ކ. މާފުށްޓައް ނިސްބަތްވާ ގިނަ ޒުވާނުންތަކެއް ގޮވައިގެން ދަ ގްރާންޑޭ ޓީމު އެކުލަވާލައި، ފުރަތަމަ ޑިވިޝަން ޓީމުތަކާ ދެކޮޅަށް ކުޅުމަކީ ފުޓްބޯޅައިގައި އޭނާ ކުރާ އެންމެ ޗެލެންޖް ބޮޑު މަސައްކަތް ކަމަށް ދަ ގްރާންޑޭގެ ކޯޗު އަހުމަދު ނާޝިދު (ނާދު) ބުނެފި އެވެ.
މާފުށީ ދަނޑުގައި ޓްރެއިނިންތައް ކުރިއަށްގެންދާ ދަ ގްރާންޑޭ ޓީމުގައި ގިނަ އަދަދަކަށް ތިބީ ވެސް އެ ރަށުގެ ކުޅުންތެރިންނެވެ. އާންމު ގޮތެއްގައި ފުޓްސަލް ކުޅެމުން އައި ކުޅުންތެރިންތަކެއް ލައިގެން ފުޓްބޯޅައިގެ އެންމެ މަތީ ޑިވިޝަނުގައި ވާދަކުރަން ތައްޔާރުވާން ނާދު އަށް ލިބުނީ ވިއްސަކަށް ދުވަހުގެ ޕްރީ ސީޒަން ޓްރެއިނިން މުއްދަތެވެ. މިއަދު ހަވީރު ޕްރެޒިޑެންޓްސް ކަޕްގައި ދަ ގްރާންޑޭ ކުޅޭނީ ކްލަބް ގްރީން ސްޓްރީޓްސްއާ އެވެ.
"އަޅުގަނޑު ބުނާނީ މިއީ ވަރަށް ބޮޑު ޗެލެންޖެކޭ. އަތުގައި ހިފައިގެން ގޮސް ޓްރެއިން ކުރަން މި ޖެހެނީ ތަންތަނަށް ލައިދީފައި. މި އަދި ފުރަތަމަ ޑިވިޝަނުގައި ނުކުރާވަރުގެ ތަޖުރިބާއެއް މި ކުރަނީ. ވަރަށް ބޮޑަށް ކިޔައިދޭން އެބަޖެހޭ،" މިއަދުގެ މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ނާދު ބުންޏެވެ.
"ޓީމު ދަނޑުމަތީގައި ތިބޭނީ ކިހިނެއްތޯ. އެއީ ބޮޑު ފުޓްބޯޅަ ނުކުޅޭތީވެ، ވަރަށް އުނދަގޫ. ބޭސިކް ހުރިހާ އެއްޗެއް އެބަ ކިޔައިދެން. މިހާރު ވަރަށް ބޮޑަށް ކިޔައިދީގެން ރަނގަޅު އެބަވޭ. ޓީމު ދަނޑުމަތީގައި ހުންނައިރު، ފުޓްބޯޅަ ޓީމެއްގެ ބައްޓަން މިހާރު ފެންނާނެ،"
ނާދުގެ ބެލުމުގެ ދަށުން ދަ ގްރާންޑޭ ޕްރެކްޓިސް ފެށީ މިދިޔަ މަހު 27 ގަ އެވެ. ނާދު ބުނީ ފަރިތަކުރަން ލިބުނު މުއްދަތު އާންމުކޮށް ޕްރީ ސީޒަނަކަށް ބޭނުންވާ ވަގުތަށް ވުރެ ކުޑަ ކަމަށެވެ. މިހާތަނަށް ޓީމު އެކުލަވާލުމުގައި ފެނުނު މައްސަލަ އަކީ ޑިފެންސިވް މަގާމުތަކަށް ރަނގަޅު ކުޅުންތެރިން މަދުވުން ކަމަށާއި ޕްރެޒިޑެންޓްސް ކަޕްގެ ވަކި ހިސާބަކުން ބިދޭސީ ކުޅުންތެރިން ގެންނާނީ އެ މަގާމްތަކަށް ކަމަށެވެ.
ގްރާންޑޭ ޓީމުގައި ހިމެނޭ ގިނަ ކުޅުންތެރިންނަކީ މާފުށީ އެކި ވަޒީފާތަކުގައި އުޅޭ ކުދިން ކަމަށްވާތީ ހުރިހާ ކުޅުންތެރިންނަށް ގަވާއިދުން ޕްރެކްޓިހުގައި ބައިވެރިވުމަށް އުނދަގޫތަކެއް އެބަހުއްޓެވެ. އެކަމަކު، ކުޅުންތެރިންގެ ފަރާތުން ޕްރެކްޓިހަށް ޖުމްލަކޮށް ލިބޭ އެއްބާރުލުން ރަނގަޅުކަން ނާދު ފާހަގަކުރި އެވެ.
އިއްޔެ ބޭއްވި ނޫސްވެރިންގެ ބައްދަލުވުމުގެ ތެރެއިން ނާދު ވާހަކަ ދައްކަނީ.-- ފޮޓޯ: މުހައްމަދު ޝާބިން/ އަދަދު
ރަށެއްގައި ފުޓްބޯޅަ ފޯރި އާލާކޮށް ފުރަތަމަ ޑިވިޝަނުގައި ރަށެއްގެ ރޫހުގައި ވާދަކުރުމަކީ ފުޓްބޯޅަ އަށް ވެސް އޭގެ ފައިދާތަކެއް ލިބިގެންދާނެ ކަމެއް ކަމުގައި ނާދު ގަބޫލުކުރެ އެެވެ.
"މިއީ ވަރަށް ރަނގަޅު ފެށުމެއް ފުޓްބޯޅަ އަށް. މާފުށީގައި މިހެން ޓީމެއް ބާއްވައިގެން ކުރިއަށް ދިއުމަކީ ފުޓްބޯޅަ އަށް ކުރިއެރުމެއް،" ކުރިން ފުރަތަމަ ޑިވިޝަނުގެ ވެލެންސިއާ އާއި އޯލްޔޫތުލިންކް އޭޖް އަދި ވިކްޓަރީގައި ވެސް މަސައްކަތްކުރި ނާދު ބުންޏެވެ.
ޕްރެޒިޑެންޓްސް ކަޕްގެ ފުރަތަމަ މެޗުގައި ދަ ގްރާންޑޭ މިއަދު ހަވީރު ކުޅޭނީ ކްލަބް ގްރީން ސްޓްރީޓްސްއާ އެެވެ. ގްރީން ސްޓްރީޓްސް އިން ޕްރީ ސީޒަނުގައި މިހާތަނަށް ރަނގަޅަށް ކުރީ ފަސް ވަރަކަށް ޕްރެކްޓިހެވެ.
ނާދު ބުނީ ގްރީން ސްޓްރީޓްސްގެ ތައްޔާރީތަކާ މެދު ނުވިސްނާނެ ކަމަށާއި ދަ ގްރާންޑޭ އިން މެޗަށް ނުކުންނާނީ މިދިޔަ އަހަރު ލީގުގެ ތިން ވަނަ ހޯދި ގްރީން ސްޓްރީޓްސްއާ ކުޅެން ކަމަށެވެ.
"ގްރީން އަކީ މިދިޔަ އަހަރު ވެސް ލީގުގެ ތިން ވަނަ ޓީމު. އަޅުގަނޑުމެން ނުކުންނާނީ ތިން ވަަނަ ޓީމުކަން ދެކިގެން ވަރުގަދަކޮށް. އެކަން ވަރަށް ބޮޑަށް އެބަ ވިސްނަދެން ޓީމުގެ ހުރިހާ ޕްލޭޔަރުންނަށް ވެސް. މި ކުރިމަތިލާން މި ޖެހެނީ އެތައް ދުވަހަކު މި ދަނޑުގައި ކުޅެފައި ތިބި ބަޔަކާކަން ވެސް އެބަ އެނގޭ،" ނާދު ބުންޏެވެ.
"މީގެ (މި ޓީމުގައި) ތިބޭނީ މި ދަނޑަށް އަދި މި ކަހަލަ މުބާރާތަކަށް އަދި ފުރަތަމަ ޑިވިޝަން ކުޅުންތެރިންތަކެއް ކުރިމަތީ ކުޅެން އާ ކުޅުންތެރިންތަކެއް. މިއީ ޓީމަށް ލިބޭނެ އުނދަގުލެއް ވިޔަސް ވަރަށް ބޮޑަށް ކިޔައިދީގެން ރަނގަޅު ކުރަމުން މި އަންނަނީ،"
ޕްރެޒިޑެންޓްސް ކަޕްގެ މި މެޗުތަކަކީ ދަ ގްރާންޑޭގެ ކުޅުންތެރިންނަށް ފުރަތަމަ ޑިވިޝަނުގެ ކުޅުމުގެ މުހިއްމު ތަޖުރިބާތަކެއް ހޯދަން ބޭނުންހިފޭނެ މެޗުތަކެއް ކަމަށް ނާދު ގަބޫލުކުރެ އެވެ.
ނާދު ބުނީ އަންނަ ފެބްރުއަރީ މަހު ދިވެހި ޕްރިމިއާ ލީގު ފަށާއިރު، ޕްރެޒިޑެންޓްސް ކަޕުން ދަސްވާ ކަންކަމަށް ބަލައި ދަ ގްރާންޑޭ ރަނގަޅު ލެވަލަކަށް ގެންދެވިދާނެ ކަމަށެެވެ.
ދަ ގްރާންޑޭ އާއި ކްލަބް ގްރީން ސްޓްރީޓްސް ކުޅޭ މެޗު ފަށާނީ މިއަދު ހަވީރު ހަތަރެއް ޖަހާއިރު އެވެ.
