުރިއިރު، މިސްރުގެ ދެ ވަނަ ޕެނަލްޓީ އަބްދުލްމޫނެމް ކާމިޔާބުކޮށް އެ ޓީމަށް ލީޑުނަގައިދިނެވެ. އޭގެ ފަހުން ކެމަރޫންގެ ޖޭމްސް ލެ ސިލީކީ ޖެހި ޕެނަލްޓީ ކީޕަރު ގަބާސްކީ ހުއްޓުވިއިރު، މިސްރުން ތިން ވަނަ ޕެނަލްޓީ ޖަހަން ދިޔަ މުހައްމަދު ލަޝީން ޕެނަލްޓީ ކާމިޔާބުކޮށް މިސްރުގެ ލީޑުފުޅާކުރި އެވެ.
ކެމަރޫންގެ ހަތަރު ވަނަ ޕެނަލްޓީ ޖެހީ ކްލިންޓަން އެންޖީ އެވެ. އޭނާ ފޮނުވާލި ބޯޅަ ގޯލާ ސީދާނުވެ ބޭރުދިޔައިރު، މިސްރުން ފަހު ދެ ޕެނަލްޓީ ނުޖަހަނިސް މެޗުން މޮޅުވީ އެވެ. ސަލާހު މަޑުކޮށްގެން ހުރީ ފަސް ވަނަ ޕެނަލްޓީ ޖަހާށެވެ. އެކަމަކު، އޭނާއާ ހަމައަށް ޕެނަލްޓީ ޝޫޓައުޓް ނުދަނިސް މެޗު ނިމި މިސްރު މޮޅުވީ އެވެ.
ކެމަރޫނުން 2017 ވަަަނަ އަހަރުގެ އެފްރިކަން ކަޕް ކާމިޔާބުކުރީ ފައިނަލުގައި މިސްރު ބަލިކޮށްފަ އެވެ. މިސްރުން މި ފަހަރު ކެމަރޫންގެ އަމިއްލަ ފަސްގަނޑުގައި މޮޅެއް ހޯދުމަކީ ކުރިން ފައިނަލުން ބަލިވުމުގެ ރަނގަޅު ބަދަލުހިފުމެކެވެ.
