މެޑްރިޑް (ޖެނުއަރީ 19) - ރެއާލް މެޑްރިޑްގެ އެންމެ މަޝްހޫރު ކުޅުންތެރިންގެ ތެރޭގައި ހިމެނޭ އެ ޓީމުގެ ކުރީގެ ތަރި ފްރެންސިސްކޯ ހެންޓޯ މަރުވެއްޖެ އެވެ.
ހެންޓޯ މަރުވިއިރު، އުމުރަކީ 88 އަހަރެވެ. ހެންޓޯ އަކީ ރެއާލް މެޑްރިޑްގެ އެންމެ ކާމިޔާބު ދުވަސްތަކުގައި އެކުލަބަށް ކުޅުނު ކުޅުންތެރިއެކެވެ. އެ ގޮތުން 1953 އިން 1971 ވަނަ އަހަރާއި ހަމައަށް އޭނާ ރެއާލް މެޑްރިޑަށް 600 އަށް ވުރެ ގިނަ މެޗު ކުޅެދިނެވެ.
ހެންޓޯ މަޝްހޫރުވެފަ ވަނީ ޔޫރަޕްގެ އެންމެ މަތީ ފެންވަރުގެ މުބާރާތުގެ ތަށި އެންމެ ގިނައިން ހޯދި ކުޅުންތެރިޔާގެ ގޮތުގަ އެވެ. މިގޮތުން އޭނާ ވަނީ ޔޫރަޕިއަން ކަޕް (ޗެމްޕިއަންސް ލީގު)ގެ ތަށި ހަ ފަހަރު ކާމިޔާބު ކޮށްފަ އެވެ. އޭގެއިން ކޮންމެ ފަހަރަކު ވެސް އޭނާ އެކަން ހާސިލްކުރީ ރެއާލްގެ ކުޅުންތެރިއެއްގެ ގޮތުގައި ހުރެ އެވެ.
ހެންޓޯ، ރެއާލާ އެކު ހޯދާފައިވާ ބައެއް ތަށްޓާ އެކު ފޮޓޯ އަކަށް ހުއްޓިގެން.
ރެއާލްގެ އެންމެ މަޝްހޫރު ލެޖެންޑުންގެ ތެރޭގައި ހިމެނޭ އަލްފްރެޑޯ ޑި ސްޓެފާނޯ، ފްރެންކް ޕުސްކަސް އަދި ރޭމަންޑް ކޮޕާއާ އެކު ހެންޓޯ ކުޅުނު ދުވަސްވަރަކީ ޔޫރަޕްގަ ރެއާލްގެ އެންމެ ވިދުންގަދަ ދުވަސްވަރެވެ. އެ ކްލަބްގެ ތާރީހުގެ ބޮޑުބައި ހާއްސަވަނީ އެ ދުވަސްވަރު ހޯދި ކާމިޔާބީ އަށެވެ.
މެދުނުކެނޑި 18 އަހަރު ރެއާލް އަށް ކުޅުނު ހެންޓޯ ވަނީ އެކުލަބާ އެކު 12 ފަހަރު ސްޕެނިޝް ލީގުގެ ޗެމްޕިއަންކަން ހޯދާ ދެ ފަހަރު ކޮޕަ ޑެލްރޭ ވެސް އުފުލާލައިިފަ އެވެ.
ސްޕެއިންގެ ގައުމީ ޓީމަށް 1962 އަދި 1966 ވަނަ އަހަރުގެ ވޯލްޑް ކަޕްގައި ޚެންޓޯ ކުޅުނެވެ. ގައުމީ ޖޯޒީގައި ސްޕެއިން ޓީމަޑް ހެންޓޯ ވަނީ 43 މެޗު ކުޅެދީފަ އެވެ.
ހެންޓޯ މަރުވުމާ ގުޅިގެން ރެއާލުން ނެރުނު ބަޔާނެއްގަ ބުނެފަވަނީ އެ ކްލަބްގެ އެންމެ ތާރީހީ ކާމިޔާބީތަކުގައި ހިއްސާވި އެއް ކުޅުންތެރިޔާގެ މަރުވުމުގެ ހިތާމައިގަ ބައިވެރިވާ ކަމަށެވެ. އަދި މިއީ މުޅި ރެއާލްގެ ސަޕޯޓަރުންނަށް ވެސް ހިތާމަވެރި ހިތްދަތި ދުވަހެއް ކަމަށް ބަޔާނުގައި ރެއާލުން ބުނެފައިވެ އެވެ.
