ބާފުސާމް، ކެމަރޫން (ޖެނުއަރީ 10) - އެފްރިކަން ކަޕް އޮފް ނޭޝަންސްގައި މިރޭ ފަހު ވަގުތު ސަޑިއޯ މާނޭ ކާމިޔާބުކުރި ޕެނަލްޓީން 1-0 އިން ސެނެގޯލް އިން ޒިމްބާބްވޭ އަތުން މޮޅުވެއްޖެ އެވެ.
ސެނެގޯލް އިން މިރޭގެ މެޗަށް ތައްޔާރުވިއިރު، އެންމެ ބޮޑު މައްސަލަ އަކަށް ދިމާވީ ޓީމުގެ ކުޅުންތެރިންތަކަކަށް ކޮވިޑް ޖެހުމެވެ. އެ ގޮތުން ސެނެގޯލްގެ އެއް ވަނަ ކީޕަރު ޗެލްސީ އަށް ކުޅޭ އެޑޮއާޑް މެންޑީ އާއި ޑިފެންޑަރު ނަޕޯލީގެ ކަލީދޫ ކުލިބާލީ ވަނީ ކޮވިޑަށް ޕޮޒިޓިވްވެ، މި މެޗު ގެއްލިފަ އެވެ.
ޒިމްބާބްވޭ ހާފުގެ ތެރޭގައި ގިނަ ވަގުތު ބޯޅަ ހިފަހައްޓައިގެން ކުޅެ ސެނެގޯލް އިން ގޯލެއް ޖެހޭތޯ ގިނަ މަސައްކަތަކެއް މި މެޗުގައި ކުރި އެވެ. އެންމެ ރަނގަޅު ފުރުސަތެއް ނަގާލީ އިދްރީސާ ގާނާ ގޭއި އެވެ. މާނޭ ހުސްކޮށްލާފައި ގޭއި އަށް ދިން ބޯޅަ ރަނގަޅަށް ކޮންޓްރޯލް ނުކުރެވި އޭނާ އަތުން ފުރުސަތު ގެއްލުނީ އެވެ. ސެނެގޯލަށް ގޯލެއް ޖެހޭގޮތްވީ މެޗުގެ އިތުރު ވަގުތުގެ ވެސް ފަހު މިނިޓްގަ އެވެ.
އިތުރު ވަގުތުގެ ހަތަރު ވަނަ މިނިޓްގައި ސެނެގޯލަށް ޕެނަލްޓީ ދޭން ނިންމީ އެ ޓީމުގެ ފޯވާޑް ޕާޕާ ގޭއި ޖެހި ޝޮޓެއް ޒިމްބާބްވޭގެ ކެލްވިން މަގްޒޯންޑްވޭ އަތުން ޖެއްސުމުންނެވެ. މި ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ކަށަވަރުކުރުމަށް ފަހު އެވެ. މާނޭ ވަނީ ފަސޭހަކަމާ އެކު ގޯލުގެ ކަނަށް ޕެނަލްޓީ ފޮނުވާލައިފަ އެވެ.
އެންމެ ފަހުން 2019 ވަނަ އަހަރުގެ އެފްރިކަން ކަޕްގައި ސެނެގޯލް ބަލިވީ ފައިނަލުގައި އަލްޖީރިއާ އަތުންނެވެ. މި ފަހަރުގެ މުބާރާތުގައި ސެނެގޯލް ގްރޫޕްގައި އޮތް އަނެއް ދެ ޓީމު ކުޅުނު ފުރަތަމަ މެޗުގައި، ގިނީ ވަނީ 1-0 އިން މަލާވީ ބަލިކޮށްފަ އެވެ.
އެފްރިކަން ކަޕްގައި މިރޭ ވަނީ ގްރޫޕް ސީގެ މެޗެއް ވެސް ކުޅެފަ އެވެ. ވަރުގަދަ ގާނާ އަތުން މޮރޮކޯ ވަނީ 1-0 އިން މޮޅުވެފަ އެވެ. މޮރޮކޯ އިން މެޗުގެ ހަމައެކަނި ގޯލު ޖެހީ މެޗު ނިމެން ހަތް މިނިޓަށް ވެފައި ހުއްޓަ އެވެ. މި ލަނޑު ޖެހީ ސޯފިއަން ބޫފާލް އެވެ.
