މެންޗެސްޓާ (ޖެނުއަރީ 22) - މެންޗެސްޓާ ސިޓީގައި އޭނާގެ މުސްތަގުބަލާ ބެހޭގޮތުން ގޮތެއް ނިންމުން ލަސްކޮށް އެ ކްލަބް އޮޅުވާލުމެއްގެ ތެރޭގައި ނުބަހައްޓާނެ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ކުރިން ބާސެލޯނާ އާއި ބަޔާން މިއުނިކްގެ ކޯޗަކަށް ހުރި ގާޑިއޯލާ ސިޓީއާ އެކު އެންމެ ފަހުން ސޮއިކުރި ކޮންޓްރެކްޓް އަންނަ ސީޒަނުގެ ނިޔަލަށް ހަމަވާނެ އެވެ.
ކޮންޓްރެކްޓްގެ ފަހު އަހަރު ފަށަން އުޅުނު ކަމުގައި ވިޔަސް ގާޑިއޯލާ ބުނީ މި ވަގުތު އަދި ވިސްނަނީ ސިޓީގައި ކުރަން ހުރި މަސައްކަތަށް ކަމަށެވެ. އަދި އެ ޓީމަށް ފަހު ދެން ހަދާނެ ގޮތަކާ މެދު އަދި ހިޔާލެއް އަދި ނުކުރާ ކަމަށް ގާޑިއޯލާ ވަނީ ބުނެފަ އެވެ.
"އެ މީހުން (ސިޓީން) އަހަންނަށް ބުނިހާ ކަމެއް އެބަކޮށްދޭ. އެ މީހުންނަށް އޮޅުވާލައިގެން ކަމެއް ނުކުރާނަން. އެ މީހުންނަށް ދެރަވާނެ ގޮތެއް ވެސް އަހަރެން ނުހަދާނަން. އެއީ އެ ފަދަ ކަމެއް އަހަރެން ކޮށްފިނަމަ އެއީ އަހަރެން ކުރާނެ ވަރަށް ގޯސް ކަމެއް،" ގާޑިއޯލާ ބުންޏެވެ.
ސިޓީގެ ކޯޗުކަމާ ހަވާލުވި ފަހުން ދެ ފަހަރެއްގެ މަތިން ކޮންޓްރެކްޓް އާ ކުރިއިރު ވެސް ހުރިހާ މަޝްވަރާތަކެއް ދިޔައީ ވަރަށް ދެފުށް ފެންނަ ގޮތަކަށް ދެބަސްވުމެއް ނެތި ކަމަށާއި ކުރިއަށް އޮތްތަނުގައި ވެސް އެ ގޮތަށް ކަންތައް ހިނގާނެ ކަމަށް ގާޑިއޯލާ އުއްމީދުކުރެ އެވެ.
ގާޑިއޯލާ ބުނީ އޭނާ އަކީ އެއްވެސް އިރެއްގައި ޓީމެއްގެ ކޯޗަކަށް ހުންނައިރު، އެ ޓީމެއް ގޮވައިގެން މާ ދުރަށް ވިސްނާނެ މީހެއް ނޫން ކަމަށެވެ. އެއީ މިހާރު ފުޓްބޯޅައިގެ މާހައުލު އޮތްގޮތުން ނަތީޖާ ނުނެރެވޭ ހާލަތެއް އައިސްފިނަަމަ ކޯޗަކު ޓީމަކުން ވަކިކުރަން މާ ވަގުތެއް ނުނަގާނެކަން ފެންނަ މަންޒަރުން ސާފުވާ ކަމަށް ގާޑިއޯލާ ވަނީ ބުނެފަ އެވެ.
ސިޓީގެ ކޯޗުކަމާ 2016 ވަނަ އަހަރު ހަވާލުވި ގާޑިއޯލާ ވަނީ އެ ޓީމާ އެކު ތިން ފަހަރު ޕްރިމިއާ ލީގާއި ހަތަރު ލީގު ކަޕް އަދި އެފްއޭ ކަޕް ޗެމްޕިއަންކަން ހޯދައިފަ އެވެ. މި ފަހަރުގެ ޕްރިމިއާ ލީގު ކާމިޔާބު ކުރާނެ ފޭވަރިޓެއްގެ ގޮތުގައި ވެސް އޮތީ ސިޓީ އެވެ. ލީގުގެ އެއް ވަނައިގައި ސިޓީ އޮތީ 11 ޕޮއިންޓުގެ ލީޑަކާ އެކު އެވެ.
ލީގުގައި މިރޭ ސިޓީ ކުޅޭ މެޗުގައި ރާއްޖެ ގަޑިން 22:30 ގައި ނުކުންނާނީ ސައުތެމްޓަނާ ދެކޮޅަށެވެ.
