ލިވަޕޫލް (ޖެނުއަރީ 29) - ޕޯޗުގަލްގެ ޕޯޓޯ އަށް ކުޅެމުން އަންނަ ކޮލަމްބިއާގެ ފޯވާޑް ލުއިސް ޑިއާޒް، އިނގިރޭސި ޕްރިމިއާ ލީގުގެ ލިވަޕޫލަށް ސޮއިކުރަން ހުރިހާ ކަމެއް ހަމަޖެހިފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 25 އަހަރުގެ ޑިއާޒް ހޯދަން ލިވަޕޫލުން އެންމެ ފުރަތަމަ ބޭނުންވީ މި ސީޒަން ނިމުމުން އަންނަ ސީޒަނަށް ޓީމު ވަރުގަދަ ކުރުމުގެ ގޮތުންނެވެ. އެކަމަކު، މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް އިން އަންނަ ހޯމަ ދުވަހު ނިމޭ މި މަހުގެ ޓްރާންސްފާ މާކެޓް ތެރޭ ޑިއާޒް ހޯދަން މަސައްކަތްކުރާތީ ލިވަޕޫލުން މި ވަނީ އެ ޑީލްގެ މަސައްކަތް އަވަސްކޮށް، ކޮންޓްރެކްޓްގައި ސޮއިކުރުމާ ހަމައަށް ގެންގޮސްފަ އެވެ.
މި ފަހަރުގެ ޗެމްޕިއަންސް ލީގުގައި ޕޯޓޯގެ ޑިއާޒް (ވ) ލިވަޕޫލްގެ ޖޮޓާ ކައިރިން ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އޭއެފްޕީ
މިދިޔަ ހަފްތާއެއްހާ ދުވަހު ޑިއާޒް ހޯދުމުގެ މަޝްވަރާތަކުގެ ކުރީގައި އޮތީ ޓޮޓެންހަމް އެވެ. ޓޮޓެންހަމް އިން ވަނީ ޑިއާޒްގެ ސޮއި ހޯދަން 45 މިލިއަން ޕައުންޑްގެ ބިޑެއް ކޮށްފަ އެވެ. އެއީ ފުރަތަމަ 30 މިލިއަން ޕައުންޑް ދިނުމަށް ފަހު ބާކީ ބަހާލައިގެން ދޭ ގޮތަށެވެ.
ރިޕޯޓްތައް ބުނާގޮތުން ލިވަޕޫލުން ޓޮޓެންހަމްގެ ޑީލް ހައިޖެކްކުރީ ޖުމްލަ އެއްކޮށް 50 މިލިއަން ޕައުންޑް ދޭ ގޮތަށެވެ. ފުރަތަމަ ދައްކާނީ 37 މިލިއަން ޕައުންޑެވެ. ބާކީ 13 މިލިއަން ޕައުންޑް ދޭނީ ބަހާލައިގެންނެވެ.
ސްކައި ސްޕޯޓްސް އިން ރިޕޯޓްކުރާ ގޮތުގައި ލިވަޕޫލުން މިހާރު ވަނީ ޑިއާޒްގެ މެޑިކަލް ޓެސްޓްތައް ހަދަން އާޖެންޓީނާ އަށް ޓީމެއް ފޮނުވައިފަ އެވެ. ވޯލްޑް ކަޕް ކޮލިފައިންގައި ޑިއާޒް ކުޅެމުން އަންނަ ކޮލަމްބިއާ މިރޭ ޕެރޫއާ ކުޅުމަށް ފަހު މާދަމާގެ ވަގުތެއްގައި އާޖެންޓީނާ އަށް ފުރާނެ އެވެ. ދެކުނު އެމެރިކާގެ މީޑިއާ ރިޕޯޓްތައް ބުނާގޮތުގައި ޑިއާޒްގެ މެޑިކަލް ޓެސްޓްތައް ނިންމާނީ އާޖެންޓީނާގަ އެވެ.
ޑިއާޒްގެ ސޮއި ހޯދަން ކުރާ މަސައްކަތް ޓޮޓެންހަމަށް ނާކާމިޔާބު ވެއްޖެނަމަ ޖެހިޖެހިގެން ދެ ޓްރާންސްފާއެއް އެ ޓީމަށް ނާކާމިޔާބުވީ އެވެ. ޓޮޓެންހަމުން ހޯދަން މަސައްކަތް ކުރި ވުލްވްސްގެ ވިންގް އެޑަމާ ޓްރައޯރޭ ވަނީ ބާސެލޯނާ އަށް ބަދަލުވާން ނިންމައިފަ އެވެ.
ޕޯޗުގީސް ލީގާއި ޗެމްޕިއަންސް ލީގުގެ އިތުރުން ކޮލަމްބިއާ ގައުމީ ޓީމުގައި ވިދަމުން އަންނަ ޑިއާޒް ލިވަޕޫލަށް ސޮއިކޮށްފިނަމަ މި މަހުގެ ޓްރާންސްފާ މާކެޓް ތެރޭގައި ލިވަޕޫލުން ޓަކޫމީ މިނަމީނޯ ނޫނީ ޑިވޮކް އޮރީގީ ދޫކޮށްލާނެ އެވެ. މީގެ ތެރެއިން ލިވަޕޫލުން ދޫކޮށްލުމުގެ ފުރުސަތު ބޮޑީ އޮރީގީ އެވެ.
އޮރީގީގެ ކޮންޓްރެކްޓް މި ސީޒަން ނިމުމުން ހަމަވާނެ އެވެ. ދާދި ފަހުން މިނަމީނޯ އަށް ލީޑްސް ޔުނައިޓެޑާއި މޮނާކޯ އިން ލިބުނު އޮފާތަކަކަށް ލިވަޕޫލުން ނޫނެކޭ ބުނެފައިވާއިރު، އޭނާ ލިވަޕޫލްގެ ކޮންޓްރެކްޓްގައި ހުރީ 2024 ވަނަ އަހަރު ޖޫން މަހުގެ ނިޔަލަށެވެ.
