މިހާރު ކުރިއަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގެ ފައިނަލް މެޗު ރ. އަތޮޅު އަލިފުށީ ޓާފް ދަނޑުގައި ކުޅެވޭތޯ މަޝްވަރާތަކެއް ކުރިއަށް ގެންގޮސްފި އެވެ.
އަލިފުށީ ކައުންސިލްގެ ރަސްމީ ސޯޝަލް މީޑިއާ އެކައުންޓްގައި މިއަދުގެ ތާރީހު ހިމަނައި ހިއްސާކޮށްފައިވާ ފޮޓޯޓަކުގައި ވާގޮތުން ޕްރެޒިޑެންޓްސް ކަޕްގެ ފައިނަލް މެޗު އަލިފުށީގައި ކުޅެވޭތޯ ކުރެވޭ މަސައްކަތުގެ ތެެރއިން މަޝްވަރާތަކެއް މިއަދު ވަނީ ކުރިއަށް ގެންގޮސްފަ އެވެ.
އަލިފުއްޓަށް ކުރި މި ދަތުރުގައި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ އާއި އެފްއޭއެމްގެ ކޮމްޕެޓިޝަން ޑިޕާޓްމަންޓްގެ ޝާހު އިސްމާއިލް (ސާޔާ) އާއި އިސްމާއިލް ރިޔާޒް އަންނަނީ ބައިވެރިވެ ވަޑައިގަންނަވަމުންނެވެ.
އަލިފުށީ ކައުންސިލާ އެކު އެފްއޭއެމާއި ޔޫތު މިނިސްޓްރީގެ އޮފިޝަލުން ބޭއްވި ބައްދަލުވުމުގެ ތެރެއިން.- ފޮޓޯ: އަލިފުށީ ކައުންސިލް
އެފްއޭއެމުން ބުނީ މަޝްވަރާތަކަށް ފަހު އަންނަ މަހު 23 ވަނަ ދުވަހު ކުޅޭ ޕްރެޒިޑެންޓްސް ކަޕްގެ ފައިނަލް މެޗު ބާއްވާނެ ތަނެއް ފައިނަލް ވެގެންދާނެ ކަމަށެވެ.
މި ފަހަރުގެ ޕްރެޒިޑެންޓްސް ކަޕްގައި ފުރަތަމަ ޑިވިޝަނުގެ އަށް ކްލަބް ކުޅޭއިރު، މުބާރާތް ކުރިއަށްދާނީ ލީގު ބުރެއް ކުޅެފައި އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާ ގޮތަށެވެ. ކޮންމެ ޓީމެއް މިހާތަނަށް ދެ މެޗު ކުޅެފައިވާއިރު، ދެ މެޗުން މޮޅުވެފައިވަނީ ވެލެންސިއާ އާއި މާޒިޔާ އެވެ.
ސަރުކާރުގެ ހަރަދުގައި އަލިފުށީގައި އެޅި ޓާފް ދަނޑު ނިމުނުކަން ރަސްމީކޮށް އިއުލާނުކުރީ މިދިޔަ އަހަރުގެ ސެޕްޓެމްބަރު މަހު 16 ވަނަ ދުވަހު ކުޅިވަރާ ބެހޭ ވަޒީރު އަހުމަދު މަހުލޫފް ކުރެއްވި ޓްވީޓެއްގަ އެވެ.
ރައީސުލް ޖުމްހޫރިއްޔާގެ ވާދައިގެ ތަށްޓައް ކުޅޭ ޕްރެޒިޑެންޓްސް ކަޕް މި ފަހަރު މި ކުޅެނީ ހަތަރު އަހަރުގެ މެދުކެނޑުމަކަށް ފަހު އެވެ. އެންމެ ފަހުން ޕްރެޒިޑެންޓްސް ކަޕް ބޭއްވީ 2017 ވަނަ އަހަރު އެވެ. އެ ފަަހަރުގެ ޗެމްޕިއަނަކީ ނިއު ރޭޑިއަންޓެވެ.
ޕްރެޒިޑެންޓްސް ކަޕްގެ ފައިނަލް މެޗު އެންމެ ފަހުން މާލޭން ބޭރުގައި ކުޅުނީ 2015 ވަނަ އަަހަރު އެވެ. އެ އަހަރު މިނިވަން ދުވަހުގެ ހަރަކާތްތައް ކުރިއަށްގެންދަން ގަލޮޅު ދަނޑުގެ ވިނަގަނޑު މަތީގައި އެޅި ރަބަރު ގަނޑެއްގެ ސަބަބުން ވިނަ ގަނޑު ހަލާކުވެގެން، އެ ފަހަރުގެ ޕްރެޒިޑެންޓްސް ކަޕް ކުޅުނީ ހދ. ކުޅުދުއްފުއްޓާއި ސ. ހިތަދޫގަ އެވެ. ފައިނަލް މެޗު ކުޅުނީ ހިތަދޫ ޒޯން ސްޓޭޑިއަމްގަ އެވެ. ނިއު ބަލިކޮށް ތަށި އުފުލާލީ މާޒިޔާ އިންނެވެ.
