ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިރޭ ކްލަބް ގްރީން ސްޓްރީޓްސް އަތުން 3-1 އިން މޮޅުވެ، ކްލަބް ވެލެންސިއާ މުބާރާތުގެ ލީގު ބުރުގެ ކުރިއަށް ޖެހިލައިފި އެވެ.
ލީގު ބުރުގައި މިހާތަނަށް ކޮންމެ ޓީމެއް ދެ މެޗު ކުޅެފައިވާއިރު، ދެ މެޗުން ވެސް މޮޅުވެފައިވަނީ ހަމައެކަނި ވެލެންސިއާ އާއި މާޒިޔާ އެވެ. ދެ ޓީމަށް ވެސް ހަ ޕޮއިންޓް ލިބިފައިވާއިރު، ވެލެންސިއާ ކުރީގައި އޮތީ ދެ ވަނައިގައި އޮތް މާޒިޔާ އަށް ވުރެ ލަނޑުގެ ތަފާތުން ކުރި ލިބޭތީ އެވެ.
ތިން ވަނައިގައި އޮތް ގްރީން އާއި ހަތަރެއްގައި އޮތް ސުޕަ ޔުނައިޓެޑް ސްޕޯޓްސް (ސަސް) އަދި ފަހެއްގައި އޮތް ޓީސީ އަށް ވަނީ ތިން ޕޮއިންޓް ލިބިފަ އެވެ. ހަ ވަނައިގައި އޮތް ދަ ގްރާންޑޭ އާއި ހަތް ވަނައިގައި އޮތް ޔުނައިޓެޑް ވިކްޓްރީ (ޔޫވީ) އަށް އެއް ޕޮއިންޓް ލިބިފައިވާއިރު، ޕޮއިންޓެއް ނުލިބި އީގަލްސް އޮތީ އެންމެ ފުލުގަ އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ލަނޑު ޖަަހަން އެންމެ ރަނގަޅު ފުރުސަތެއް ލިބުނީ ގްރީން ސްޓްރީޓްސްގެ އަންސަރު އިބްރާހިމް (އަންކޮ) އަށެވެ. އޭރިއާތެރެއިން ވެލެންސިއާގެ ދެ ޑިފެންޑަރުން ކައިރިން ދެމިގަތުމަށްފަހު ގޯލުގެ ކައިރީ ކަނަށް ޖަހަން އަންކޮ ފޮނުވާލި ބޯޅަ ބޭރުވީ ދަނޑީގައި ޖެހިފަ އެވެ. އޭގެ ފަހުން އޭރިއާ ބޭރުން ގްރީން ސްޓްރީޓްސްގެ އަބްދުﷲ ޔާމީން (ޔާނު) ޖެހި ބޯޅަ ވެލެންސިއާ ކީޕަރު މުހައްމަދު ފައިސަލް ވަނީ މަތަކޮށްފަ އެވެ.
ގްރީން ސްޓްރީޓްސްގެ ކީޕަރު ރަމީޒް ކައިރިން ވެލެންސިއާގެ ސެންޓޭ ބޯޅަ ގޯލަށް ފޮނުވާލަން މަސައްކަތް ކުރަނީ.-- ފޮޓޯ: މުހައްމަދު ޝާބިން/ އަދަދު
ވެލެންސިއާ އިން ލީޑުނެގީ މެޗުގެ 28 ވަނަ މިނިޓްގަ އެވެ. މި ލަނޑު ޖެހީ އެ ޓީމުގެ ކެޕްޓަން އަލީ ފާސިރު (ސެންޓޭ) އެވެ. ކޯނަރެއްގައި އަވަސް ކުޅުމަކަށް ފަހު ސެންޓޭ ގޯލުގެ ކައިރީ ކަނަށް ޖެހި ބޯޅަ ވަނީ ގްރީން ސްޓްރީޓްސްގެ ކީޕަރު އަހުމަދު ރަމީޒް އަތުގައި ޖެހިފަ އެވެ. އޭގެ ހަތަރު ވަރަކަށް މިނިޓް ފަހުން ސްޕެއިންގެ ފޯވާޑް ބޯހަސް މާޓިން ދިން ބޯޅަ އަކުން ސެންޓޭ ވަނީ އޭރިއާތެރެއިން ވެލެންސިއާ އަދި އޭނާގެ ދެ ވަނަ ގޯލު ޖަހައިފަ އެވެ. ފުރަތަމަ ހާފު ނިމުމުގެ ކުރިން ވެލެންސިއާ ތިން ވަނަ ގޯލެއް ޖަހައި، ހެޓްރިކް ހަދަން ލިބުނު ފުރުސަތުގެ ބޭނުން ސެންޓޭ އަށް ނުހިފުނެވެ.
ފުރަތަމަ ހާފުގައި ގްރީން ސްްޓްރީޓްސްގެ ކުޅުންތެރިން ވަނީ މެޗުގެ ރެފްރީ އަބްުދުﷲ ޝާތިރުގެ ނިންމުންތަކަށް ވަރަށް ބޮޑަށް ހިތްހަމަނުޖެހުން ފާޅުކޮށްފަ އެވެ.
ވެލެންސިއާ އިން ވަނީ ދެ ވަނަ ހާފު ފެށިގެން މިނިޓެއްގެ ތެރޭގައި ތިން ވަނަ ގޯލެއް ޖަހައިފަ އެވެ. މި ލަނޑަކީ ސެންޓޭ ނެގި ކޯނަރެއްގައި ގްރީން ސްޓްރީޓްސްގެ ކީޕަރު ރަމީޒް ބޯޅަ ހިފަން އުޅުމުގެ ތެރޭގައި އަތުން ދޫވި ވަގުތު ވެލެންސިއާގެ މިސްރު މިޑްފީލްޑަރު ހަލީލް ޖަމާލް ޖެހި ގޯލެކެވެ. ކުރިން ގްރީން ސްޓްރީޓްސް އަށް ކުޅުނު ހަލީލް މި ގޯލު ޖެހީ ފައުލުކޮށްފައި ކަމަށް ބުނެ ކީޕަރު. ރަމީޒް ވެސް ވަނީ އެޕީލް ކޮށްފަ އެވެ. އެކަމަކު، ރެފްރީ ޝާތިރު ނިންމީ ގޯލެއް ކަމަށެވެ.
ވެލެންސިއާގެ ހަލީލް (ކ) އަތުން ބޯޅަ ހޯދަން ގްރީން ސްޓްރީޓްސްގެ ސާއިފް މަސައްކަތްކުރަނީ.-- ފޮޓޯ: މުހައްމަދު ޝާބިން/ އަދަދު
ގްރީން ސްޓްރީޓްސް އިން ގޯލު ޖެހީ މެޗުގެ 80 ވަނަ މިނިޓްގައި ޕެނަލްޓީ އަކުން އެ ޓީމުގެ ކެޕްޓަން ރިލްވާން ވަހީދު (ރިލޭ) އެވެ. މި ޕެނަލްޓީ އަކީ ވެލެންސިއާގެ ކީޕަރު ފައިސަލް އޭރިއާތެެރެއިން ގްރީން ސްޓްރީޓްސްގެ އަލީ ޝާމިސް (ތޮއްޕޭ) އަށް ކުރި ފައުލަކަށް ރެފްރީ ޝާތިރު ދިން ޕެނަލްޓީ އެކެވެ. ޝާމިސް އަކީ ދާދި ފަހުން ގްރީން ސްޓްރީޓްސް އަށް ބަދަލުވި ކުޅުންތެރިއެކެވެ. އޭނާ މި މެޗުގައި ކުޅެން އެރީ ބަދަލެއްގެ ގޮތުގަ އެވެ.
މެޗުގެ ފަހު މިނިޓްގައި ހަލީލަށް ވަނީ ވެލެންސިއާ އަށް އިތުރު ގޯލެއް ޖަހައިދޭން ހުސް ފުރުސަތެއް ލިބިފަ އެވެ. އޭރިއާތެެރެއަށް ބޯޅަ ހިފައިގެން ހުސްކޮށް ވަދެ ހަލީލް މަސައްކަތް ކުރީ ކީޕަރު ރަމީޒް ބޯމަތިން ގޯލުގެ ތެރެއަށް ބޯޅަ އޮއްސާލުމަށެވެ. އެކަމަކު، ރަމީޒް ވަނީ އެ ބޯޅަ ހުއްޓުވައިފަ އެވެ.
އަނިޔާގެ ސަބަބުން ވެލެންސިއާގެ ފޯވާޑް އަލީ އަޝްފާގު (ދަގަނޑޭ) މިރޭގެ މެޗުގައި ވެސް ނުކުޅެ އެވެ.
ޕްރެޒިޑެންޓްސް ކަޕްގެ މެޗުތައް ދެން އޮންނާނީ އަންނަ ބުދަ ދުވަހު އެވެ. އެ ދުވަހު ހަވީރު ވެލެންސިއާ ކުޅޭނީ ދަ ގްރާންޑޭއާ އެވެ. އެރޭ ގްރީން ސްޓްރީޓްސް ބައްދަލުކުރާނީ ޔުނައިޓެޑް ވިކްޓްރީ (ޔޫވީ)އާ އެވެ.
