ޤައުމީ ވޮލީބޯޅަ ޓީމާއި ޓޭބަލް ޓެނިސް ޓީމް ކުޅޭ ބައިނަލްއަޤްވާމީ މެޗުތަކަށް ސޯސްލް އިންޑޯ ހޯލް ބޭނުންވާތީ ބާސްކެޓްބޯޅަ ސީޒަންގެ ފެށުން ފަސްކުރަން މަޖުބޫރުވެއްޖެ އެވެ.
މި އަހަރުގެ ބާސްކެޓްބޯޅަ ސީޒަން ފަށަން އޮތީ އަންނަ މަހުގެ އެއް ވަނަ ދުވަހުގަ އެވެ. ސީޒަން ފަށަން ނިންމާފައި އޮތީ ފެބްރުއަރީ 1 އިން މާޗް 16 ހަމައަށް ކުރިއަށް ގެންދިޔުމަށް ހަމަޖެހިފައިވާ އެމްބީއޭ ކަޕުންނެވެ.
ބާސްކެޓްބޯޅަ ސީޒަން ފެށުން ފަސް ކުރަން ޖެހުނީ އަންނަ މަހުގެ 6-12 އަށް ރާއްޖޭގެ ޤައުމީ ވޮލީބޯޅަ ޓީމާއި ބަންގްލަދޭޝްގެ ވޮލީބޯޅަ ޓީމް ކުޅެން ހަމަޖެހިފައިވާ އެކުވެރިކަމުގެ މެޗުތަކާއި، މާޗް މަހުގެ 20-11 އަށް ބޭއްމުވަށް ހަމަޖެހިފައިވާ ސައުތު އޭޝިއަން ޖޫނިއާ ޓޭބަލް ޓެނިސް ޗެމްޕިއަންޝިޕްގެ މެޗުތަކަށް އިންޑޯ ހޯލް ދޫކޮށްލަން ޖެހުމުންނެވެ.
އަހަރު ފެށުމުގެ ކުރިން އިންޑޯ ހޯލް ކުރިއަށް އޮތް ދެ މަހަށް ދޫކޮށްފައިވަނީ ބާސްކެޓްބޯޅަ އެސޯސިއޭޝަނަށެވެ. ނަމަވެސް ވޮލީބޯޅަ ޤައުމީ ޓީމުގެ އެކުވެރިކަމުގެ މެޗުތަކެއް މާލޭގައި ކުޅެން ނިންމި ހިސާބުން ސީޒަންގެ ފެށުން ލަސް ކުރަން އެމްބީއޭއަށް މަޖުބޫރުވީ އެވެ.
މޯލްޑިވްސް ބާސްކެޓްބޯޅަ އެސޯޯސިއޭޝަން (އެމްބީއޭ)ގެ މުޙައްމަދު އާދަމް (އެޑަމް)، "އަދަދު" އަށް ވިދާޅުވީ އެމްބީއޭ ކަޕަކީ އަބަދުވެސް ޒުވާން ގިނަ ކުޅުންތެރިންތަކަކަށް ގިނަ ފުރުސަތުތަކެއް ލިބޭ މުބާރާތަކަށްވުމާ އެކު އެންމެ ފަހު ވަގުތާއި ހަމައަށް ޝެޑިއުލްއަށް ބަދަލު ގެނެސް މުބާރާތް ބޭއްވޭތޯ މަސައްކަތް ކުރި ކަމަށެވެ. ނަމަވެސް އިތުރު ގޮތެއް ނެތުމުން މުބާރާތް އަންނަ މަހު ނުބާއްވަން ނިންމީ އެވެ.
"އަޅުގަނޑުމެންގެ އެންމެ ފަހު ވަގުތަށްވެސް މަސައްކަތް މިކުރީ ޝެޑިއުލްއަށް އެޑްޖަސްޓްމަންޓެއް ގެނެސްގެން މުބާރާތް ބޭއްވޭތޯ. އެކަމަކު، ވޮލީބޯޅަ މެޗުތަކާއި ޓީޓީ މުބާރާތާއި ދޭތެރޭ އަޅުގަނޑުމެންނަށް އެކަށީގެންވާ ދުވަސްތަކެއް ނުލިބޭ މުބާރާތް ބާއްވާކަށް. އެހެންވެ އެންމެ ފަހު ވަގުތު ކެންސަލްކުރަން ނިންމީ"
އެޑަމް ވިދާޅުވީ އެމްބީއޭ ކަޕަކީ ގިނަ އާ ކުޅުންތެރިންތަކެއް ވެސް ފެންނަ މުބާރާތެއް ކަމަށާއި، މި މުބާރާތް ކެންސަލް ކުރަން ޖެހުމުން ޒުވާން ކުޅުންތެރިންނަށް ވެސް ފުރުސަތު ލިބޭ މުބާރާތެއް މި އަހަރުގެ ތެރޭގައި ބޭއްވުމަށް އެކްސްކޯއާ އެކު މަޝްވަރާ ކުރެވުން އަންނަކަމަށެވެ.
ސޯޝަލް ސެންޓަރުގެ އިންޑޯ ހޯލަކީ ހަތަރު ކުޅިވަރެއްގެ މުބާރާތްތައް ކުރިއަށްގެންދަން އޮތް ހަމައެކަނި ތަނެވެ. އެއީ ބާސްކެޓް، ވޮލީ، ނެޓްބޯޅަ އަދި ޓޭބަލް ޓެނިހެވެ. މި ހަތަރު ކުޅިވަރުން މުބާރާތްތައް ބާއްވަނީ އަހަރުގެ އެކި ދުވަސްތަކަށް ބަހާލައިގެންނެވެ.
