ލަންޑަން (ޑިސެމްބަރު 30) - އާސެނަލްގެ ކޯޗު މިކޭލް އާޓެޓާ ދެވަނަ ފަހަރަށް ކޮވިޑަށް ޕޮޒިޓިވްވެ، އިނގިރޭސި ޕްރިމިއާ ލީގުގައި މެންޗެސްޓާ ސިޓީއާ ދެކޮަޅަށް އާސެނަލް ކުޅޭ މެޗުގައި ޓީމަށް އިރުޝާދު ދޭން ބެންޗަށް ދިއުމުގެ ފުރުސަތު ގެއްލިއްޖެ އެވެ.
އާޓެޓާ ކޮވިޑަށް ޕޮޒިޓިވްވުމުން، ސިޓީއާ ދެކޮޅަށް ހޮނިހިރު ދުވަހު އަމިއްލަ ދަނޑުގައި އާސެނަލް ކުޅޭ މެޗުގައި އެ ޓީމަށް އިރުޝާދު ދޭނީ އެސިސްޓަންޓް ކޯޗު އަލްބާޓް ސްޓުވިވަންބާގް އަދި ސްޓީވް ރައުންޑެވެ.
މިދިޔަ އަހަރުގެ މާޗު މަހު ވެސް އާޓެޓާ ވަނީ ކޮވިޑަށް ޕޮޒިޓިވްވެފަ އެވެ. އެ ފަހަރު އާޓެޓާ ކޮވިޑަށް ޕޮޒިޓިވްވުމާ އެކު އެ ކްލަބް ވަނީ ތައްޔާރީ ހާލަތަށް ގެނެސްފަ އެވެ.
އާޓެޓާ، މި ފަހަރު ކޮވިޑަށް ޕޮޒިޓިވްވިއިރު، ފަހަކަށް އައިސް އާސެނަލުން އަންނަނީ ރަނގަޅު ކުޅުމެއް ދައްކަމުންނެވެ. އާސެނަލް މި ވަގުތު ލީގުގެ ހަތަރު ވަނަ މަގާމުގައި އޮތްއިރު، ވަރަށް އަވަހަށް އިނގިރޭސި ލީގު ކަޕްގެ ސެމީ ފައިނަލުގައި ލިވަޕޫލާ ދެކޮޅަށް ނުކުންނާނެ އެވެ.
ކޮވިޑަށް ޕޮޒިޓިވްވެ، އެސްޓަން ވިލާގެ ކޯޗު ސްޓީވަން ޖެރާޑް އަދި ކްރިސްޓަލް ޕެލެސްގެ ކޯޗު ޕެޓްރިކް ވިއޭރާ އަށް ވެސް ވަނީ ދާދި ފަހުން ލީގުގެ މެޗުތަކެއް ގެއްލިފަ އެވެ.
ލީގުގައި އެންމެ ފަހުން ކުޅުނު ހަތަރު މެޗުން ވެސް މޮޅުވެފައިވާ އާސެނަލްގެ ޓާގެޓަކީ މި ސީޒަނުގެ ގަދަ ހަތަރަކާއި ޓްރޮފީއެއް ހޯދުން ކަމަށް އާޓެޓާ ވަނީ މީގެ ކުރިން ބުނެފަ އެވެ. އެ އަމާޒަށް ވާސިލްވާން ކުޅުންތެރިން ފަހަކަށް އައިސް ދައްކާ ކުޅުމަށް އާޓެޓާ ވަނީ ތަރުހީބު ދީފަ އެވެ. -- ބީބީސީ
