މިލާން (ޖެނުއަރި 20) - އެމްޕޯލީ އަތުން ބަލިވާން ދަނިކޮށް ފަހު ވަގުތު ސްޓެފާނޯ ސެންސީ ގޯލެއް ޖަހައި އިންޓަ މިލާނަށް ކޮޕަ އިޓާލިއާގެ ކުއާޓާ ފައިނަލުން ޖާގަ ހޯދައިދީފި އެވެ.
އެމްޕޮލީ އަތުން އިންޓަ މޮޅުވީ 3-2 އިންނެވެ.
އިންޓަ ހިމެނޭ ގޮތަށް އިޓާލިއަން ކަޕް ކުއާޓަ ފައިނަލުން ރޯމާ ފިޔަވާ ބޮޑެތި ހުރިހާ ޓީމެއްވަނީ ޖާގަ ހޯދާފަ އެވެ. މިގޮތުން މުބާރާތުގެ އެންމެ ކާމިޔާބު ޓީމު، ޔުވެންޓަސް، އެޓަލާންޓާ، ލާޒިއޯ އަދި އޭސީ މިލާން ވެސް ވަނީ ގަދަ އަށް ޓީމުގެ ތެރޭގައި ހިމެނިފަ އެވެ.
އެމްޕޯލީ އަތުން ރޭ މޮޅުވި މެޗުގެ ފުރަތަމަ ގޯލް ޖެހީ ވެސް އިންޓަ އިންނެވެ. މި ގޯލު މެޗުގެ 13 ވަނަ މިނިޓްގައި ޖަހައިދިނީ މި ސީޒަންގަައި ރަނގަޅު ފޯމެއްގަ ހުރި ފޯވާޑް އަލެކްސިސް ސަންޗޭޒް އެވެ. ފުރަތަމަ ހާފުގައި އިންޓަ އިން ރަނގަޅު ކުޅުމެއް ދެއްކިއިރު، ކީޕަރު އަންދްރޭ ރަޑޫ ވަނީ އެމްޕޯލީގެ ފޯވާޑުން ފޮނުވާލި ރަނގަޅު ހަމަލާތަކެއް ދިފާއުކޮށްފަ އެވެ.
އެމްޕޯލީން އެ ޓީމުގެ ފުރަތަމަ ގޯލް ޖެހީ ދެ ވަނަ ހާފުގަ އެވެ. ނަދީމް ބަޖްރާމީގެ ގޯލުން އެއްވަރު ކުރި ފަހުން ގާތްގާތުގައި އެ ޓީމުން ހަމަލާތައް އުފެއްދި އެވެ. ނަތީޖާއެއްގެ ގޮތުން އިންޓަގެ ގޯލް ކީޕަރު ރަޑޫ އަތުން ބައިކޮޅަށް ގޯލެއް ވަދެ އެމްޕޯލީ އަށް ލީޑް ލިބުނެވެ. މެޗުގެ ބާކީ ވަގުތު ކޮޅު އެޓީމުން ކުޅުނީ ޑިފެންސަށް ބޮޑު އިސްކަމެއް ދީގެންނެވެ.
ގޯލެއް ޖެހުމަށް ކުރިއަށް ޖެހިގެން ކުޅުނު އިންޓަގެ މަސައްކަތް ކާމިޔާބުވީ މެޗުގެ 90 މިނެޓު ހަމަވެގެން ދެއްކި އިތުރު ވަގުތުގަ އެވެ. މި ގޯލް ޖަހައިދިނީ އަންދްރޭ ރަނޮކިއާ އެވެ. އެންމެ ފަހުން ރަނޮކިއާ އިންޓަ މިލާނަށް ގޯލެއް ޖަހައިދިނީ މީގެ ދެ އަހަރު ކުރިންނެވެ. އެއީ ވެސް އިޓާލިއަން ކަޕްގެ މެޗެއްގަ އެވެ.
ފުރިހަމަ ވަގުތުގައި ނަތީޖާ ހަމަހަމަވުމުން ނަތީޖާ ނެރުމަށް އިތުރު ވަގުތުގެ ދެ ހާފް ކުޅެން ޖެހުނެވެ. އިންޓަ މެޗުން މޮޅުވީ އިތުރު ވަގުތުގެ ފުރަތަމަ ހާފުގަ ސެންސީ ޖެހި ގޯލުންނެވެ.
އިންޓަ، އިޓާލިއަން ކަޕްގެ ކުއާޓާގައި ނުކުންނާނީ ރޯމާ އާއި ލެޗޭ ވާދަކުރާ މެޗުން މޮޅުވާ ޓީމަކާ ދެކޮޅަށެވެ.
