ލަންޑަން (ޖެނުއަރީ 29) - ޓޮޓެންހަމް ހޮޓްސްޕާސް އަށް އޭނާ ބޭނުންވާ ކުޅުންތެރިން ނުގެނެވޭތީ ކޯޗު އެންޓޯނިއޯ ކޮންޓޭ އެ ޓީމު ދޫކޮށްލަން އުޅޭ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
މި މަހުގެ ކުރިއަށްދާ ފިނި މޫސުމުގެ ޓްރާންސްފާ ބާޒާރުގައި ޓޮޓެންހަމުން އަންނަނީ ކޮންޓޭ ބޭނުންވާ ސްޓައިލުގެ ގިނަ ކުޅުންތެރިންތަކެއް ހޯދަން މަސައްކަތް ކުރަމުންނެވެ. އޭގެ ތެރޭގައި ޕްރިމިއާ ލީގުގެ ވުލްވްސް އަށް ކުޅޭ އަޑަމާ ޓްރައޯރޭ އާއި ޕޯޓޯގެ ލުއިސް ޑިއާޒް އާއި އޭސީ މިލާންގެ ފްރެންކް ކެސިއޭ، ފިއޮރެންޓީނާގެ ސޮފިއަން އަމްރަބާތު އާއި ފިއޮރެންޓީނާގެ ޑުސަން ވްލަހޮވިޗް އާއި މެންޗެސްޓާ ޔުނައިޓެޑްގެ ޖެސީ ލިންގާޑްގެ އިތުރުން ބްރައިޓަންގެ ތާރިގް ލަމްޕްޓޭ ހިމެނެ އެވެ.
މީގެ ތެރެއިން އެޑަމާ ބާސެލޯނާއާ ގުޅެން ނިންމާފައިވާއިރު، ވްލަހޮވިޗް ވަނީ ޔުވެންޓަސް އަށް ސޮއިކޮށްފަ އެވެ. އަދި ޑިއާޒް ވަނީ ޓޮޓެންހަމަށް ނޫނެކޭ ބުނެ، ލިވަޕޫލާ ގުޅެން ނިންމައިފަ އެވެ.
ކޮންޓޭ ބޭނުންވާ ކުޅުންތެރިންގެ ލިސްޓު ކިތަންމެ ދިގުވި ކަމުގައި ވިޔަސް އެއްވެސް ކުޅުންތެރިއެއް ގަތުމުގެ ރޭހުގައި ޓޮޓެންހަމް އަށް އަދި ކުރިއެއް ނުލިބެ އެވެ.
ކޮންޓޭ އަކީ އޭނާ ހަވާލުވާ ކޮންމެ ޓީމަކަށް ވެސް ގިނަ ޝަރުތުތަކެއް ކުރާ ކޯޗެެކެވެ. ޓޮޓެންހަމް އާއި ހަވާލުވީ ވެސް އޭނާ ބޭނުންވާ ކުޅުންތެރިން ގަތުމަށް ކުލަބުން ފަންޑު ދޭނެކަމުގެ ކަމުގެ ޔަގީންކަން ދިނުމުންނެވެ. ނަމަވެސް އަދި އެއްވެސް ވަރަކަށް ކުޅުންތެރިން ހޯދުމުގައި ކްލަބަށް މާ ބޮޑު ކަމެއް ނުކުރެވެ އެވެ. އަދި ޓޮޓެންހަމްގެ ސްޕޯޓިން ޑިރެކްޓަރު ފަބިއޯ ޕަރަޓިޗީ ވެސް ވަނީ ޓޮޓެންހަމަށް ކުޅުންތެރިން ގެނައުމުގައި ދަތިތަކެއް ހުރި ކަމަށް ބުނެފަ އެވެ.
އިނގިރޭސި މީޑިއާ ރިޕޯޓްތައް ބުނާ ގޮތުން ކޮންޓޭ ބޭނުންވާ ކުޅުންތެރިން ނުގަނެވޭނަމަ އޭނާ މި ސީޒަނަށް ފަހު އެ ކުލަބު ދޫކޮށްލުން ގާތެވެ. ހާލަތު ބަދަލުވާ ގޮތަކުން ސީޒަން ނިމުމުގެ ކުރިން ވެސް ކޮންޓޭ ޓޮޓެންހަމްގެ ވަޒީފާ ދޫކޮށްލުމުގެ ފުރުސަތު އެބައޮތެވެ. ޓޮޓެންހަމާ އެކު ކޮންޓޭ ހަދާފައިވަނީ ދެ އަހަރުގެ އެއްބަސްވުމެކެވެ.
މި ސީޒަން ފެށިއިރު ޓޮޓެންހަމުން ޓީމު ހަވާލުކުރީ ޕޯޗުގީސްގެ ކޯޗު ނޫނޯ އެސްޕިރީޓޯ ސަންޓޯއާ އެވެ. އޭނާގެ ވަޒީފާ ގެއްލި ޓޮޓެންހަމުން ކޮންޓޭއާ ޓީމު ހަވާލުކުރީ މިދިޔަ ނޮވެމްބަރު މަހުގެ އެއް ވަނަ ދުވަހުގަ އެވެ.
ޓޮޓެންހަމާ އެކު ކޮންޓޭގެ ލީގު ރެކޯޑު ރަނގަޅެވެ. ކޮންޓޭ އަކީ ޓޮޓެންހަމާ ހަވާލުވެ، އެ ކްލަބްގެ ތާރީހުގައި ވެސް ފުރަތަމަ ހަތް މެޗު ބައްޔެއް ނުވެ ނިންމާލި ފުރަތަމަ ކޯޗު އެވެ. މިހާތަނަށް ޓޮޓެންހަމަށް ކޮންޓޭ ކޯޗުކޮށްދިން 16 މެޗުގެ ތެރެއިން އެ ކްލަބް ބަލިވީ އެންމެ ހަތަރު މެޗުންނެވެ. އޭގެ ތެރެއިން ތިން މެޗަކީ ކޮންޓޭ ކުރިން ކޯޗުކޮށްދިން ޗެލްސީ އަތުން ބަލިވި މެޗުތަކެވެ.
