މިލާން (ޑިސެމްބަރު 23) - އިޓާލިއަން ލީގުގައި ރޭ ސްޕެޒިއާ އަތުން 1-0 އިން ނަޕޯލީ ބަލިވިއިރު، އެމްޕޮލީގެ މައްޗަށް 4-2 އިން ކުރިހޯދައި އޭސީ މިލާން ލީގުގެ ދެ ވަނަ އަށް ޖެހިލައިފި އެވެ.
މި މެޗުތަކަށް ފަހު އިޓާލިއަން ލީގު ވަނީ އާ އަހަރާ ދިމާކޮށް ފިނި މޫސުމަށް ބްރޭކެއް ނަގައިފަ އެވެ. ލީގު މެދުކަނޑާލިއިރު، އެއް ވަނައިގައި އޮތީ އެންމެ ފަހުގެ ޗެމްޕިއަން އިންޓަ މިލާން އެވެ. އިންޓަ އަށް 19 މެޗުން 46 ޕޮއިންޓް ލިބިފަ އެވެ. ދެ ވަނައިގައި އޮތް މިލާނަށް ވަނީ 19 މެޗުން 42 ޕޮއިންޓް ލިބިފަ އެެވެ. ތިން ވަނައިގައި އޮތް ނަޕޯލީ އަށް 19 މެޗުން 39 ޕޮއިންޓް ލިބިފައިވާއިރު، ހަތަރެއްގައި އޮތް އެޓަލަންޓާ އަށް ވަނީ 19 މެޗުން 38 ޕޮއިންޓެވެ. ފަސް ވަނައިގައި އޮތް ޔުވެންޓަސް އަށް ވަނީ 19 މެޗުން 34 ޕޮއިންޓް ލިބިފަ އެވެ.
އަމިއްލަ ދަނޑުގައި ކުޅުނު ނަޕޯލީ އަތުން ސްޕެޒިއާ މޮޅުވި ގޯލަކީ ފުރަތަމަ ހާފުގެ ފަހުކޮޅުގައި ނަޕޯލީގެ ހުއާން ޖީސޫސް އަތުން ބައިކޮޅަށް ވަން ގޯލެކެވެ. މި ނަތީޖާ އަށް ފަހު ރެލިގޭޝަނުގައި އޮތް ސްޕެޒިއާ ވަނީ ހަ މެޗަށް ފަހު މޮޅެއް ހޯދައިފަ އެވެ. ސްޕެޒިއާ އޮތީ 19 މެޗުން ހޯދި 16 ޕޮއިންޓާ އެކު ލީގުގެ 17 ވަނައިގަ އެވެ.
އެމްޕޮލީ ދަނޑުގައި ކުޅުނު މެޗުގައި މިލާނަށް 12 ވަނަ މިނިޓްގައި ލީޑުނަގައިދިނީ އޮލިވީއޭ ޖިރޫޑް ދިން ބޯޅައަކުން ފްރޭންކް ކެސިއޭ އެވެ. އޭގެ ހަ މިނިޓް ފަހުން އެމްޕޮލީގެ ނަދީމް ބެޖްރާމީ ވަނީ ގޯލެއް ޖަހައި އެ ޓީމަށް އެއްވަރުކޮށްދީފަ އެވެ. ފުރަތަމަ ހާފު ނިމުމުގެ ކުރިން ކެސިއޭ އިތުރު ގޯލެއް ޖަހައި މިލާނަށް އަލުން ލީޑުނަގައިދިނެވެ.
ދެ ވަނަ ހާފުގައި މިލާންގެ އަނެއް ދެ ގޯލު ޖެހީ އަލެސަންދްރޯ ފްލޮރެންޒީ އާއި ތިއޯ ހެނާންޑޭޒް އެވެ. އިތުރު ވަގުތުގައި އެމްޕޮލީގެ އަންދްރޭ ޕިނަމޮންޓީ ވަނީ ޕެނަލްޓީ އަކުން އެމްޕޮލީގެ ދެ ވަނަ ގޯލު ޖަހައިފަ އެެވެ.
މިލާންގެ ކޯޗު ސްޓެފާނޯ ޕިއޯލީ ބުނީ ލީގުގެ ކޮންމެ މޮޅަކީ ވެސް މުހިއްމު ތިން ޕޮއިންޓް ކަމަށާއި އެކަމަކު، ބައެއް ކަހަލަ މެޗުތަކުން ލިބޭ ތިން ޕޮއިންޓްގެ ފައިދާ ސީޒަން ނިމުމުން ފެންނާނެ ކަމަށެވެ. އެ ގޮތުން ބަލާއިރު، އެމްޕޮލީ އަތުން މި ލިބުނު މޮޅު މުހިއްމުވާނެ ކަމަށް ޕިއޯލީ ބުންޏެވެ.
ފިނި މޫސުމުގެ ބްރޭކަށް ފަހު އިޓާލިއަން ލީގުގެ މެޗުތައް ދެން ފަށާނީ އަންނަ މަހުގެ ހަ ވަނަ ދުވަހު އެވެ.
