ޓިއުރިން (ޖެނުއަރީ 16) - އިޓާލިއަން ލީގުގައި ރޭ އުދިނޭޒީ ކޮޅަށް ގޯލު ޖެހުމަށް ފަހު ޔުވެންޓަސްގެ ކެޕްޓަން ޕައޮލޯ ޑިބާލާ އުފާފާޅުނުކޮށް އެ ޓީމުގެ މެނޭޖްމަންޓަށް މެސެޖެއް ދީފި އެވެ.
އުދިނޭޒީ އަތުން ޔުވެންޓަސް 2-0 އިން މޮޅުވި މެޗުގައި އެ ޓީމުގެ ފުރަތަމަ ގޯލު ޖެހީ ޑިބާލާ އެވެ. މެޗުގެ 19 ވަނަ މިނިޓްގައި އުދިނޭޒީ އޭރިއާތެރެއިން ޑިބާލާ އަށް ލިބުނު ބޯޅަ ގޯލުގެ މަތީ ކަނަށް އަމާޒުކޮށްލުމަށް ފަހު، އޭނާ އުފާފާޅުނުކުރެ އެވެ. އޭގެ ބަދަލުގައި އޭނާ ބަލާލީ ޔުވެންޓަސްގެ ދަނޑުގައި އެ ކްލަބްގެ މެނޭޖްމަންޓާއި ބޯޑް މެމްބަރުން ތިބޭ ވީއައިޕީ ބޮކްސާ ދިމާލަށެެވެ.
އިޓަލީގެ މީޑިއާތަކުން ސިފަކުރާގޮތުގައި މިއީ ޑިބާލާ ދިން މެސެޖެކެވެ. މި ސީޒަނުގެ ނިޔަަލަށް ޑިބާލާ ޔުވެންޓަސްގެ ކޮންޓްރެކްޓްގައި ހުރިއިރު، އޭނާ ބޭނުންވާ މުސާރަ ދީފައި ޓީމުގައި މަޑުކުރުވަން ޔުވެންޓަސް އިން އަންނަނީ ދެކޮޅު ހަދަމުންނެވެ. އާ ކޮންޓްރެކްޓެއް ނުދީފިނަމަ ހިލޭ ޓްރާންސްފާއެއްގައި ޑިބާލާ ބޭނުން ޓީމަކަށް ބަދަލުވުމުގެ އިހުތިޔާރު އޮންނާނެ އެވެ.
ރިޕޯޓްތައް ބުނާގޮތުން ދާދި ފަހުން ޔުވެންޓަސް އިން 2025 ވަނަ އަހަރާ ހަމައަށް ޑިބާލާ އަށް އާ ކޮންޓްރެކްޓެއް ދިނީ މިހާރު ދެމުން އަންނަ މުސާރަ އަށް ވުރެ ކުޑަ އަދަދަކަށް އެއްބަސްވުމަށެވެ އެކަމަކު، ޑިބާލާ ބޭނުންވަނީ ކުރިން ލިބެމުން އައި މުސާރަ އަށް ވުރެ ބޮޑު އަދަދެކެވެ. ޑިބަލާ މި ވަގުތު ޔުވެންޓަސްގެ ކޮންޓްރެކްޓްގައި ހުރީ އަހަރަކު 16 މިލިއަން ޑޮލަރު ލިބޭ ގޮތަށެވެ.
ޑިބާލާގެ އަނިޔާގެ މައްސަލަތަކާ ހެދި ސީޒަނެއްގައި އޭނާ އަށް ގިނަ މެޗުތަކެއް ގެއްލޭތީ މުސާރަ ބޮޑުކުރަން ޔުވެންޓަސް އިން އަންނަނީ ދެކޮޅު ހަދަމުންނެވެ. އެހެންވެ، މިއީ ޑިބާލާ، 28، ޔުވެންޓަސް ޖޯޒީގައި ފެންނަ ފަހު ސީޒަނަށް ވުމުގެ ފުރުސަތު އެބައޮތެެވެ.
ރޭ އުދިނޭޒީއާ ދެކޮޅަށް ކުޅުނު މެޗުގެ ދެ ވަނަ ހާފުގައި ޔުވެންޓަސްގެ ދެ ވަނަ ގޯލު ޖެހީ ވެސްޓަން މެކްކެނީ އެވެ. ބަދަލެއްގެ ގޮތުގައި ކުޅެން އެރި މަޓިއާ ޑި ޝީލިއޯ ނެގި ހުރަހަކުން މެކްކެނީ މި ގޯލު ޖެހީ ބޮލުންނެވެ.
އިޓާލިއަން ލީގުގައި އެންމެ ފަހުން ކުޅުނު އަށް މެޗުން ވެސް ޔުވެންޓަސް ބަލިވެފައިނުވާއިރު، ރޭގެ މޮޅާ އެކު އެ ޓީމު އޮތީ 22 މެޗުން ލިބުނު 41 ޕޮއިންޓާ އެކު ލީގުގެ ފަސް ވަނައިގަ އެވެ. އެއީ 20 މެޗުން 41 ޕޮއިންޓް ހަމަކޮށް ހަތަރު ވަނައިގައި އޮތް އެޓަލަންޓާއާ އެއްވަރަށް ޕޮއިންޓް ހޯދައިގެންނެވެ. ވިހި މެޗުން 49 ޕޮއިންޓް ހޯދައިގެން އެއް ވަނައިގައި އޮތީ އެންމެ ފަހުގެ ޗެމްޕިއަން އިންޓަ މިލާނެވެ. ދެ ވަނައިގައި އޮތީ 21 މެޗުން 48 ޕޮއިންޓް ހޯދާފައި އޮތް އޭސީ މިލާނެވެ. ތިން ވަނައިގައި އޮތް ނަޕޯލީން 43 ޕޮއިންޓް ހޯދީ 21 މެޗު ކުޅެގެންނެވެ.
