މެޑްރިޑް (ޖެނުއަރީ 2) - ސްޕެނިޝް ލީގުގެ އެއް ވަނައިގައި އޮތް ރެއާލް މެޑްރިޑުން އާ އަހަރުގައި ކުޅުނު ފުރަތަމަ މެޗުގައި 1-0 އިން ގެޓަފޭ އަތުން ބަލިވެއްޖެ އެވެ.
މިއީ 2012 ވަނަ އަހަރުގެ ފަހުން ގެޓަފޭ އިން ރެއާލް ބަލިކުރި ފުރަތަމަ ފަހަރެވެ. އަދި މިދިޔަ އޮކްޓޫބަރު މަހަށް ފަހު ކުޅުނު 11 މެޗުގެ ތެރެއިން ރެއާލް ބަލިވި ފުރަތަމަ މެޗެވެ.
ސްޕެނިޝް ލީގު ތާވަލަށް ބަލާއިރު، ރެއާލް އެއް ވަނައިގައި އޮތީ 20 މެޗުން 46 ޕޮއިންޓާ އެކު އެވެ. ދެ ވަނައިގައި އޮތް ސެވިއްޔާ އަށް 18 މެޗުން ވަނީ 38 ޕޮއިންޓް ލިބިފަ އެވެ. މާދަމާރޭ ކަޑިޒް އަތުން ސެވިއްޔާ މޮޅުވެއްޖެނަމަ ރެއާލްގެ ލީޑު ފަސް ޕޮއިންޓަށް ކުޑަވާނެ އެވެ.
މެޗަށް ފަހު ރެއާލްގެ ކޯޗު ކާލޯ އަންޗެލޮޓީ ބުނީ އަދިވެސް ރެއާލް ކުޅުންތެރިން ތިބީ ޗުއްޓީ މޫޑުގައި ކަމަށެވެ. އަދި މިއީ ރެއާލަށް ކޮންމެވެސް އެއްޗެއް ހާސިލްކުރެވޭނެ މެޗެއް ކަމަށާއި ބަލިވުމުން މިއީ ލިބުނު "ވޭކަޕް ކޯލެއް"ގެ ގޮތުގައި ނަގަން ޖެހޭ ކަމަށް އަންޗެލޮޓީ ބުންޏެވެ.
"ހީވީ އިތުރު ދުވަހަކަށް އަހަރެމެންގެ ޗުއްޓީ ދިގުވެފައި އޮތްހެން. މިއަދު މި ފެނުނު ކުޅުމަކީ ކްރިސްމަސްގެ ކުރިން ފެނުނު ރެއާލްގެ ކުޅުމެއް ނޫން. ކޮންސަންޓްރޭޝަނެއް، ކޮމިޓްމަންޓެއް ނުފެނުނު. އަހަރެމެން ބަލިވުން ހައްގު މެޗެކޭ ނުބުނާނަން. އެކަމަކު، ބަލިވުމުން މިއީ އަލުން ރަނގަޅަށް ސަމާލުވެގެން ކުޅެން ޖެހޭކަން އެނގެން ލިބުނު ވޭކަޕް ކޯލެއް،" އަންޗެލޮޓީ ބުންޏެވެ.
ގެޓަފޭ ދަނޑުގައި މިރޭ ކުޅުނު މެޗު ފަށައިގެން އެ ޓީމުން ވަނީ ނުވަ ވަނަ މިނިޓްގައި މެޗުގެ ހަމައެކަނި ގޯލު ޖަހައިފަ އެވެ. ރެއާލްގެ ޑިފެންޑަރު އެޑާ މިލިޓާއޯ ހެދި ގޯހެއްގެ ފައިދާނަގައި ގެޓަފޭގެ މި ގޯލު ޖެހީ އެނެސް އުނާލް އެވެ. އޭރިއާތެރެއިން އުނާލް ޖެހި ބޯޅަ ހުއްޓުވަން ރެއާލް ކީޕަރު ތިބައު ކޯޓުއާ އަށް މާ ބޮޑު ކަމެއް ނުކުރެވުނެވެ.
އެކަމަކު، އޭގެ އިރުކޮޅެއް ފަހުން ގެޓަފޭގެ ނިކޯލަ މެކްސިމޯވިޗް ޖެހި ބޯޅަ ރެއާލް ކީޕަރު ކޯޓުއާ ވަނީ އަތަށް ނަގައިފަ އެވެ. މެޗުގެ 17 ވަނަ މިނިޓްގައި ރެއާލްގެ ކަރީމް ބެންޒެމާ އާއި ރޮޑްރީގޯ ގުޅިގެން އުފެއްދި އެޓޭކެއްގައި ލޫކަ މޮޑްރިޗް ޖެހި ބޯޅަ އަމާޒުވީ ގޯލުގެ ދަނޑިއަށެވެ.
ދެ ވަނަ ހާފްގައި ރެއާލުން ގިނަ އެޓޭކްތަކެއް ކުރެވޭތޯ ބެލި ނަމަވެސް ގެޓަފޭގެ ޑިފެންޑަރުން ދިޔައީ ރެއާލްގެ ކުރިއަށް ކުޅޭ ކުޅުންތެރިން ހުއްޓުވުމުގައި ކާމިޔާބު ހޯދަމުންނެވެ. ނަތީޖާ އަކަށްވީ 10 އަހަރު ތެރޭ ފުރަަތަމަ ފަހަރަށް ރެއާލް އަތުން މޮޅެއް ލިބުމެެވެ.
ގެޓަފޭ އިން 2012 ވަނަ އަހަރު ރެއާލް ބަލިކުރި ފަހުން ކުޅުނު 15 މެޗުގެ ތެރެއިން 13 މެޗުން މޮޅުވީ ރެއާލް އެވެ. އެކަމަކު، މި މެޗުގައި ގެޓަފޭ އިން މި ވަނީ ލީގުގެ ކުރީގައި އޮތް ރެއާލްގެ މައްޗަށް ކާމިޔާބު ހޯދައިފަ އެވެ.
