ޓިއުރިން (ޖެނުއަރީ 27) - ޔުވެންޓަސް އަށް ކުޅެމުން އަންނަ އާޖެންޓީނާގެ ޕްލޭމޭކަރު ޕައޮލޯ ޑިބާލާ ހޯދުމުގެ ރޭހަށް ލިވަޕޫލުން ވެސް ވަދެފައިވާ ކަމަށް އިޓަލީގެ މީޑިއާ ރިޕޯޓްތައް ބުނެފި އެވެ.
އުމުރުން 28 އަހަރުގެ ޑިބާލާ، ޔުވެންޓަސްއާ އެކު ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާނެ އެވެ. ޔުވެންޓަސް އިން ހުށަހަޅާފައިވާ އާ ކޮންޓްރެކްޓްގައި ސޮއިކުރަން ޑިބާލާ ބޭނުމެއް ނުވަނީ މިހާރު ލިބޭ ވަރަށް ވުރެ ކުޑަ މުސާރަ އަކަށް ކުޅެން ބޭނުންނުވާތީ އެވެ. ޑިބާލާ ބޭނުންވަނީ މިހާރު ލިބޭ މުސާރަ ކަމަށްވާ އަހަރަކު 16 މިލިއަން ޑޮލަރަށް ވުރެ ބޮޑު އަގަކަށް އެކުލަބުގައި މަޑުކުރާށެވެ. ނަމަަވެސް ޔުވެންޓަސް އިން ހުށަހެޅީ ޑިބާލާގެ މުސާރަ 20 ޕަސެންޓް ކުޑަކޮށް އޭނާ 2025ގެ ނިޔަލަށް އެކުލަބުގައި މަޑުކުރުވާށެވެ.
މި ސީޒަން ނިމުމުން ހިލޭ ޓްރާންސްފާއެއްގައި ޑިބާލާގެ ސޮއި ހޯދުމަށް މީގެ ކުރިން ޝައުގުވެރިކަން ފާޅުކޮށްފައިވާ ކްލަބްތަކަކީ އިންޓަ މިލާން، ޓޮޓެންހަމް ހޮޓްސްޕާސް އަދި އެތުލެޓިކޯ މެޑްރިޑް އެވެ. އިޓަލީގެ މީޑިއާ ރިޕޯޓްތައް ބުނާގޮތުގައި ލިވަޕޫލުން ވެސް އަންނަ ސީޒަނަށް ޓީމު ވަރުގަދަ ކުރަން ކުރާ މަސައްކަތުގައި ޑިބާލާ އަށް ބިޑްކުރުމުގެ ފުރުސަތު އެބައޮތެވެ.
އެކަމަކު، ލިވަޕޫލުން ޑިބާލާ އަށް ހުށަހަޅާނީ މިހާރު އެ ލިބެމުން އަންނަ މުސާރަ އަށް ވުރެ ކުޑަ އަދަދެއް ކަމަށް ރިޕޯޓްތައް ބުނެ އެވެ. މީގެ ކުރިން އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑުން ޑިބާލާގެ ސޮއި ހޯދުމާ ގާތަށް ޖެހިލި ނަމަވެސް މުސާރައިގެ ކަންކަމުގައި އެއްބަސްވުމަކަށް ނާދެވި އެ ޑީލް ހުއްޓުނީ އެވެ.
އަންނަ ސީޒަނަށް ލިވަޕޫލުން ގިނަ ޓްރާންސްފާތަކެއް ކުރާނެ ކަމަށް އެމެެރިކާ އާއި އިނގިރޭސި މީޑިއާތަކުން އަންނަނީ ރިޕޯޓްކުރަމުންނެވެ. ލިވަޕޫލުން އަންނަ ސީޒަނުގައި ފޯވާޑަށް ކުޅޭ އިތުރު ކުޅުންތެރިއަކަށް އިންވެސްޓްކުރާނެ ކަމަށް ރިޕޯޓްތައް ބުނާއިރު، ފާރަލަމުން އަންނަ ކުޅުންތެރިންގެ ލިސްޓުގެ އެންމެ ކުރީގައި އޮތް އެއް ނަމަކީ ޕޯޓޯ އަށް ކުޅޭ ކޮލަމްބިއާގެ ފޯވާޑް ލުއިޒް ޑިއާޒް އެވެ.
