ނިއު ޔޯކް، ޔުނައިޓެޑް ސްޓޭޓްސް (ޖެނުއަރީ 1) - ޓޮޓެންހަމް ހޮޓްސްޕާސްގެ ކޯޗުކަން ހުސްވިއިރު، އެ މަގާމާ ހަވާލުވާން ބޭނުންވި ކަމަށް އެ ޓީމަށް ކުރިން ކުޅުނު ޖަރުމަނުގެ ފޯވާޑް ޔާގެން ކްލިންސްމަން ބުނެފި އެވެ.
ކްލިންސްމަން ވަނީ ނޫނޯ އެސްޕިރީޓޯ ސަންޓޯ، ޓޮޓެންހަމްގެ ކޯޗުކަމުން ވަކިކޮށް އެ ޓީމުން އާ ކޯޗެއް ހޯދަން މަސައްކަތްކުރިއިރު، އެ ކްލަބްގެ އޮފިޝަލުންނާ ބައްދަލުކޮށްފަ އެވެ. އެ ގޮތުން ކްލިންސްމަން ވަނީ ޓޮޓެންހަމްގެ ޗެއާމަން ޑެނިއަލް ލިވީއާ އެކު މަޝްވަރާތަކެއް ކޮށްފަ އެވެ.
"އެ މީހުންގެ ވިސްނުން ހުރީ ތަފާތު ގޮތަކަށް މި ވަގުތަށް. އެހެންވެ، އެ މީހުންނަށް މި ވަގުތު އެންމެ ރަނގަޅު ކޯޗު ޓީމާ ހަވާލުވެ އެ ހުރީ. އަހަރެން ބުނިން އަހަރެން މަޑުކުރާނެ ކަމަށް. އެއީ ޓޮޓެންހަމަކީ އަބަދުވެސް އަަހަންނާ ވަރަށް ގާތް ކްލަބެއް،" ފޯފޯޓޫ އަށް ދިން އިންޓަވިއުއެއްގައި ކްލިންސްމަން ބުންޏެވެ.
"އަހަރެންގެ ދިރިއުޅުމުގެ ވަރަށް ހާއްސަ ހަނދާންތަކެއް މި ކްލަބާ (ޓޮޓެންހަމާ) ގުޅިފައި އޮތީ،"
ކްލިންސްމަން ވަނީ ދެ ފަހަރެއްގެ މަތިން ޓޮޓެންހަމަށް ކުޅެފަ އެވެ. އެއީ އެންމެ ފުރަތަމަ 1994-1995 ގަ އެވެ. ދެ ވަނަ ފަހަރަށް އޭނާ ޓޮޓެންހަމް ޖޯޒީގައި ފެނުނީ 1997-1998 ވަނަ އަހަރުގެ ސީޒަނުގަ އެވެ. ދެ ފަަހަރު މަތިން ޓޮޓެންހަމަށް 68 މެޗުން 38 ގޯލު ޖެހި އެވެ.
ޖަރުމަނު ގައުމީ ޓީމާ 2004 ވަނަ އަހަރު ހަވާލުވެ، ކޯޗިން ކެރިއަރު ފެށި ކްލިންސްމަން އެ ޓީމު ދޫކޮށްލީ 2006 ވަނަ އަހަރުގެ ފީފާ ވޯލްޑް ކަޕަށް ފަހު އެވެ. އޭގެ ފަހުން 2008-2009 ވަނަ އަހަރު ބަޔާން މިއުނިކަށް ކޯޗުކޮށްދިން ކްލިންސްމަން 2011 އިން 2016 އަހަރާ ހަމައަށް ހުރީ އެމެރިކާ ޓީމުގެ ކޯޗަކަށެވެ.
އެންމެ ފަހުން ކްލިންސްމަން ހުރީ ހާތާ ބާލިންގަ އެވެ. އެ ޓީމުގެ ކޯޗުކަމާ 2019 ވަނަ އަހަރުގެ ނޮވެމްބަރު މަހު ހަވާލުވުމަށް ފަހު 10 ހަފްތާ ތެރޭ އެ ޓީމުގެ ކޯޗުކަން ދޫކޮށްލި ފަހުން ކްލިންސްމަން ހުރީ ޓީމަކާ ހަވާލުނުވެ އެވެ.
