މެޑްރިޑް (ޖެނުއަރީ 25) - ފްރާންސްގެ ޕީއެސްޖީގައި އާޖެންޓީނާގެ ތަރި ލިއޮނަލް މެސީ ދައްކަމުން އަންނަ ކުޅުމަށް ގިނަ ބަޔަކު ފާޑުކިޔަމުންދާތީ އޭނާގެ ދިފާއު ގައި ރެއާލް މެޑްރިޑްގެ ކެޕްޓަން ކަރީމް ބެންޒެމާ ވާހަކަ ދައްކައިފި އެވެ.
މި ސީޒަން ފެއްޓުމުގެ ކުރިން މެސީ، ސްޕެއިންގެ ބާސެލޯނާ ދޫކޮށް ފްރާންސްގެ ޕީއެސްޖީ އަށް ބަދަލުވީ ހިލޭ ޓްރާންސްފާއެއްގަ އެވެ. ޕީއެސްޖީ އަށް ބަދަލުވެ މެސީ މިހާތަނަށް އެ ޓީމަށް 16 މެޗު ވަނީ ކުޅެދީފަ އެވެ. އެ މެޗުތަކުގައި އޭނާ ހަ ގޯލު ޖަހައި ފަސް ގޯލް ޖަހަން އެހީތެރިވި އެވެ. އެ ހަ ގޯލުގެ ތެރެއިން ފަސް ގޯލު ކާީމިޔާބުކުރ ޗެމްޕިއަންސް ލީގުގަ އެވެ. މިހާތަނަށް ފްރެންޗް ލީގުގައި މެސީ އަށް ޖެހުނީ އެންމެ ގޯލެކެވެ.
ޕީއެސްޖީގައި އަދި ސަޕޯޓަރުން ބޭނުންވާ ފެންވަރުގެ ކުޅުމެއް މެސީ އަށް ނުދެއްކެ އެވެ. އެ ކަމާ ގިނަ ބަޔަކު ފާޑުކިޔަމުން އަންނައިރު، މެސީގެ ދިފާއުގައި ބައެއް ކުޅުންތެރިން އަންނަނީ ވާހަކަ ދައްކަމުންނެވެ. އޭގެ ތެރޭގައި މެސީގެ ވާދަވެރި، ރެއާލް މެޑްރިޑްގެ ކެޕްޓަން ވެސް ހިމެނެ އެވެ.
ބެންޒެމާ ބުނީ ސީޒަންގެ ކުރީކޮޅު މެސީ އަށް ލީގުގައި ގިނަ ގޯލްތަކެއް ނުޖެހުމުން އެކަމާ ހައިރާން ނުވާ ކަމަށެވެ. ކުރިން ފްރާންސް ލީގުގައި ލިޔޯނަށް ކުޅުނު ބެންޒެމާ ބުނީ އެ ލީގަކީ ސްޕެނިޝް ލީގާއި މުޅިން ތަފާތު ސްޓައިލެއްގެ ފުޓްބޯޅަ އެއް ކުޅޭ ލީގެއް ކަމަށެވެ. އެހެން ކަމުން ފްރާންސް ލީގަށް ހޭނެން މެސީ އަށް ވަގުތު ބޭނުންވާނެ ކަމަށް ބެންޒެމާ ގަބޫލުކުރެ އެވެ.
"މެސީ އެ ލީގަށް ހޭނެން ވަގުތު ބޭނުންވާނެ، އެއީ ގޯލު ނުޖެހިގެން އެ އުޅޭ ސަބަބަކީ، އެހެން ނަމަވެސް މެޗުގައި މެސީ ދައްކާ ކުޅުމަށް ބަލާއިރު ސުވާލު އުފައްދާނެ ޖާގަ އެއް ނެތް. ވަރަށް ރަނގަޅު ފެންވަރެއްގައި އޭނާ އަންނަނީ ކުޅެމުން" ބެންޒެމާ ބުންޏެވެ.
އަނިޔާގެ އެކި މައްސަލަތަކާއި ކޮވިޑްގެ ސަބަބުން މެސީ އަށް މި ސީޒަންގައި މެޗުތަކެއް ގެއްލިއްޖެ އެވެ. ކޮވިޑުން ރަނގަޅުވެ، އެންމެ ފަހުން ލީގުގައި ޕީއެސްޖީ ކުޅުނު މެޗުގައި މެސީ ކުޅުނީ ފަހު ތިރީހަކަށް މިނެޓެވެ.
ފްރާންސް ފުޓްބޯލް އިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބެލޮންޑިއޯ އެވޯޑް ހަތް ފަހަރު ހޯދާފައިވާ މެސީ ވަނީ ބާސެލޯނާގައި ހޭދަކުރި ދުވަސްތަކުގައި އެކުލަބާ އެކު 35 ތަށި އުފުލާލައިފަ އެވެ. ޕީއެސްޖީގެ ސަޕޯޓަރުންގެ އުންމީދަކީ މެސީއާ އެކު އެކުލަބުން އެންމެ ބޭނުންވާ ތަށި ކަމަށްވާ ޔުއެފާ ޗެމްޕިއަންސް ލީގު ހޯދުމެވެ. ޕީއެސްޖީ އަށް ހާސިލްނުކުރެވި އޮތް ބޮޑު ކާމިޔާބީ އަކީ އެއީ އެވެ.
