އަންނަ މާޗް މަހުގެ ފީފާ ކަލަންޑަރު ތާރީހުގެ ތެރޭގައި ބައިނަލްއަގުވާމީ މުބާރާތެއް ރާވަން ސްރީ ލަންކާ ފުޓްބޯޅަ ފެޑެރޭޝަނުން މަސައްކަތް ފަށާފައިވާއިރު، އެ މުބާރާތުން ރާއްޖެ އަށް ވެސް ދައުވަތު ދިނުމުގެ ވިސްނުމެއް ލަންކާ އިން ގެންގުޅޭ ކަމަށް މައުލޫމާތު ލިބިއްޖެ އެވެ.
މިދިޔަ ނޮވެމްބަރު މަހު ލަންކާގެ ބޮޑުވަޒީރު ރާޖަޕަކްސަ ޓްރޮފީ އަށް ކުޅުނު ފޯ ނޭޝަންސް ކަޕްގައި ވެސް ރާއްޖެ ވާދަކުރި އެވެ. ރާއްޖެ އާއި ލަންކާގެ އިތުރުން ދެން އެ މުބާރާތުން ފެނުނީ ސީޝެލްސް އާއި ބަންގްލަދޭޝް އެވެ. ފައިނަލުގައި ޕެނަލްޓީ ޖަހައިގެން ލަންކާ ބަލިކޮށް ޗެމްޕިއަންކަން ހޯދީ ސީޝެލްސް އެވެ.
ލަންކާގެ ފުޓްބޯޅަ އަލުން ކޮޅަށް ޖަހަން އެ ގައުމުގެ ފުޓްބޯޅަ ފެޑެރޭޝަން ރައީސް ޖޭސްވާރު އުމަރު ކުރައްވާ މަސައްކަތުގެ ތެރެއިން އިންޓަނޭޝަނަލް ކަލަންޑަރުގައި ލަންކާ އަށް މެޗުތަކެއް ހޯދައިދިނުން އެއީ އޭނާގެ ވައުދެކެވެ. އެ ގޮތުން އެންމެ ބޮޑަށް އިސްކަން ދޭނީ ލަންކާގައި ފުޓްބޯޅަ ފޯރި އަލުން އާލާ ކުރެވޭނެ ގޮތަކަށް ލަންކާގެ ގައުމީ ޓީމު މެޗުތައް ކުޅެވޭ ގޮތް ހެދުން ކަމަށް ޖޭސްވާރު ވަނީ މީގެ ކުރިން ވިދާޅުވެފަ އެވެ.
ލަންކާ ފުޓްބޯޅަ ފެޑެރޭޝަނުން ބުނީ މާޗް މަހު ކުޅޭ މުބާރާތް ރޭވުމުގެ މަސައްކަތް މިހާރު ކުރެވެމުން އަންނަ ކަމަށާއި ފަހަރެއްގައި މި ފަހަރުގެ މުބާރާތުގައި ފަސް ޓީމު ނޫނީ ހަ ޓީމު ކުޅުމުގެ ފުރުސަތު ވެސް އެބައޮތް ކަމަށެވެ. އަދި ރާއްޖެ ވެސް މި މުބާރާތުން ފެނިދާނެ ކަމަށް ލަންކާ ފެޑެރޭޝަނުގެ އޮފިޝަލަކު ވަނީ މައުލޫމާތު ދީފަ އެވެ.
ރޭ ރާއްޖެ ޓީވީ "ކުޅިވަރު ފައިލް" ޕްރޮގްރާމްގައި ވާހަކަ ދައްކަވަމުން ޔޫތު މިނިސްޓަރު އަހުމަދު މަހުލޫފް ވެސް ވަނީ މާޗް މަހު ލަންކާގައި ކުޅެން ރާވާ އިންޓަނޭޝަނަލް މުބާރާތުން ރާއްޖެ ފެނިދާނެ ކަމުގެ އިޝާރާތެއް ދެއްވައިފަ އެވެ.
"ލަންކާ ކޮޅުން މައުލޫމާތު ލިބިއްޖެ، މާޗް މަހަށް ސުޕަ ކަޕް ކަންނޭނގެ ކިޔާފައި، ބޮޑުކޮށް މުބާރާތެއް ބާއްވަން ކިޔާފައި މަސައްކަތް ކުރަމުން އަންނަ ކަމަށް. އޭގެތެރެއިން ޔޫރަޕްގެ ބައެއް ޓީމުތަކާއި ރާއްޖެ އަށް ވެސް ދައުވަތު ދޭނެކަމަށް،" މިނިސްޓަރު ވިދާޅުވި އެވެ.
ނޮވެމްބަރު މަހު ބޭއްވި ފޯ ނޭޝަންސް ކަޕަކީ ގައުމީ ޓީމުގެ ކޯޗުކަމާ މިހާރު އެ މަގާމުގައި ހުރި އިޓަލީގެ ފްރެންޗެސްކޯ މޮރިއޭރޯ ހަވާލުވިތާ ކުޑަ ދުވަސްކޮޅެއްގެ ތެރޭގައި ކުޅުނު މުބާރާތެކެވެ. އެ މުބާރާތުގެ ފުރަތަމަ މެޗުގައި ރާއްޖެ ހަތަރު ގޯލުން ކުރީގައި އޮއްވައި ލަންކާ ވަނީ 4-4 އިން އެއްވަރުކޮށްފަ އެވެ. ދެ ވަނަ މެޗުގައި ބަންގްލަދޭޝް އަތުން 1-0 އިން ރާއްޖެ ބަލިވިއިރު، މިއީ 2003 ވަނަ އަހަރަށް ފަހު ބަންގްލަދޭޝް އަތުން ސީނިއާ ފުޓްބޯޅައިގައި ރާއްޖެ ބަލިވި ފުރަތަމަ ފަހަރެވެ. ފަހު މެޗުގައި ސީޝެލްސްއާ 0-0 އިން އެއްވަރުވެ، ރާއްޖޭން ފޯ ނޭޝަންސް ކަޕް ނިންމާލީ މޮޅެއް ނުލިބި ލީގު ބުރުގެ ފުލުގައި އޮވެގެންނެވެ.
ފޯ ނޭޝަންސް ކަޕްގެ ފައިނަލު ޝަރަފްވެރި ކޮށްދެއްވަން ފީފާގެ ރައީސް ޖިއާނީ އިންފަންޓީނޯ ވަނީ ލަންކާ އަށް ވަޑައިގެންފަ އެވެ. އެ ދަތުރުގައި ލަންކާގެ ފުޓްބޯޅަ ތަރައްގީ ކުރަން ފީފާ އިސް ބައިވެރިއެއްގެ ގޮތުގައި އޮންނާނެ ކަމުގެ ޔަގީންކަން އިންފަންޓީނޯ ވަނީ ދެއްވައިފަ އެވެ.
މައުލޫމާތު ލިބިފައިވާ ގޮތުގައި ލަންކާ އިން ބަލަމުން އަންނަނީ ފޯ ނޭޝަންސް ކަޕް ކުޅުނު ރޭސް ކޯސް ސްޓޭޑިއަމްގެ ބަދަލުގައި ސުގަތަދާސާ ސްޓޭޑިއަމްގައި މާޗް މަހުގެ މުބާރާތް ކުޅުމަށެެވެ. އެކަމަކު، އެކަން ކުރަން ބަލާއިރު އޮތް ގޮންޖެހުމަކީ ސުގަތަދާސާ ސްޓޭޑިއަމް މަރާމާތު ކުރަން ޖެހިފައި އޮތުމެވެ.
