މިލާން (ޑިސެމްބަރު 18) - އިޓާލިއަން ލީގުގެ ފުލުގައި އޮތް ސެލަނިޓާނާ އަތުން އިންޓަ މިލާނުން 5-0 އިިން ބޮޑު މޮޅެއް ހޯދައި ކްލަބްގައި ތާރީހީ ރެކޯޑެއް ގާއިމްކޮށްފި އެވެ.
އިންޓަ އިން ރޭގެ މެޗުގައި ޖެހި ގޯލުތަކާ އެކު ވަނީ 2021 ވަނަ އަހަރު ޖުމްލަ އެއްކޮށް ލީގުގައި 103 ގޯލު ޖަހައިފަ އެވެ. މިއީ އެ ކްލަބްގެ ތާރީހުގައި ކަލަންޑަރު އަހަރެއްގައި ލީގުގައި މި އަދަދަށް ގޯލު ޖެހި ފުރަތަމަ ފަހަރެވެ. ކުރިން އިންޓަގެ ކަލަންޑަރު އަހަރެއްގައި އެންމެ ރަނގަޅު ލީގުގެ ގޯލު ރެކޯޑަކީ 1950 ވަނަ އަހަރު ޖެހި 99 ގޯލެވެ.
ސެލަނިޓާނާ ދަނޑުގައި ރޭ ކުޅުނު މެޗުގައި ހަކަން ޗަނޮނޮގްލޫ ދިން ބޯޅައަކުން އިންޓަ އަށް ލީޑުނަގައިދިނީ ކްރޮއޭޝިއާގެ ވިންގް، އިވާން ޕެރިސިޗް އެވެ. ފުރަތަމަ ހާފު ނިމުމުގެ ކުރިން ނެދަލެންޑްސްގެ ފުލްބެކް ޑެންޒެލް ޑަމްފްރީސް ވަނީ އިންޓަގެ ދެ ވަަނަ ގޯލު ޖަހައިފަ އެވެ. މިއީ އެޑިން ޒެކޯ ދިން ބޯޅައަކުން ޑަމްފްރީސް އޭރިއާތެރެއިން ވައްދާލި ގޯލެކެވެ.
ދެ ގޯލުގެ ލީޑެއްގައި އިންޓަ އިން ފުރަތަމަ ހާފު ނިންމާލި ނަމަވެސް މި ހާފުގައި ވެސް އެ ޓީމަށް ގިނަ ގޯލުތަކެއް ޖަހަން ފުރުސަތު ލިބުނެވެ.
އިންޓަ އިން ވަނީ ދެ ވަނަ ހާފުގައި ގޯލު ޖަހަން ލިބުނު ފުރުސަތުތަކުގެ ބޭނުން ހިފައިފަ އެވެ. އެ ގޮތުން ދެ ވަނަ ހާފްގެ ކުޅުން ފެށިގެން ހަ ވަނަ މިނިޓްގައި ޗަނޮނޮގްލޫ ދިން ބޯޅައަކުން އިންޓަގެ ދެ ވަނަ ގޯލު ޖެހީ އަލެކްސިސް ސަންޗޭޒް އެވެ. އިންޓަ އިން ފަހު ދެ ގޯލު ޖެހީ ލަޓާރޯ މާޓީނޭޒް އާއި ރޮބާޓޯ ގަގްލިއަޑީނީ އެވެ.
މި ނަތީޖާއާ އެކު އިންޓަ އިން ވަނީ ލީގުގެ އެއް ވަނައިގައި ހަތަރު ޕޮއިންޓަށް ލީޑުފުޅާކޮށްފަ އެވެ. އެއީ 18 މެޗުން 43 ޕޮއިންޓް ހޯދައިގެންނެވެ. ދެ ވަނައިގައި އޮތް އޭސީ މިލާނަށް 17 މެޗުން ވަނީ 39 ޕޮޮއިންޓް ލިބިފަ އެވެ.
މިލާން ދެން ކުޅޭ މެޗުގައި މާދަމާރޭ ބައްދަލުކުރާނީ ހަތަރު ވަނައިގައި އޮތް ނަޕޯލީއާ އެވެ. ނަޕޯލީ ހަތަރު ވަނައިގައި އޮތީ ތިން ވަނައިގައި އޮތް އެޓަލަންޓާ އަށް ވުރެ އެއް ޕޮއިންޓް މަދުން ހޯދައިގެންނެވެ. އެޓަލަންޓާ އަށް 17 މެޗުން 37 ޕޮއިންޓް ލިބިފައިވާއިރު، ނަޕޯލީ އަށް 17 މެޗުން ލިބުނީ 36 ޕޮއިންޓެވެ.
