ގެރުއާ، ކެމަރޫން (ޖެނުއަރީ 19) - އެފްރިކަން ކަޕް އޮފް ނޭޝަންސް (އެފްކޮން)ގައި އަލަށް ވާދަކުރާ ކޮމޮރޯސް އަތުން ބަލިވެ މުބާރާތް ހަތަރު ފަހަރު ކާމިޔާބުކޮށްފައިވާ ގާނާ ކަޓައިފި އެވެ.
މުބާރާތުގެ ގްރޫޕް ސީގެ ފަހު މެޗުތައް ރޭ ކުޅުނުއިރު ވަރުގަދަ ގާނާ އަށް ދެ ވަނަ ބުރުގެ އުއްމީދެއް އޮތީ ކޮމޮރޯސް އަތުން މޮޅުވެގެންނެވެ. ނަމަވެސް އެންމެން ހީކުރި ގޮތާ ޚިލާފަށް މި މެޗުން ގާނާ ބަލިވީ އެވެ. ގާނާ 3-2 އިން ބަލިވި މި މެޗަކީ މުބާރާތުގެ ތާރީޚުގައި ވެސް އެންމެ ގިނަ ބަޔަކަށް ހައިރާންކަން ގެނުވި އެއް ނަތީޖާ އަށް ވާނެ އެވެ.
މި މެޗުގެ ފެށުން ވެސް ގާނާ އަށް ދިޔައީ ގޯސްކޮށެވެ. މިގޮތުން ކޮމޮރޯސް އިން މެޗުގެ އަށް ވަނަ މިނެޓުގަ ގޯލެއް ޖަހައި ލީޑު ނެގި އެވެ. މި ގޯލު އެ ޓީމަށް ޖަހައިދިނީ ބެން ނަބުހާން އެވެ. އޭގެ ފަހުން ގާތް ގާތުގަ ގާނާ އިން ދެ ހަމަލާއެއް ފޮނުވާލި ނަމަވެސް ދެ ހަަމަލާ ވެސް ކޮމޮރޯސް ކީޕަރު ސާލިމް ބެން ބޮއިނާ ވަނީ މަތަކޮށްފަ އެވެ.
މެޗުގައި ގާނާ އަށް އިތުރު މައްސަލަތަކެއް ދިމާވީ ކެޕްޓަން އަންދްރޭ އަޔޫ އަށް މެޗުގެ 25 ވަނަ މިނެޓުގަ ރަތް ކާޑު ދެއްކި ހިސާބުން ނެވެ. ކޮމޮރޯސްގެ ކީޕަރު ސާލިމް ދިފާއުކުރި ބޯޅަ ދެ ވަނަ ފަހަރަށް ފޮނުވާލަން އުޅުމުގެ ތެރޭގައި ކުރި ފައުލަށް ރެފްރީ ރަތް ކާޑު ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް) ބެލުމަށްފަހުގަ އެވެ. މި ހާދިސާ އަށް ފަހު ކޮމޮރޯސްގެ ކީޕަރު ސާލިމް އަށް އަނިޔާވެ ބަދަލުކުރަން ވެސް ޖެހުނެވެ.
ދިހަ ކުޅުންތެރިންނާ އެކު ކުޅުނު ނަމަވެސް ގާނާ އިން ފުރަތަމަ ހާފުގެ ބާކީ ވަގުތުކޮޅުގައި ވެސް ރަނގަޅު ހަމަލާތަކެއް އުފެއްދި އެވެ. މިގޮތުން ތޯމާސް ޕާޓޭ ފޮނުވާލި ހިލޭ ޖެހުން ގޯލާ އަމާޒު ނުވެ ބޭރަށް ދިޔައިރު، އޭގެ ދެ މިނެޓު ފަހުން އޭރިއާ ބޭރުން ފޮނުވާލި ހަމަލާ ކީޕަރު އަލީ އަހަަމަދާ ދިފާއުކުރި އެވެ. މެޗުގެ ބާކީ ކުޅެން ޖެހުނު ގާނާ ކޮޅަށް ކޮމޮރޯސްގެ ދެ ވަނަ ގޯލު ޖަހައިދިނީ ދެ ވަނަ ހާފުގައި އަހުމަދު މޮގްނީ އެވެ. އޭގެ ތިން މިނެޓު ފަހުން ލިބުނު ކޯނަރަކުން ގާނާ އިން ގޯލެއް ޖަހަައި އުއްމީދު ދެމެހެއްޓި އެވެ. މި ގޯލް ޖަހައިދިނީ ރިޗްމޮންޑް ބޮއާކޭ އެވެ.
މެޗުގެ 77 ވަނަ މިނެޓުގައި ގާނާ އިން އެ ޓީމުގެ ދެވަނަ ގޯލު ޖަހާ ނަތީޖާ ހަމަހަމަކުރި އެވެ. މިއީ ވެސް ލިބުނު ކޯނަރަކުން ޖެހި ގޯލެކެވެ. ދުނިޔޭގެ 132 ވަނައިގަ ރޭންކް ކުރެވިފައި އޮތް ކޮމޮރޯސް އިން ގާނާގެ ސަޕޯޓަރުން ރޮއްވާލީ މެޗު ނިމެން ފަސް މިނެޓަށްވެފައި ވަނިކޮށް ޖެހި ގޯލުންނެވެ. މި ގޯލް ވެސް ޖަހައިދިނީ ދެވަނަ ގޯލް ޖެހި މުގްނީ އެވެ.
މި ނަތީޖާއާ އެކު ގާނާ ކުޅުނު ތިން މެޗުން އެންމެ ޕޮއިންޓަކާ އެކު މުބާރާތް ނިންމާލަން ޖެހުނުއިރު ކޮމޮރޯސް އަށް ލިބުނީ ގްރޫޕްގެ ތިންވަނަ އެވެ. ތިން ޕޮއިންޓާ އެކު ކޮމޮރޯސް އަށް ދެ ވަނަ ބުރުގެ ފުރުސަތު އަދި އެބައޮތެވެ. ހުރިހާ ގްރޫޕެއްގެ ތިން ވަނަ އަށް ދާ ޓީމުތަކުގެ ތެރެއިން އެންމެ ރަނގަޅު ނަތީޖާ ހޯދި ޓީމްތަކުގެ ތެރޭގައި ހިމެނިއްޖެނަމަ އެޓީމަށް ދެ ވަނަ ބުރުގެ ޖާގަ ލިބޭނެ އެވެ.
މި ގްރޫޕްގެ އެއް ވަނަ އަދި ދެ ވަނަ ހޯދީ މޮރޯކޯ އާއި ގެބޮން އެވެ. މި ދެ ޓީމް ރޭ ކުޅުނު މެޗު ނިމުނީ 2-2 އިން އެއްވަރުވެގެންނެވެ. މޮރޮކޯ އަށް އެއް ވަނަ ހަތް ޕޮއިންޓާ އެކު ލިބުނުއިރު، ގެބޮން އަށް ލިބުނީ ފަސް ޕޮއިންޓެވެ.
މުބާރާތުގެ ދެ ވަނަ ބުރުން ޖާގަ ހޯދި އެހެން ޓީމްތަކަށް ބަލާއިރު، ސެނެގާލް ވަނީ ގްރޫޕް ބީގެ އެއްވަނަ ޓީމްގެ ގޮތުގައި ދެވަނަ ބުރުން ޖާގަ ހޯދާފަ އެވެ.
ފޯރިގަދަކޮށް ދިޔަ އެ ގްރޫޕްގެ ދެ ވަނަ ހޯދީ ފަހު މެޗުގަ ޒިންބާބްވޭ އަތުން ބަލިވި ގިނީ އެވެ. ގިނީ އަށް ހަތަރު ޕޮއިންޓް ލިބުނުއިރު، ތިން ވަނަ އަށް ދިޔަ މަލާވީ އަށް ވެސް ލިބުނީ ހަތަރު ޕޮއިންޓެވެ. ގިނީ އަށް ކުރި ލިބެނީ ހެޑް-ޓު-ހެޑް ގަވާއިދަށް ބަލާއިރު ކުރި ލިބޭތީ އެވެ. ގްރޫޕްގެ ފުލަށް ދިޔައީ ތިން ޕޮއިންޓާ އެކު ޒިމްބާބްވޭ އެވެ.
މުބާރާތުގެ ދެ ވަނަ ބުރުން ޖާގަ ހޯދާފައިވާ ޓީމްތަކަކީ ބުރްކީނާ ފާސޯ، ގެބޮން، ނައިޖީރިއާ، ސެނެގޯލް، ގިނީ، ކެމަރޫން އަދި މޮރޮކޯ އެވެ.
