ޔައުންޑޭ، ކެމަރޫން (ފެބްރުއަރީ 3) - އެފްރިކަން ކަޕް އޮފް ނޭޝަންސް (އެފްކޮން)ގެ ފުރަތަމަ ސެމީގައި ރޭ ބުރްކީނާ ފާސޯ އަތުން 3-1 އިން މޮޅުވެ، ސެނެގާލުން ޖެހިޖެހިގެން ދެ މުބާރާތުގެ ފައިނަލުން ޖާގަ ހޯދައިފި އެވެ.
ރޭ ސެނެގާލް މޮޅުކޮށްދިނުމުގައި އެންމެ ބޮޑު ކްރެޑިޓެއް ހައްގުވާ އެއް ކުޅުންތެރިއަކީ ލަނޑެއް ޖެހުމުގެ އިތުރުން ލަނޑެއް ޖަހަން އެހީތެރިވެދިން ސަޑިއޯ މާނޭ އެވެ. ސެނެގާލް އެންމެ ފަހުން 2019 ވަނަ އަހަރުގެ ފައިނަލުގައި އަލްޖީރިއާ އަތުން ބަލިވި ނަމަވެސް އެ ފަހަރުގެ މުބާރާތުގައި ވެސް މާނޭ ވަނީ މޮޅު ކުޅުމެއް ދައްކައިފަ އެވެ.
ސެނެގާލަށް ލިބުނު ދެ ޕެނަލްޓީއެއް ރޭ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވަނީ ނުދޭން ނިންމައިފަ އެވެ.
ރޭގެ މެޗުގެ ފަހު 20 މިނިޓާ ހަމައަށް ދެ ޓީމުގެ ފަރާތުން ވެސް ރަނގަޅު ކުޅުމެއް ފެނުނު ނަމަވެސް އެއްވެސް ޓީމަކަށް ގޯލެއް ޖެހޭގޮތެއްނުވި އެވެ. އެކަމަކު، އޭގެ ފަހުން ދެ ޓީމުގެ އެޓޭކްތައް ވެސް ވަރުގަދަވެ، ގޯލު ޖަހަން ލިބުނު ފުރުސަތުތަކުގެ ބޭނުން ހިފަން ފެށި އެވެ.
މެޗުގެ 70 ވަަނަ މިނިޓްގައި ސެނެގާލަށް ލީޑުނަގައިދިނީ އަބްދޫ ޑިއާލޯ އެވެ. ޑިއާލޯ މި ގޯލު ޖެހީ ސެނެގާލްގެ ކެޕްޓަން ކަލީދޫ ކުލިބާލީ ދިން ބޯޅައަކުންނެވެ. އޭގެ ހަ މިނިޓް ފަހުން މާނޭ ތަނަވަސްކޮށްދިން ފުރުސަތެއްގައި އިދްރީސާ ގާނާ-ގޭއި ވަނީ ސެނެގާލްގެ ލީޑުފުޅާކޮށްދީފަ އެވެ.
ހިތްވަރު އެލުވާނުލައި ކުޅެ، ބުރްކީނާ ފާސޯ އިން ވަނީ މެޗުގެ 82 ވަނަ މިނިޓްގައި ގޯލެއް ޖަހައި އުންމީދެއް ހޯދައިފަ އެވެ. މި ގޯލު ޖެހީ އީސާ ކަބޯރޭ ދިން ބޯޅައަކުން ބްލާޓީ ޓޫރޭ އެވެ.
ނަތީޖާ ހަމަހަމަކުރެވޭތޯ ބުރްކީނާ ފާސޯ އިން މަސައްކަތް ކުރަމުން ދަނިކޮށް މެޗުގެ 87 ވަނަ މިނިޓްގައި މާނޭ ވަނީ ސެނެގާލް ފައިނަލަށް ގެންގޮސްދިން ގޯލު ޖަހައި ޕްރެޝަރު ކަނޑުވާލައިފަ އެވެ. އިސްމާއިލާ ސާ ދިން ބޯޅައަކުން މާނޭ ޖެހި މި ގޯލަކީ ގައުމީ ޓީމަށް އޭނާ ކާމިޔާބުކޮށްދިން 29 ވަނަ ގޯލެވެ. މި ލަނޑާ އެކު މާނޭ ވަނީ ސެނެގާލަށް އެންމެ ގިނަ ގޯލު ޖަަހައިދީގެން ހެންރީ ކަމާރާ ހަދާފައިވާ ރެކޯޑާ ހަމަކޮށްފަ އެވެ.
އަންނަ އާދިއްތަ ދުވަހު ކުޅޭ ފައިނަލުގައި ސެނެގާލް ކުޅެން ޖެހޭ ޓީމެއް އެނގޭނީ މިރޭ ކުޅޭ ދެ ވަނަ ސެމީ ފައިނަލް މެޗަށް ފަހު އެވެ. ދެ ވަނަ ސެމީގައި މުބާރާތް ބާއްވާ ގައުމު، ކެމަރޫން ނުކުންނާނީ މިސްރާ ދެކޮޅަށެވެ.
