ދިވެހި ފުޓްބޯޅަ އަށް ހުނަރުވެރި ކުޅުންތެރިން ނެރެދިނުމުގެ ޒަމާންވީ ތާރީހެއް އޮތް ކްލަބް ވެލެންސިއާ އިން މި ސީޒަނުގައި ވެސް އާ ކުޅުންތެރިއަކު ވިދަން ފަށައިފި އެވެ. އެއީ އުމުރުން 23 އަހަރުގެ ހުސެއިން ހަނާން (ޖޯ) އެވެ. ވެލެންސިއާގެ ފުރަތަމަ އެގާރައިގައި ހިމެނިގެންނާއި ބަދަލެއްގެ ގޮތުގައި އަރައި ހަނާން އަންނަނީ މެޗުތަކުގައި ރަނގަޅު ކުޅުމެއް ދައްކަމުންނެވެ.
މިހާރު ކުރިއަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި ވެލެންސިއާ އިން ވަނީ ކުޅުނު ފަސް މެޗުން ވެސް މޮޅުވެފަ އެވެ. މި މަހު 23 ވަނަ ދުވަހު ރ. އަލިފުށީ ޓާފް ދަނޑުގައި ކުޅޭ ޕްރެޒިޑެންޓްސް ކަޕްގެ ފައިނަލުގެ ފުރަތަމަ ޖާގަ ހޯދުމާ ފިޔަވަޅަކާ ގާތުގައި ކްލަބް ވެލެންސިއާ އޮތްއިރު، ހަނާން އަންނަނީ ޕްރެޒިޑެންޓްސް ކަޕްގައި ލިބޭ ކޮންމެ ފުރުސަތެއްގައި ކަހަލަ ގޮތަކަށް ބޭނުން ހިފަމުންނެވެ.
ހަނާން ވަނީ ފަސް މެޗުން ދެ ގޯލު ޖަހައި، ހަތަރު ގޯލު ޖަހަން ފުރުސަތު ތަނަވަސްކޮށްދީފަ އެވެ. މުޅިން އަލަށް ފުރަތަމަ ޑިވިޝަނުގައި ކުޅޭ ކުޅުންތެރިއަކާ ބަލާއިރު، މިއީ ފާހަގަކުރަން ޖެހޭ ކުޅުމެކެެވެ.
ޓީސީގެ ހަމްދޫން (ކ) ކައިރިން ވެލެންސިއާގެ ހަނާން (ވ) ބޯޅަ ހިފައިގެންދާން މަސައްކަތް ކުރަނީ.-- ފޮޓޯ: މުހައްމަދު ޝާބިން/ އަދަދު
ހަނާން މީގެ ކުރިން ގަލޮޅު ދަނޑުގައި ކުޅެފައިވަނީ ކްލަބް އޭދަފުށީގެ 23 އަހަރުން ދަށުގެ ޓީމަށް، އެފްއޭއެމް ޔޫތު ޗެމްޕިއަންޝިޕްގަ އެވެ. ބ. ކުޑަރިކިލަށް އުފަން ހަނާން އަށް ވެލެންސިއާ އިން ފުރުސަތު ހޯދައިދިނީ އޭދަފުށީގެ ކުރީގެ މަޝްހޫރު ކުޅުންތެރިޔާ، އަދި މިހާރު ކޯޗިންގައި މަސައްކަތްކުރަމުން އަންނަ މުހައްމަދު ޒާހިދު (ބައްޓޭ) އެވެ.
"ބައްޓޭ މި ފުރުސަތު ދިނީ، ވެލެންސިއާގައި ކުޅެން ވަރަށް ފަސޭހަ، އެންމެން ވެސް ވަރަށް ކިޔައިދޭ،" ވެލެންސިއާގައި ކުޅެލަން ލިބުނު ފުރުސަތާ ބެހޭ ގޮތުން "އަދަދު" އިން ކުރި ސުވާލަކަށް ހަނާން ބުންޏެވެ. "ވެލެންސިއާ އިން މި ލިބުނު ފުރުސަތަކީ ކުރިއަށްދާން އެޅުނު ބިންގަލެއްގެ ގޮތުގައި ދެކެނީ،"
ހަނާން ބުނީ އޭނާގެ އުފަން ރަށް ކުޑަރިކިލަކީ މޮޅަށް ފުޓްބޯޅަ ކުޅޭ ކުޅުންތެރިން ތިބި ރަށެއް ނަމަވެސް ވަޒީފާ ދޫކޮށްފައި މާލެ އައިސް ކުޅެން ހުރެވެން ގިނަ ކުދިންނަށް ނެތީ ކަމަށެވެ. އެކަމަކު، ވެލެންސިއާ އިން މި ލިބުނު ފުރުސަތުގެ ބޭނުންހިފައި ހަނާން ހުރީ ފަސްބެލުމެއް ނެތި ކުރިއަށް ދިއުމުގެ ވިސްނުމުގަ އެވެ.
"ބޭނުންވަނީ މަސައްކަތް ކޮށްގެން ކުރިއަށް ދާން. ކޮންމެ ގޮތެއް ވިޔަސް ފުޓްބޯޅަ ކުޅެގެން ނަމެއް ހާސިލްކުރަން ބަލާއިރު ޓާގެޓް ކުރަން ޖެހޭނީ ގައުމީ ޓީމަށް. އެއީ މި ވަގުތަށް ވިސްނުމަކީ، މަސައްކަތް ކުރަނީ ވެސް އެކަމަށް،" ހަނާން ބުންޏެވެ.
ވެލެންސިއާ އެންމެ ފަހުން ކުޅުނު މެޗުގައި އިއްޔެ ހަވީރު ސުޕަ ޔުނައިޓެޑް ސްޕޯޓްސް (ސަސް) އަތުން 4-1 އިން މޮޅުވިިއިރު، މި މެޗުގައި ހަނާން ކުޅެން އެރީ ބަދަލު ކުޅުންތެރިއެއްގެ ގޮތުގަ އެވެ. އޭނާ ވަނީ ވެލެންސިއާގެ ފަހު ދެ ގޯލު ޖަހަން ފުރުސަތު ތަނަވަސްކޮށްދީފަ އެވެ.
