ނިއު ދިއްލީ، އިންޑިއާ (ޑިސެމްބަރު 25) - އިންޑިއާގެ ސްޕިން ބޯލިންގެ ސްޕެޝަލިސްޓް ހަރްބަޖަން ސިންގް ރިޓަޔާކޮށްފި އެވެ.
އުމުރުން 41 އަހަރުގެ ހަރްބަޖަންގެ އެންމެ ފަހުން ކުޅުނު މެޗަކީ މި އަހަރު އޭޕްރީލް މަހުގެ އިންޑިއަން ޕްރިމިއާ ލީގު (އައިޕީއެލް)ގައި ކޮލްކަތާ ރައިޑާސް އަށް ކުޅުނު މެޗެވެ. ހަރްބަޖަން އިންޑިއާ ގައުމީ ޓީމަށް ކުޅުން ހުއްޓާލީ 2016 ވަނަ އަހަރު އެވެ.
ހަރްބަޖަން ވަނީ އިންޑިއާ ގައުމީ ޓީމަށް ކުޅެދިން 367 މެޗުގެ ތެރެއިން ޓެސްޓް ކްރިކެޓްގައި 417 ވިކެޓާއި ވަން ޑޭ އިންޓަނޭޝަނަލް (އޯޑީއައި) ގައި 269 ވިކެޓް އަދި ޓީ20 ކްރިކެޓްގައި 25 ވިކެޓް ނަގައިފަ އެވެ.
ތޭވީސް އަހަރުވީ ކްރިކެޓް ކެރިއަރު ނިމުމަކަށް ގެނައިކަން ހަރްބަޖަން އިއުލާނުކުރީ ޓްވިޓާގަ އެވެ. އޭނާ ބުނީ ދިރިއުޅުމުގައި ހުރިހާ ކަމެއް ހާސިލްކޮށްދޭން އެހީތެރިވެދިނީ ކްރިކެޓް ކަމަށާއި އެކަން އަބަދުވެސް ހެޔޮހިތުން ދަންނާނެ ކަމަށެވެ.
"ވަރަށް ގިނަ ދުވަސްވެއްޖެ ރިޓަޔާމެންޓް އިއުލާނުކުރަން އުޅޭތާ. އެކަމަކު ރަނގަޅު ވަގުތަކަށް މަޑުކުރީ. ގަބޫލުކުރަނީ މިއީ އެ ވަގުތު ކަމަށް،" ހަރްބަޖަން ބުންޏެވެ.
ހަރްބަޖަން ވަނީ މި އަަހަރު އޭޕްރީލް މަހު ކަލްކަތާ ޓީމަށް އައިޕީއެލްގައި ތިން މެޗެއް ކުޅެފަ އެވެ. އެކަމަކު، ފިޓްނަސް ދަށްވުމުގެ ސަބަބުން ރަނގަަޅަށް ނުކުޅެވުނެވެ. އެ މެޗުތަކަކީ 2019 ވަނަ އަހަރު މެއި މަހަށް ފަހު ހަރްބަޖަން ކުޅުނު ފުރަތަަމަ މެޗުތަކެކެވެ.
އިންޑިއާ ކްރިކެޓް ތާރީހުގައި ވެސް ހާއްސަ ކުޅުންތެރިއެއް ކަމަށްވާ ހަރްބަޖަން އަކީ ޓެސްޓް ކްރިކެޓުގެ ތާރީހުގައި ދެ ވަނަ އަށް އެންމެ ގިނަ ވިކެޓް ނަގާފައިވާ އޮފް ސްޕިނާ އެވެ. އޭނާ އަކީ 2011 ވަނަ އަހަރު ކްރިކެޓް ވޯލްޑް ކަޕް ކާމިޔާބު ކުރި އިންޑިއާ ޓީމުގެ ކުޅުންތެރިއެކެވެ.
ހަރްބަޖަން ވަނީ ކަލްކަތާ ޓީމުގެ އިތުރުން ޗެންނާއީ ސުޕަ ކިންގްސް އާއި މުމްބާއީ އިންޑިއަންސް ޓީމަށް ވެސް އައިޕީއެލްގައި ކުޅެފަ އެވެ.
