ލަންޑަން (ޖެނުއަރީ 5) - އިނގިރޭސި ލީގު ކަޕް ސެމީ ފައިނަލް ފުރަތަމަ ލެގުގައި މާދަމާރޭ އާސެނަލާ ދެކޮޅަށް ކުޅެން އޮތް މެޗު ފަސްކުރަން ލިވަޕޫލުން ހުށަހަޅައިފި އެވެ.
ލިވަޕޫލުން މި ގޮތަށް ހުށަހެޅީ އެ ކްލަބްގައި ކޮވިޑް-19ގެ ހާލަތު ގޯސްވަމުންދާތީ އިއްޔެ ޓީމުގެ ޓްރެއިނިން ވެސް ކެންސަލްކޮށްލަން ޖެހުމުންނެވެ.
އެންމެ ފަހުން މިދިޔަ އާދިއްތަ ދުވަހު އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ލިވަޕޫލުން ކުޅެން އޮތް މެޗުގެ ކުރިން ބުރާސްފަތި ދުވަހު އެ ޓީމުގެ ގޯލްކީޕަރު އެލިސަން ބެކާ، ޑިފެންޑަރު ޖޮއެލް މަޓިޕް އަދި ފޯވާޑް ރޮބާޓޯ ފިރްމީނޯ ކޮވިޑަށް ޕޮޒިޓިވްވި އެވެ. އޭގެ ދެ ދުވަސް ފަހުން ލިވަޕޫލްގެ ކޯޗު ޔާގެން ކްލޮޕަށް ވެސް ވަނީ ކޮވިޑް ޖެހިފަ އެވެ.
އިއްޔެ، ލިވަޕޫލްގެ ޓްރެއިނިން ކެންސަލްކުރީ ކްލަބްގެ ސްޓާފުންގެ ބަޔަކާއި ބައެއް ކުޅުންތެރިން ކޮވިޑަށް ޕޮޒިޓިވްވެފައިވާ ކަމަށް ބުނެ އެވެ.
ކޮވިޑާއި އަނިޔާގެ މައްސަލަތައް އަދި އެފްރިކަން ކަޕް އޮފް ނޭޝަންސްގެ ސަބަބުން ލިވަޕޫލްގެ ގިނަ ކުޅުންތެރިންތަކެއް ތިބީ ކުޅުމާ ދުރުގަ އެވެ. އިއްޔެ ހާލަތު އިތުރަށް ގޯސްވެ، ޓްރެއިނިންތައް ވެސް ހުއްޓާލަން ޖެހިފައިވާތީ ލިވަޕޫލުން ވަނީ ރަސްމީކޮށް އާސެނަލް ދަނޑުގައި މާދަމާރޭ ކުޅެން އޮތް ލީގު ކަޕް ސެމީ ފައިނަލްގެ ފުރަތަމަ ލެގު ފަސްކުރަން ހުށަހަޅައިފަ އެވެ.
ލިވަޕޫލްގެ ރޭ ފޮނުވި ހުށަހެޅުމާ ބެހޭގޮތުން ލަސްވެެގެން މިއަދު އީއެފްއެލް އިން ގޮތެއް ނިންމާނެ އެވެ. ބައެއް މީޑިއާ ރިޕޯޓްތައް ބުނާގޮތުން އީއެފްއެލް އިން މެޗު ކުރިއަށްގެންދާ ގޮތަށް ނިންމުމުގެ ފުރުސަތު ވެސް އެބައޮތެވެ. އެއީ އިތުރަށް މެޗުތައް ފަސްކޮށްފިނަމަ މެޗު ކުޅެން ރަނގަޅު ތާރީހެއް ކައިރި މުސްތަގުބަލެއްގައި ނުލިބިދާނެ ކަމުގެ ބިރު އޮތުމުންނެވެ.
އީއެފްއެލް އިން ބުނީ ރަސްމީކޮށް ލިވަޕޫލްގެ ހުށަހެޅުމާ ބެހޭގޮތުން ގޮތެއް ނިންމާނީ ކްލަބްގެ ހާލަތު ވަރަށް ގާތުން ބެލުމަށް ފަހު، މުބާރާތުގެ ގަވާއިދުގައިވާ ހުރިހާ ކަމަކަށް ވެސް ރިއާޔަތްކުރުމަށް ފަހު ކަމަށެވެ.
އީއެފްއެލް އިން މި ސީޒަން ފެއްޓުމުގެ ކުރިން ކްލަބްތަކާ އެކު ބޭއްވި ބައްދަލުވުމުގައި ވަނީ ކޮވިޑާ ހެދި ޓީމެއްގެ ހާލަތު ގޯސްވެއްޖެނަމަ މެޗެއް ފަސްކުރާނެ ގޮތްތައް ކިޔައިދީފަ އެވެ. އެ ގޮތުން ކީޕަރަކު ހިމެނޭ ގޮތަށް 14 ކުޅުންތެރިން ފިޓްކޮށް މެޗު ކުޅެވޭ ހާލަތުގައި ތިބެއްޖެނަމަ ޝެޑިއުލާ އެއްގޮތަށް މެޗު ކުޅޭނެ އެވެ.
