ލަންޑަން (ޑިސެމްބަރު 28) - އިނގިރޭސި ޕްރިމިއާ ލީގުގެ ކްލަބްތަކުން ފާއިތުވި ހަފްތާއެއްހާ ދުވަސް ތެރޭ 103 ކޮވިޑް-19ގެ ކޭސްތައް ރިކޯޑް ކުރެވުނުއިރު، މިއީ މި ވަރުގެ މުއްދަތެއްގެ ތެރޭގައި އެންމެ ގިނަ ކޭސް ފެނުނު ފުރަތަމަ ފަހަރެވެ.
މިދިޔަ ހަތް ދުވަސްތެރޭ ޕްރިމިއާ ލީގުގެ ކްލަބްތަކުގެ 15،186 ކޮވިޑް-19ގެ ޓެސްޓް ކުރެވުނެވެ. އޭގެ ތެރެއިން 106 ކޮވިޑް ކޭސް ފެނުނުއިރު، މިދިޔަ ހަފްތާގައި ވަނީ ޕްރިމިއާ ލީގުގެ ކްލަބްތަކާ ގުޅޭ ކޮވިޑްގެ 90 ކޭސް ރިޕޯޓްކޮށްފަ އެވެ.
ޑިސެމްބަރު މަސް ފެށުނު ފަހުން ކޮވިޑާ ހެދި ޕްރިމިއާ ލީގުގެ 15 މެޗެއް މިހާތަނަށް ވަނީ ފަސްކުރަން ޖެހިފަ އެވެ.
ޕްރިމިއާ ލީގުން އިއްޔެ ނެރުނު ބަޔާނެއްގައި ބުނެފައިވަނީ ކޮވިޑް-19ގެ ކޭސްތައް ގިނަ އަދަދަކަށް ރިޕޯޓް ކުރެވުނު ކަމުގައި ވިޔަސް އާ އަހަރާއި ކްރިސްމަސްއާ ދިމާކޮށް ކުޅޭ ޕްރިމިއާ ލީގާއި އެހެނިހެން ޑިވިޝަންތަކުގެ މުބާރާތްތަކުގެ މެޗުތައް ކުރިއަށްދާނެ ކަމަށެވެ.
މެޗުތައް ކުޅޭއިރު، އިނގިރޭސި ކުޅިވަރު ހަރަކާތްތައް ކުރިއަށް ގެންދަން އެކުލަވާލާފައިވާ ހަރުކަށި ސިއްހީ ގައިޑްލައިންތަކަށް އަމަލުކުރަން ޕްރިމިއާ ލީގުން ވަނީ އަންގައިފަ އެވެ.
ޕްރިމިއާ ލީގުން އަމަލުކުރަމުން އަންނަ ސިއްހީ ޕްރޮޓޮކޯލްގައިވާ ގޮތުން އިންޑޯ ސަރަހައްދުގައި މާސްކް އެޅުން މަޖުބޫރުވާނެ އެވެ. ފަނަރަ މިނިޓަށް ވުރެ ގިނައިރު ކުޅުންތެރިއަކަށް ސިއްހީ އެހީތެރިކަމެއް ފޯރުކޮށްދޭނަމަ މެޑިކަލް ސްޓާފުން ތިބެންޖެހޭނީ ފުލް ޕީޕީއީ ކިޓްގައި ކަމަށް ވަނީ ކަނޑައަޅައިފަ އެވެ.
ދާދި ފަހުން ޕްރިމިއާ ލީގުން. ވަނީ ކްލަބްތަކާ އެކު ބައްދަލުވުމެއް ބާއްވައިފަ އެވެ. އެއީ ކޮވިޑާ ހެދި މި ފަސްކުރާ މެޗުތަކާ ބެހޭގޮތުން ގޮތްތަކެއް ކަނޑައެޅުމަށާއި އަދި ކުރިއަށް އޮތްތަނުގައި މެޗުތައް ފަސްކުރުމާ ބެހޭގޮތުން ގޮތެއް ނިންމުމަށެވެ. އެ ގޮތުން ކްލަބްތަކުން އެއްބަސްވީ ލީގު މެދުކަނޑާނުލައި، ހާލަތު ތަންދޭ މިންވަރަކުން މެޗުތައް ކުޅޭށެެވެ.
ކްލަބްތަކާ އެކު ޕްރިމިއާ ލީގުން ބޭއްވި ބައްދަލުވުމުގައި އަންގާފައިވަނީ ކުރިއަށް އޮތްތަނުގައި މެޗުތައް ލަސްކުރުމުގައި އަމަލުކުރަން ނިންމާފައިވަނީ ޔުއެފާ ޕްރޮޓޮކޯލަށް ކަމަށެވެ. ޔުއެފާ އިން އަމަލުކުރަމުން އަންނަ އުސޫލުގައިވާ ގޮތުން މަދުވެގެން 13 ކުޅުންތެރިން، ކީޕަރެއް ހިމެނޭ ގޮތަށް ކޮވިޑް-19 އަށް ޕޮޒިޓިވް ނުވެ، ޓީމެއްގައި ފިޓްކޮށް ހުރެފިނަމަ ޝެޑިއުލްގައިވާ މެޗު ކުޅެން ޖެހޭނެ އެވެ. އެކަމަކު، ކޮވިޑް ކޭސްތައް ގިނަ ކްލަބެއްގައި ފުރަތަމަ ޓީމުގައި ރަޖިސްޓްރީކޮށްފައިވާ ކީޕަރެއް ނެތިއްޖެ ހާލަތެއްގައި ނޫނީ ފިޓްކޮށް ތިބި 13 ކުޅުންތެރިން ވެސް އެ ޓީމެއްގައި ހަމަނުވާނަމަ މެޗު ޖެހޭނީ ފަސްކުރާށެވެ.
