ޔައުންޑޭ، ކެމަރޫން (ޖެނުއަރީ 20) - އެފްރިކަން ކަޕް އޮފް ނޭޝަންސްގައި ރޭ ސޫދާން 1-0 އިން ބަލިކޮށް މިސްރުން މުބާރާތުގެ ދެ ވަނަ ބުރުގެ ޖާގަ ޔަގީންކޮށްފި އެވެ.
މިސްރު ހިމެނޭ ގްރޫޕް ޑީގެ އެއް ވަަނަ ދިޔައީ ކުޅުނު ތިން މެޗުން ވެސް މޮޅުވި ނައިޖީރިއާ އެވެ. ރޭ ގިނީ ބިސާއު އަތުން 2-0 އިން މޮޅުވި ނައިޖީރިއާ ނުވަ ޕޮއިންޓާ އެކު ނިންމާލިއިރު، މިސްރަށް ވަނީ ހަ ޕޮއިންޓް ލިބިފަ އެވެ. ތިން ވަނައިގައި ނިންމާލި ސޫދާނާއި ފުލުގައި އޮތް ގިނީ ބިސާއު އަށް ލިބުނީ އެއް ޕޮއިންޓެވެ.
މިސްރު ޓީމަށް ރޭގެ މެޗުގެ ހަމައެކަނި ގޯލު ޖަހައިދިނީ މެޗުގެ 35 ވަނަ މިނިޓްގައި އަބްދުﷲ އަލް ސައީދު ނެގި ކޯނަރަކުން މުހައްމަދު އަބްދުލްމޯނެމް އެވެ. ވެއްޓިގެންފައި އަބްދުލްމޯނެމް ބޮލުން ޖެހި ބޯޅަ އަމާޒުވީ ގޯލުގެ މަތީ ދާގަނޑަށެވެ. މިސްރުގެ ކެޕްޓަން މުހައްމަދު ސަލާހަށް ވަނީ އެ ޓީމަށް ގޯލެއް ޖަހައިދޭން ރަނގަޅު ފުރުސަތު ލިބިފަ އެވެ. އެކަމަކު، ސޫދާން ޑިފެންޑަރުން ވަނީ މި މެޗުގައި ސަލާހު ހުއްޓުވުމުގައި ކާމިޔާބު ހޯދައިފަ އެވެ.
ފުރަތަމަ މެޗުން ނައިޖީރިއާ އަތުން މިސްރު ބަލިވި ނަމަވެސް ދެން ކުޅުނު ދެ މެޗުން އެ ޓީމު މި ވަނީ މޮޅުވެފަ އެވެ.
ނައިޖީރިއާ އިން ރޭގެ މެޗުގައި ގޯލުތައް ޖެހީ އުމަރު ސޯދިގު މިސްބާހާއި ވިލިއަމް ޓްރޫސްޓް-އެކޯން އެވެ. މި ދެ ގޯލު ވެސް ޖެހީ ދެ ވަނަ ހާފުގަ އެވެ. މި މެޗަށް ނުކުތްއިރު ވެސް ނައިޖީރިއާ އަށް ދެ ވަނަ ބުރު ކަށަވަރުވެފައި އޮތުމުން އެ ޓީމުން ކުޅުނީ ގިނަ ބަދަލުތަކެއް ގެނެސްގެންނެވެ.
މުބާރާތުގެ ގަދަ 16 ޓީމު ކުޅޭ ބުރުން ޖާގަ ހޯދާފައިވާ ޓީމްތަކަކީ ބުރްކީނާ ފާސޯ، ގެބޮން، ނައިޖީރިއާ، ސެނެގޯލް، ގިނީ، ކެމަރޫން، މޮރޮކޯ، މިސްރު، ކޭޕް ވާޑޭ އަދި މަލާވީ އެވެ. ބާކީ ޖާގަތައް މިރޭގެ މެޗުތަކަށް ފަހު ކަށަވަރުވާނެ އެވެ.
