މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، ގޯލްޑަން ފުޓްސަލް ޗެލެންޖްގެ ޓައިޓަލް ސްޕޮންސަރަކަށް ސޮނީ ސްޕޯޓްސް ހަމަޖައްސައިފި އެވެ.
ސޮނީ ސްޕޯޓްސްއާ އެކު ގޯލްޑަން ފުޓްސަލް އެސޯސިއޭޝަނުން އެއްބަސްވުމުގައި ސޮއިކުރުން އޮތީ މިއަދު މެންދުރު ފަހު ސޮނީ ސްޕޯޓްސްގެ އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ.
ގޯލްޑަން ފުޓްސަލް އެސޯސިއޭޝަންގެ ފަރާތުން އެއްބަސްވުމުގައި ސޮއިކުރީ، އެ ޖަމިއްޔާގެ ރައީސް ރިލްވާން މޫސާ އެވެ. ސޮނީ ސްޕޯޓްސްގެ ފަރާތުން ސޮއިކުރީ އެސިސްޓަންޓް މާކޮމް މެނޭޖަރު މަރިޔަމް އަބްދުﷲ އެވެ.
މީގެ ކުރިން ވެސް ސޮނީ ސްޕޯޓްސް އިން ވަނީ މުބާރާތް ބާއްވާ ހުރިހާ ފަހަރެއްގައި ގޯލްޑަން ފުޓްސަލް އެސޯސިއޭޝަނާ ގުޅިގެން މި މުބާރާތުގައި މަސައްކަތްކޮށްފަ އެވެ. އެކަމަކު، މިއީ ޓައިޓަލް ސްޕޮންސަރަކަށް މަސައްކަތްކުރާ ދެ ވަނަ ފަހަރެވެ.
މިއީ ގޯލްޑަން ފުޓްސަލް ޗެެލެންޖް ބާއްވާ ހަ ވަަނަ ފަހަރެވެ. މި ފަހަރުގެ މުބާރާތުގައި ވެސް ޕާޓްނަރެއްގެ ގޮތުގައި ސޮނީ ފެނުމަކީ މުބާރާތަށް ލިބޭނެ އިތުރު ފުރިހަމަ ކަމެކެވެ.
މީގެ ހަ އަހަރު ކުރިން 2015 ވަނަ އަހަރުން ފެށިގެން ބާއްވަމުން އަންނަ ގޯލްޑަން ފުޓްސަލް ޗެލެންޖްގެ މި ފަހަރުގެ މުބާރާތުގައި ޖުމްލަ 91 ޓީމެއް ކުޅޭނެ އެވެ. މާލެ އާއި ފުވައްމުލަކުން އެ ރަށުގެ އެކި އަަވަށްތައް ބައިވެރިވާ ގޮތަށް ހަމަޖެހިފައިވެ އެވެ.
ރިލްވާން (ކ) އާއި މަރިޔަމް (ވ) އެއްބަސްވުމުގައި ސޮއިކުރަނީ.-- ފޮޓޯ: މުހައްމަދު ޝާބިން/ އަދަދު
ގޯލްޑަން ފުޓްސަލް ޗެެލެންޖްގެ ހާއްސަ ކަމަކީ އަތޮޅާއި ޒޯޏް ފުޓްބޯޅަ ފޯރިން ފެށިގެން މުޅި ރާއްޖެއާ ހަމައަށް ޗެލެންޖިން މެޗުތަކެއް ފެނުމެވެ. މި ފަހަރުގެ މުބާރާތުގައި 91 ޓީމުގެ މެދުގައި ޖުމްލަ 177 މެޗު ކުޅޭ ގޮތަށް ވަނީ ރާވައިފަ އެވެ. މުބާރާތުގެ މެޗުތައް ލައިވްކުރުމަކީ ގޯލްޑަން ފުޓްސަލް އެސޯސިއޭޝަނުގެ ވަރަށް ބޮޑު އަމާޒެކެވެ.
އެންމެ ފަހުން ގޯލްޑަން ފުޓްސަލް ޗެލެންޖް ބޭއްވީ 2019 ވަނަ އަހަރު އެވެ. އެ ފަހަރު ފައިނަލުގައި ބ.އޭދަފުށި ބަލިކޮށް ޗެމްޕިއަންކަން ހޯދީ ތިމަރަފުށިންނެވެ. ތިމަރަފުށްޓަކީ ގޯލްޑަން ފުޓްސަލް ޗެލެންޖް ދެ ފަހަރަށް ކާމިޔާބުކުރި ހަމައެކަނި ޓީމެވެ.
ގޯލްޑަން ފުޓްސަލް ޗެލެންޖްގެ ޗެމްޕިއަން ޓީމަށް 65،000 ރުފިޔާގެ ފައިސާގެ އިނާމެއް ދޭނެ އެވެ އަދި ރަނަރަޕަށް 25،000 ރުފިޔާ ދޭން ވަނީ ނިންމައިފަ އެވެ. މީގެ އިތުރުން މުބާރާތުގެ ކޮންމެ ބުރެއްގެ ހާއްސަ މަގާމުތައް ހޮވާނެ އެވެ. އެއީ އެންމެ ގިނަ ގޯލުޖަހާ ކުޅުންތެރިޔާ އާއި މޮޅު ކުޅުންތެރިޔާ އެވެ.
މިހާރު އޮތްގޮތުން ގޯލްޑަން ފުޓްސަލް ޗެލެންޖް ފަށަން ނިންމާފައިވާ ތާރީހަކީ އަންނަ މަހުގެ 19 ވަނަ ދުވަހު އެވެ. މެޗުތައް ކުޅޭނީ ހުޅުމާލެ ރެހެންދި ފުޓްސަލް ދަނޑުގަ އެވެ.
