ރާއްޖޭގެ ބީޗްވޮލީބޯޅައިގެ ފެންވަރު ހުރީ އޭނާ އަށް ކަމުދާ ލެވަލެއްގައި ކަމަށާއި ރާއްޖޭން ކުރިއަށްދާން ބަލާއިރު، ރަނގަޅު މިސްރާބެއްގައި ދެމިހުރެ، އެކުގައި ގިނަ ވަގުތު މަސައްކަތް ކުރަންޖެހޭ ކަމަށް ގައުމީ ބީޗްވޮލީބޯޅަ ޓީމުގެ އާ ކޯޗު ބްރެޒިލްގެ ވިނީޝިއުސް މާޓިން ޖިއޯނީ ބުނެފި އެވެ.
ހުޅުމާލެ ރެޑްބުލްޕާކް ބީޗްވޮލީބޯޅަ ކޯޓުގައި އިއްޔެ ހަވީރު ވިނީޝިއުސް ވަނީ އޭނާގެ ފުރަތަމަ ޓްރެއިނިން ސެޝަން ސީނިއާ ބީޗްވޮލީބޯޅަ ކުޅުންތެރިންނަށް ކުރިއަށް ގެންގޮސްފަ އެވެ.
އިއްޔެގެ ޓްރެއިނިންގައި ބައިވެރިވީ ދާދި ފަހުން ގައުމީ ބީޗްވޮލީބޯޅަ މުބާރާތް ކާމިޔާބުކުރި އަހުމަދު މުހައްމަދު (ކޯކޭ) އާއި މުހައްމަދު އަލީ (ޑެންޒޯ)ގެ ޕެއާގެ އިތުރުން އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް) އެވެ. އަނިޔާގައި ހުރުމުގެ ސަބަބުން ގައުމީ ބީޗްވޮލީބޯޅަ ސްކޮޑުގައި ތިބި ބައެއް ކުޅުންތެރިންނަށް ޓްރެއިނިންގައި ބައިވެރިނުވެވުނެވެ.
ދޮޅު ގަޑިއިރުގެ ޓްރެއިނިން ސެޝަން ނިންމާލުމަށް ފަހު ކޯޗު ވިނީޝިއުސް އިއްޔެ މީޑިއާ އަށް ދިން އިންޓަވިއުގައި ބުނީ ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީ މެދުވެރިކޮށް ރާއްޖެ އަށް ކޯޗުކޮށްދޭން މި ލިބުމަކީ އޭނާގެ ކެރިއަރަށް ވެސް ވަރަށް މުހިންމު ފުރުސަތެއް ކަމަށެވެ. އަދި ރާއްޖޭގެ ޓީމަށް ކޯޗުކޮށްދިނުމުގެ ވަޒީފާއާ ހަވާލުވެ ހުރީ ވަރަށް ހިތްހަމަޖެހިގެން ކަމަށާއި އެންމެ ބޮޑު ސަބަބަކީ ރާއްޖޭގެ ވޮލީބޯޅަ އެސޯސިއޭޝަންގެ ރައީސް މުހައްމަދު ރަނޭޝް (ރަނޭ) އަކީ ވެސް ކުރިއަށްދިއުމުގެ ފޯކަސްގައި މަސައްކަތް ކުރާ ފަރާތަކަށް ވާތީ ކަމަށެވެ.
"އަހަރެން ވަރަށް ހިތްހަަމަޖެހޭ އަހަންނަށް މި ފުރުސަތު ލިބުނީމަ. އަހަންނަށް ވެސް މިއީ ވަރަށް މުހިންމު ފުރުސަތެއް ރާއްޖެ ކަހަލަ އެހެން ގައުމެއްގައި މަސައްކަތްކުރުން،" ވިނީޝިއުސް ބުންޏެވެ.
"އެންމެ ބޮޑު ކަމަކީ އެކުގައި މަސައްކަތް ކުރުން. ހެދުނު ނޫނީ މެންދުރު ޓްރެއިން ކުރިޔަސް ތައްޔާރަށް ތިބެންވީ. އަހަރެން ދެކޭގޮތުގައި އެއީ އެންމެ ބޮޑު ކަަމަކީ. އަހަރެންގެ ވަރަށް ބޮޑެތި ތަޖުރިބާތަކެއް އެބަހުރި ބްރެޒިލްގައި. މީގެ ހަމައެކަނި އަހަންނަށް ދަސްވެފައި އޮތީ ކުރެވެން އޮތް ވަރަކަށް މަސައްކަތް ކުރުން. ރަނގަޅަށް ޓްރެއިން ކުރުން،"
ކޯޗު ވިނީޝިއުސް ބީޗްވޮލީބޯޅަ ކުޅުންތެރިންނަށް އިއްޔެގެ ޓްރެއިނިންގެ ތެރެއިން ބުނެދެނީ.-- ފޮޓޯ: މުހައްމަދު ޝާބިން/ އަދަދު
ފިޒިކަލް ޓްރެއިނިން އާއި ސްޓްރެންތު ޓްރެއިނިން އިން އެންމެ މަތީ ފާސް ހާސިލްކޮށްފައިވާ ކޯޗު ވިނީޝިއުސް އަކީ ބީޗްވޮލީބޯޅައިގެ އިތުރުން އިންޑޯ ވޮލީބޯޅައިގައި ވެސް ކޯޗިންގެ މަސައްކަތްތަކެއް ކުރާ ފަރާތެކެވެ. ބްރެޒިލްގެ ރިއޯ ޑި ޖަނެއިރޯގައި އެރޮބިކްސް އާއި ޖިއު ޖިޓްސޫ އުނގަނައިދިނުމުގައި ވެސް ވިނީޝިއުސް ބައިވެރިވެ އެވެ.
"ހަމައެކަނި (ބީޗްވޮލީ) ޓްރެއިން ކޮށްގެނެއް ނޫން، ޖިމް ޓްރެއިނިން ވެސް މީގެ މުހިންމުވާނެ. ވީޑިއޯ ދިރާސާކުރަން ވެސް ޖެހޭނެ. އެއީ ވެސް ކުރަން ޖެހޭނެ ކަމެއް،" ރާއްޖޭގައި މަަސައްކަތްކުރާއިރު، ޓްރެއިނިން ގެންދާނެ ގޮތަށް އިޝާރާތްކޮށް ވިނީޝިއުސް ބުންޏެވެ.
ބީޗް ވޮލީބޯޅަ ހެޑް ކޯޗެއްގެ ގޮތުގައި ވިނީޝިއުސް ވަނީ ބްރެޒިލްގެ ގައުމީ އަންހެން އަދި ފިރިހެން ބީޗް ވޮލީބޯޅަ ޓީމުގައި ވެސް މަސައްކަތްތަކެއް ކޮށްފަ އެވެ. ވިނީޝިއުސްގެ ކާމިޔާބީތަކަށް ބަލާއިރު، އޭނާ ވަނީ ބްރެޒިލްގެ އަންހެން ބީޗް ވޮލީ ބޯޅަ ޓީމުތަކަށް 2013 ވަނަ އަހަރުގެ ވޯލްޑް ޓުއާ އިން އެއް ވަނަ އަދި ދެ ވަނަ ހޯދައިދީފަ އެވެ. އަދި 2013 ވަނަ އަހަރުގެ ވޯލްޑް ޗެމްޕިއަންޝިޕް އިން ތިން ވަނަ ހޯދައިދިނެވެ. އޭގެ ފަހުން 2014 ވަނަ އަހަރުގައި ކޮންޓިނެންޓަލް ކަޕްގައި ބްރެޒިލްގެ އަންހެން ޓީމަށް އެއް ވަނަ ހޯދައިދިނެވެ. އަދި މިދިޔަ އަހަރުގެ ވޯލްޑް ޓުއާގައި ބްރެޒިލްގެ އަންހެން ޓީމަށް އެއް ވަނަ ހޯދައިދީފަ އެވެ.
ވިނީޝިއުސް ރާއްޖޭގައި މަަސައްކަތްކުރާއިރު، އަންހެން އަދި ފިރިހެން ބީޗްވޮލީބޯޅައިގެ ޕޫލެއް ގެންގުޅުމުގެ ވިސްނުން އެބައޮތެވެ. ސީނިއާ ކުޅުންތެރިންނާ އެކު ބޭއްވި ފުރަތަމަ ޓްރެއިނިން ސެޝަނުން ވިިނީޝިއުސް އަށް ފެނުނީ އުންމީދީ މަންޒަރުތަކެއްގެ ގޮތުގައި އޭނާ ސިފަކުރި އެވެ.
"ސީނިއާކޮށް މި ތިބި ކުޅުންތެރިންނަށް ވެސް ބަލާނަން، ޖޫނިއާ ކުޅުންތެރިންނަށް ވެސް ކުރިއަށް އޮތްތަނުގައި ބަލަން ފަށާނަން. މިއަދު (އިއްޔެ) މި ނިންމާލީ (ސީނިއާ ކުޅުންތެރިންނާ އެކު) ފުރަތަމަ ޓްރެއިނިން ސެޝަން އަހަންނަށް އެބަ ފެނޭ ރަނގަޅު ކަންކަން. ކުޅުންތެރިންގެ މޫނުމަތިން ވެސް އުފާވެރިކަން އެބަފެނޭ،" ވިނީޝިއުސް ބުންޏެވެ.
"މި ލެވަލް އަހަންނަށް ކަމުދޭ، އެކަމަކު، ފުރަތަމަ ދުވަހުގެ ޓްރެއިނިން އަށް ފަހު ހުރިހާ ވާހަކައެއް ދެއްކުން އެއީ އެންމެ ރަނގަޅު ގޮތްކަމަށް ނުވާނެ. އެއީ އަހަރެން ގިނަ ދުވަހު ޓްރެއިން ކުރާ ވަރަކަށް ގިނަ ކަންކަން ފެންނާނީ. އަހަރެމެން ދާން ބޭނުންވާ މިސްރާބަށް ދެވޭނެ،"
ވިނީޝިއުސް އަކީ ރާއްޖޭގެ ބީޗްވޮލީބޯޅަ ޓީމަށް މިހާތަނަށް އިރުޝާދުދޭނެ އެންމެ މަތީ ފެންވަރުގެ ކޯޗެވެ. ރާއްޖެ އަށް މަތީ ލެވަލްގެ ބީޗް ވޮލީބޯޅަ ކޯޗެއް ހަމަޖައްސައިދިނީ ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީންނެވެ. މިއީ ދާދި ފަހުން އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ ވަޑައިގެންނެވި ދަތުރުގައި ކުރެވުނު މަޝްވަރާތަކުގެ ތެރެއިން ހަމަޖެހިގެން ދިޔަ ކަމެކެވެ.
މި އަހަރަކީ ރާއްޖެ އަށް ބީޗްވޮލީބޯޅައިގެ މުހިންމު އަހަރެެކެވެ. ރާއްޖޭން އެންމެ ފުރަތަމަ ބީޗްވޮލީގައި ކުރިމަތިލާނީ އަންނަ މަހު ލަންކާގައި ބާއްވާ ސެންޓްރަލް ޒޯން މުބާރާތަކަށެވެ.
