ލަންޑަން (ޖެނުއަރީ 8) - ކޮވިޑް ޖެހިގެން ޓީމާ ދުރުގައި ހުރި މެންޗެސްޓާ ސިޓީގެ ކޯޗު ޕެޕް ގާޑިއޯލާ ނެތި އެ ޓީމުން މިރޭ އިނގިރޭސި އެފްއޭ ކަޕްގައި 4-1 އިން ސްވިންޑަން ޓައުން ބަލިކޮށްފި އެވެ.
ސިޓީގެ ހަތް ކުޅުންތެރިން ހިމެނޭ ގޮތަށް ގާޑިއޯލާ އާއި އެއް އެސިސްޓަންޓް ކޯޗު ހުއާންމާ ލީއޯ ވެސް ކޮވިޑް ޖެހިގެން މި ވަގުތު ހުރީ ޓީމާ ދުރުގަ އެވެ.
ސިޓީ ޓީމަށް މިރޭ އިރުޝާދުދިނުމުގައި ބެންޗުން ހަރަކާތްތެރިވީ އެސިސްޓަންޓް ކޯޗު ރޮޑޯލްފޯ ބޮރެލް އެވެ.
ހަތަރު ވަނަ ޑިވިޝަނުގެ ސްވިޑަން ދަނޑުގައި މިރޭ ކުޅުނު މެޗުގައި ސިޓީގެ ތަރި އަކީ 19 އަހަރުގެ ވިންގް، ކޯލް ޕާމާ އެވެ. އޭނާ ވަނީ މި މެޗުގައި ތަފާތު މޮޅު ކުޅުމެއް ދައްކައިފަ އެވެ. ސިޓީން މެޗުގެ 14 ވަނަ މިނިޓްގައި ލީޑުނެގީ ސްވިންޑަން ކުޅުންތެރިއަކު ކައިިރިން ނައްޓާފައި ޕާމާ ދިން ބޯޅައަކުން ގޯލު ކުރިމަތީގައި ހުސްކޮށް ހުރެފައި ބެނާޑޯ ސިލްވާ ޖެހި ގޯލަކުންނެވެ.
މެޗުގެ 28 ވަނަ މިިނިޓްގައި ސްވިންޑަންގެ ފަހަތުން ހެދި ގޯހެއްގެ ފައިދާނަގައި ކެވިން ޑިބްރޭނާ ޖައްސާލި ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު ގަބްރިއެލް ޖީސޫސް ވަނީ ސިޓީގެ ލީޑުފުޅާކޮށްދީފަ އެވެ. ދެ ވަަނަ ހާފްގެ ކުޅުން ފެށިގެން މެޗުގެ 59 ވަނަ މިނިޓްގައި ސިޓީގެ ތިން ވަނަ ގޯލު ޖެހީ ހިލޭ ޖެހުމަކުން އިލްކާއި ގުންޑޮގާން އެވެ.
ސިޓީގެ ފަހަތަށް މުޅި މެޗުގައި ވެސް ގިނަ ފަހަރުތަކެއްގެ މަތިން ޕްރެޝަރު ކުރި ސްވިންޑަން އިން ލަނޑު ޖެހީ މެޗުގެ 78 ވަަނަ މިނިޓްގަ އެވެ. ކައުންޓަ އެޓޭކެއްގައި އޭރިއާތެރެއިން ސްވިންޑަންގެ ހެރީ މެކްކާޑީ ޖެހި ބޯޅަ ވަނީ ގޯލުގެ ކައިރީ ކަނަށެވެ.
ސްވިންޑަން އިން ގޯލެއް ޖަހައި އުއްމީދެއް ހޯދިތާ މާގިނައިރެއްނުވެ، ސިޓީން ހަތަރު ވަނަ ގޯލު ޖަހައި މެޗުން މޮޅެއް ކަށަވަރުކުރި އެވެ. މި ގޯލު ޖެހީ ޕާމާ އެެވެ. އޭރިއާތެެރެއިން ބޯޅަ ކޮންޓްރޯލް ކޮށްލުމަށް ފަހު ޕާމާ ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
