ޓީސީ ސްޕޯޓްސް ކްލަބް ކައިރިން 3-1 އިން ކުރިހޯދައި ސުޕަ ޔުނައިޓެޑް ސްޕޯޓްސް (ސަސް) އިން ޕްރެޒިޑެންޓްސް ކަޕްގައި ފުރަތަމަ ފަހަރަށް މޮޅެއް ހޯދައިފި އެވެ.
މިދިޔަ ސީޒަނުގައި އަލަށް ފުރަތަމަ ޑިވިޝަނުގައި ވާދަކުރަން ފެށި ސަސް އިން ޕްރެޒިޑެންޓްސް ކަޕްގައި ކުޅުނު ފުރަތަމަ މެޗުން ވަނީ މާޒިޔާ އަތުން 2-0 އިން ބަލިވެފަ އެވެ. ފުރަތަމަ މެޗުން ކްލަބް އީގަލްސް އަތުން 1-0 އިން މޮޅުވި، ޓީސީ ބަލިކޮށް، ސަސް އިން ސީޒަނުގެ ފުރަތަމަ މޮޅު ހޯދިއިރު، މިއީ ސަސްއާ މި ފަހަރު ހަވާލުވި ކޯޗު އިސްމާއިލް މަހަފޫޒްގެ އިރުޝާދުގެ ދަށުން އެ ޓީމު މޮޅުވި ފުރަތަމަ މެޗެވެ.
ގަލޮޅު ދަނޑުގައި މިއަދު ކުޅުނު މެޗު ފަށައިގެން 35 ވަަނަ މިނިޓްގައި ސަސް އަށް ލީޑުނަގައިދިނީ ކުރިން ޓީސީ އަށް ކުޅުނު އައިހަމް އަހުމަދު (އައިހު) އެވެ. އޭރިއާތެރެއަށް ހުސްކޮށް ބޯޅަ ހިފައިގެން ވަދެ އައިހު މި ގޯލު ޖެހީ ޓީސީ ކީޕަރު އާދަމް އިމްއާން ކައިރިން ނައްޓާފަ އެވެ.
ފުރަތަމަ ހާފު ނިމުމުގެ ކުރިން ސަސްގެ ދެ ވަނަ ގޯލު ޖެހީ ވެސް ކުރިން ޓީސީ އަށް ކުޅުނު ކުޅުންތެރިއެކެވެ. މި ފަހަރު ގޯލު ޖެހީ އިބްރާހިމް އަތީގް ހަސަން (އިއްބެ) އެވެ. މަތިން ހުރަސްކޮށްލި ބޯޅައެއް ހިފައިގެން އޭރިއާތެރެއަށް ވަދެ އިއްބެ ވަނީ ގޯލުގެ މަތީ ކަނަށް ބޯޅަ ފޮނުވާލައިފަ އެވެ.
މެޗުގެ 68 ވަނަ މިނިޓްގައި ޓީސީގެ ފޯވާޑް ތޮލާލް ނަސީރު ވަނީ ހިލޭ ޖެހުމަކުން މޮޅު ގޯލެއް ޖަހައިފަ އެވެ. ތޮލާލް ޖެހި ބޯޅަ ގޯލަށް ވަންއިރު ސަސްގެ ކީޕަރު މުހައްމަދު ޝަފީއު (ޗެކް) އަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ. އެކަމަކު، ޝަފީއު ވަނީ މި މެޗުގައި ޓީސީގެ ހަސަން އީނާޒް ޖެހި ޕެނަލްޓީއެއް މަތަކޮށްފަ އެވެ.
ސަސްގެ ފަހު ގޯލު ޖެހީ ވެސް މެޗުގެ މޮޅު ކުޅުންތެރިޔާ އިއްބެ އެވެ. ހިލޭ ޖެހުމަކުން ސަސްގެ ޔަސްފާދު ހަބީބު (މުލަކޭ) ނެގި ހުރަހެއް އެ ޓީމުގެ އަބްދުﷲ ހަނީފް (ބެންޖޯ) ގޯލަށް ފޮނުވާލުމުން ކީޕަރު އިމްއާން އަތުގައި ޖެހިފައި ނުކުތްވަގުތު އިއްބެ ވަނީ ގޯލަށް ބޯޅަ ފޮނުވާލައިފަ އެވެ.
މުބާރާތުގައި މިރޭ ކުޅޭ މެޗުގައި ކްލަބް އީގަލްސް ކުޅޭނީ މާޒިޔާއާ ދެކޮޅަށެވެ.
