ގައުމީ ގްރޯން ޕްރީ މުބާރާތުގައި ގައުމީ ދެ ރެކޯޑް މުގުރާލި އާމިނަތު ޖާއިޝާ ޖުނީޒް، އަންހެން އެންމެ މޮޅު އެތުލީޓަކަަށް ހޮވުނުއިރު، ފިރިހެން ބައިން އެންމެ މޮޅު އެތުލީޓުގެ މަގާމު ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު އަށް ލިބިއްޖެ އެވެ.
މިއީ މި ދެ އެތުލީޓުންނަށް ވެސް ގްރޯން ޕްރީގެ އެއް ވަނަ އެތުލީޓުގެ މަގާމު ހޯދި ފުރަތަމަ ފަހަރެވެ. ޖާއިޝާ އާއި ސާއިދު ވަނީ ގްރޯން ޕްރީގެ ޕޮއިންޓް ރޭންކިން ސިސްޓަމަށް ބަލާއިރު، އެންމެ ކުރިހޯދައިފަ އެވެ. ގްރޯން ޕްރީގެ ޕޮއިންޓް ދޭ އުސޫލަށް ބަލާއިރު، ރަން މެޑަލަކަށް ވަކި އަދަދަކަށް ޕޮއިންޓް ލިބޭނެ އެވެ. އަދި ގައުމީ ރެކޯޑެއް ހަދައިފިނަމަ އެ ރެކޯޑަކަށް ޕޮއިންޓް ދޭނީ މުބާރާތުގެ ގަވާއިދުގައިވާ އުސޫލުން ބެލުމަށް ފަހު އެެވެ.
ޖާއިޝާ ވަނީ މި ފަހަރުގެ މުބާރާތުން ތިން ރަން މެޑަލް ހޯދައިފަ އެވެ. އެއީ 1500 މީޓަރާއި 800 މީޓަރު އަދި 3000 މީޓަރުގެ ދުވުމުންނެވެ. އެންމެ ފަހުން 2019 ވަަނަ އަހަރުގެ ގްރޯން ޕްރީގެ އެއް ވަނަ ހޯދި އައިޝަތު ހިމްނާ ހަސަން ވެސް ވަނީ 100، 200، 400 މީޓަރު ދުވުމުން ރަން މެޑަލް ހޯދައިފަ އެވެ.
ޖާއިޝާ މި ފަހަރު 1500 މީޓަރު ވުމުގެ ރެކޯޑް އާ ކުރީ އިއްޔެ ހުޅުމާލޭ ސިންތެޓިކް ޓްރެކުގައި ކުރިއަށް ދިޔަ ގްރޯ ޕްރީގެ އިވެންޓްގައި ވާދަކޮށް 5:05.63 ޓައިމިން އަކުން ރޭސް ނިންމައިގެންނެވެ. އަދި މިއަދު ޖާއިޝާ ވަނީ 3000 މީޓަރުގެ، 16 އަހަރުވީ ރެކޯޑް މުގުރާލައިފަ އެވެ. އެއީ 11 މިނިޓް 15.18 ސިކުންތުން ރޭސް ނިންމައިގެންނެވެ. އެ ރެކޯޑް ކުރިން އޮތީ 2005 ވަނަ އަހަރު ގައުމީ އެތުލެޓިކްސް މުބާރާތުގައި 12 މިނިޓް 03.2 ސިކުންތުން ރޭސް ނިންމި ފާތިމަތު ހަޝްމާ އަބްދުލް އަޒީޒް އަތުގަ އެވެ.
މި ފަހަރު 1500 މީޓަރު ރޭހުގައި ޖާއިޝާއާ ވާދަކޮށް ދެ ވަނަ އަށް ދިޔައީ ފަސް މިނިޓް 17.52 ސިކުންތުން ރޭސް ނިންމި މަރިޔަމް އަބްދުލް ކަރީމް (މަރީ) އެވެ. މި ރޭހުގެ ތިން ވަނަ އަށް ދިޔައީ ފަސް މިނިޓް 37.13 ސިކުންތުން ރޭސް ނިންމި އައިޝަތު ރާނިޔާ އެވެ. ތިން ހާސް މީޓަރުގެ ރޭހުގައި ޖާއިޝާ ފަހަތުން ދެ ވަނަ ހޯދީ 11 މިނިޓް 26.55 ސިކުންތުން ރޭސް ނިންމި މަރީ އެވެ. ތިން ވަނަ ހޯދި ރާނިޔާ ރޭސް ނިންމީ 12 މިނިޓް 29.57 ސިކުންތުންނެވެ.
މިއަދު ބޭއްވި 800 މީޓަރުގެ ރޭހުގެ އެއް ވަނަ ޖާއިޝާ ހޯދީ ދެ މިނިޓް 30.30 ސިކުންތުން ރޭސް ނިންމައިގެންނެވެ. ދެ ވަނަ އަށް ދިޔަ ރާނިޔާ ރޭސް ނިންމީ ދެ މިނިޓް 38.97 ސިކުންތުންނެވެ. އަދި ތިން ވަނަ ހޯދި އައިމިނަތު ޝަމްހާ ޝަރީ ރޭސް ނިންމީ ދެ މިނިޓް 44.21 ސިކުންތުންނެވެ.
ގްރޯން ޕްރީގެ ފުރަތަމަ ދެ އަހަރު އެންމެ މޮޅު ފިރިހެން އެތުލީޓް ހޯދި ހުސެއިން ފަޒީލް ހާރޫން މި ފަހަރު ވާދަނުކުރެ އެވެ. އޭނާ މި ފަހަރުގެ މުބާރާތުގައި ވާދަނުކުރަނީ ވަޒީފާ އަދާކުރަމުން އަންނަ ސިފައިންގޭގެ ތަމްރީނެއްގައި ގައުމުން ބޭރުގައި ހުރުމުންނެވެ. ފަޒީލަށް އެންމެ ފަހުން ބޭއްވި ގްރޯން ޕްރީގެ އެއް ވަނަ އެތުލީޓުގެ މަގާމު ލިބުނު ސަބަބަކީ މުގުރާލި ރެކޯޑާ އެކު އޭނާ އަށް ޕޮއިންޓް ގިނަ ވުމުންނެވެ.
ސާއިދު ފުރަތަމަ ފަހަރަށް ގްރޯން ޕްރީގެ އެއް ވަނަ އެތުލީޓުގެ މަގާމު ހޯދީ ތިން އިވެންޓުން ރަން މެޑަލް ހޯދައިގެންނެވެ. އިއްޔެ ހަވީރު ފުރަތަމަ ކުރިއަށްދިޔަ ފިރިހެނުންގެ 100 މިޓަރު ދުވުމުގެ އެއް ވަނަ ހޯދި ރާއްޖޭގެ އެންމެ ބާރު ދުވުންތެރިޔާ ސާއިދު ރޭސް ނިންމީ 10.76 ސިކުންތުންނެވެ. ދެ ވަނަ އަށް ދިޔަ އިބާދުﷲ އާދަމް ރޭސް ނިންމީ 11.00 ސިކުންނެވެ. މި ރޭހުން ތިން ވަނަ ހޯދީ ޓްރެކް އެންޑް ފީލްޑް ސްޕޯޓްސް އިން ވާދަކޮށް 11.37 ސިކުންތުން ރޭސް ނިންމި މުހައްމަދު މިންހާލް އެވެ.
އިއްޔެ ކުރިއަށްދިޔަ ފިރިހެނުންގެ 400 މީޓަރުގެ ރޭސް ވެސް ކާމިޔާބުކުރީ ސާއިދު އެވެ. ސާއިދު މި ރޭސް 49.39 ސިކުންތުން ނިންމިއިރު، އޭނާއާ ވާދަކުރި ސިފައިންގޭގެ އަބްދުﷲ ރަޝީދު ރޭސް ނިންމީ 50.78 ސިކުންތުންނެވެ. ތިން ވަނަ އަށް ދިޔައީ ސާއިދު ސްޕޯޓްސް އިން ވާދަކުރި އަހްމަދު ވިސާމް އެވެ. އޭނާ ރޭސް ނިންމީ 50.93 ސިކުންތުންނެވެ.
ސާއިދު މިއަދު ވާދަކުރީ 200 މީޓަރު ރޭހުގަ އެވެ. އޭނާ އެ ރޭސް ކާމިޔާބުކުރީ 21.95 ސިކުންތުން ރޭސް ނިންމައިގެންނެވެ. ދެ ވަނަ އަށް ދިޔަ އިބާދުﷲ ރޭސް ނިންމީ 22.26 ސިކުންތުންނެވެ. އަދި ތިން ވަނަ ހޯދި މުހައްމަދު މިންހާލް ޝާމިލް ރޭސް ނިންމީ 23.11 ސިކުންތުންނެވެ.
މިއަދު ބޭއްވި ފިރިހެނުންގެ 800 މީޓަރުގެ ރޭސް ކާމިޔާބުކުރީ ސާއިދު ސްޕޯޓްސްގެ އަހުމަދު ވިސާމް އެވެ. ސިފައިންގެ ކްލަބްގެ ހުސެއިން ރިޒާ (ކުޑަ ރިޒާ) ފަހަތައް ޖައްސާލައި ވިސާމް ރޭސް ނިންމީ 2 މިނިޓް 00.89 ސިކުންތުންނެވެ. ދެ ވަނަ އަށް ދިޔަ ކުޑަ ރިޒާގެ ޓައިމިން އަކީ ދެ މިނިޓް 02. 27 ސިކުންތެވެ.
ފަަނަރަ ސަތޭކަ މީޓަރު އިވެންޓްގައި ދިވެހި ސިފައިންގެ ކްލަބްގެ ހުސެއިން ރިޒާ (ކުޑަ ރިޒާ) ވަނީ ތަފާތު ދައްކައިފަ އެވެ. އޭނާ އަށް ހަތަރު ސަތޭކަ މީޓަރު ރޭހުގައި ލިބުނީ ހަތަރު ވަނަ އެވެ. އެކަމަކު، 1500 މީޓަރުގެ ރޭސް ހަތަރު މިނިޓް 21.88 ސިކުންތުން ނިންމައި، ރަން މެޑަލް ހޯދި އެވެ. މި އިވެންޓުން ދެ ވަަނަ އަށް ދިޔައީ މެރަތަން ރަނާސް މޯލްޑިވްސްގެ ޔޫސުފް އިބްރާހިމް އެވެ. އަދި ތިން ވަނަ އަށް ދިޔައީ ހަމަ އެ ޓީމުގެ މުހައްމަދު އިރުފާން އެވެ. ޔޫސުފް ރޭސް ނިންމީ ހަތަރު މިނިޓް 23.88 ސިކުންތުންނެވެ. އަދި އިރުފާން ރޭސް ނިންމީ ހަތަރު މިނިޓް 28.24 ސިކުންތުންނެވެ.
