ރާއްޖޭގެ ގައުމީ ވޮލީ ޓީމުން ބަންގްލަދޭޝާ ދެކޮޅަށް އެކުވެރިކަމުގެ މެޗުތަކެއް މާލޭގައި ކުޅެން މަޝްވަރާކޮށްފައިވާ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
މިނިސްޓަރު މަހުލޫފް މިހެން ވިދާޅުވީ މިހާރު ބަންގްލަދޭޝަށް ކުރައްވާ ރަސްމީ ދަތުރުފުޅުގައި ބަންގްލަދޭޝްގެ ވޮލީބޯޅަ ފެޑެރޭޝަނާ އެކު ބޭއްވި ބައްދަލުވުންތަކަށް ފަހު އެވެ. ރާއްޖެ އާއި ބަންގްލަދޭޝާ ދެމެދު ވެވުނު އެކްސްޗޭންޖް ޕްރޮގްރާމްގެ އެއްބަސްވުމުގެ ތެރެއިން ކުޅިވަރަށް ފައިދާކުރާނެ ގިނަ ދޮރުތަކެއް ހުޅުވިގެންދާނެ ކަމަށް މިނިސްޓަރު ވަނީ ވިދާޅުވެފަ އެވެ.
ބަންގްލަދޭޝާއި ރާއްޖޭގެ ވޮލީ ޓީމުގެ މެޗުތައް ކުޅޭނެ ތާރީހެއް އިއުލާނުކޮށްފައެއް ނުވެ އެވެ.
މިނިސްޓަރު މަހުލޫފް ވަނީ ބަންގްލަދޭޝްގެ ވޮލީބޯޅަ ފެޑެރޭޝަންގެ ރައީސް އަދި ބަންގްލަދޭޝްގެ ވެރިރަށް ޑާކާގެ މޭޔަރު އަތީގުލް އިސްލާމާ ބައްދަލުކުރައްވައި ރާއްޖޭގެ ވޮލީބޯޅަ އަށް ފުރުސަތުތައް ފަހިކުރެވޭނެ އިތުރު ގޮތްތަކާ ބެހޭގޮތުން ވެސް މަޝްވަރާ ކުރައްވައިފަ އެވެ.
ދާދި ފަހުން ބަންގްލަދޭޝްގައި ކުރިއަށްދިޔަ ސެންޓްރަލް ޒޯން ވޮލީބޯޅަ މުބާރާތުގައި ރާއްޖޭގެ އަންހެން އަދި ފިރިހެން ވޮލީބޯޅަ ޓީމު ވަނީ ވާދަކޮށްފަ އެވެ. އަންހެން އަދި ފިރިހެން ޓީމު ޑާކާގައި މުބާރާތަށް ގޮސް ތިބިއިރު، މިނިސްޓަރު މަހުލޫފް ވަނީ ފޯނުން ގުޅުއްވައި، ޓީމަށް ހިތްވަރު ދިނުމުގެ އިތުރުން ސަރުކާރުގެ ފަރާތުން ވޮލީބޯޅަ އަށް އިތުރު ފުރުސަތުތައް ހޯދައިދޭން އިތުރު މަސައްކަތް ކުރައްވާނެ ކަމުގެ ޔަގީންކަން ދެއްވައިފަ އެވެ.
މިނިސްޓަރު މަހުލޫފްގެ ދައުވަތަކަށް ލަންކާގެ ގައުމީ ވޮލީބޯޅަ ޓީމު ވަނީ ދެ ފަހަރެއްގެ މަތިން ރާއްޖެ އައިސް އެކުވެރިކަމުގެ މެޗުތަކެއް ކުޅެފަ އެވެ. އެ ގޮތުން އެންމެ ފުރަތަމަ 2019 ވަނަ އަހަރުގެ އޮގަސްޓް މަހު ރާއްޖެ އައިއިރު، ދެ ވަނަ ފަހަރަށް އައީ މި މަހު ކުރީކޮޅުގަ އެވެ. ލަންކާ ގައުމީ ޓީމުގެ އިތުރުން މި މަހު އިންޑިއާ ލީގުގައި ކުޅޭ ހައިދަރުއާބާދު ސްޕައިކާސް ވެސް ވަނީ ރާއްޖެ އައިސް ގައުމީ ފިރިހެން ޓީމާ ދެކޮޅަށް މެޗުތަކެއް ކުޅެފަ އެވެ.
ރާއްޖޭން ވަނީ އަންނަ އަހަރު ސެންޓްރަލް ޒޯންގެ އަންހެން އަދި ފިިރިހެން މުބާރާތް ހޯސްޓް ކުރުމުގެ ފުރުސަތު ހޯދައިފަ އެވެ. ބަންގްލަދޭޝާ ވާދަކޮށް ރާއްޖޭން ސެންޓްރަލް ޒޯން މުބާރާތް ހޯސްޓް ކުރުމުގެ ފުރުސަތު ހޯދީ ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ މިހާރު އޮތް ރައީސް މުހައްމަދު ރަނޭޝް (ރަނޭ)ގެ ލީޑަޝިޕްގެ މަސައްކަތުންނެވެ.
