މިއުނިކް (ޑިސެމްބަރު 18) - ޖަރުމަނު ލީގުގައި ރޭ ރޮބަޓް ލެވަންޑޯސްކީ ބޮޑު ރެކޯޑެއް މުގުރާލި ގޯލާ އެކު 4-0 އިން ވުލްފްސްބާގް ބަލިކޮޮށް ބަޔާން މިއުނިކުން ލީގު ތާވަލް އެއް ވަނައިގައި ނުވަ ޕޮއިންޓަށް ލީޑުފުޅާކޮށްފި އެވެ.
ލެވަންޑޯސްކީ ރޭ މި ވަނީ ކަލަންޑަރު އަހަރެއްގައި ޖަރުމަނު ލީގުގައި އެންމެ ގިނަ ގޯލު ޖަހައިގެން 1972 ވަނަ އަހަރު މުލާ ހެދި ރެކޯޑް މުގުރާލައިފަ އެވެ. މުލާ އެ އަހަރު ޖެހީ 42 ގޯލެވެ. ރޭ ވުލްފްސްބާގް ކޮޅަށް ޖެހި ދެ ގޯލާ އެކު ލެވަންޑޯސްކީ މި އަހަރު މި ވަނީ 43 ގޯލު ލީގުގައި ޖަހައިފަ އެވެ. މިއީ އެއް އަހަރު ތެރޭ ލެވަންޑޯސްކީ މުލާގެ ބޮޑު ރެކޯޑެއް މުގުރާލި ދެ ވަނަ ފަހަރެވެ.
މިދިޔަ ސީޒަނުގެ ފަހު މެޗުގައި އޯގްސްބާގް އަތުން ބަޔާން މޮޅުވި މެޗުގައި ޖެހި ގޯލުން ލެވަންޑޯސްކީ ވަނީ މުލާގެ 49 އަހަރުވީ ރެކޯޑެއް މުގުރާލައިފަ އެވެ. ލީގު ސީޒަނެއްގައި 40 ގޯލު ޖަަހައިގެން ކުރީގެ އެއް ވަަނަ ފޯވާޑް ގާޑް މުލާ ރެކޯޑް ހެދީ 1972 ވަނަ އަހަރު އެވެ. ލެވަންޑޯސްކީ މިދިޔަ ސީޒަނުގެ ފަހު މެޗުގައި ޖެހީ އެ ފަަހަރު ލީގުގައި އޭނާގެ 41 ވަނަ ގޯލެވެ.
މި މޮޅާ އެކު ފިނި މޫސުމުގެ ބްރޭކަށްދާއިރު، ބަޔާން އެއް ވަނައިގައި އޮތީ 17 މެޗުން 43 ޕޮއިންޓާ އެކު އެވެ. ދެ ވަނައިގައި އޮތް ޑޯޓްމަންޑަށް 16 މެޗުން 34 ޕޮއިންޓް ލިބިފައިވާއިރު، ޑޯޓްމަންޑް މިރޭ ނުކުންނާނީ ރަށުންބޭރުގައި ހާތާ ބާލިންއާ ދެކޮޅަށެވެ. މި މެޗުން ޑޯޓްމަންޑް މޮޅުވެއްޖެނަމަ ބަޔާންގެ ލީޑު ހަ ޕޮއިންޓަށް ކުޑަވާނެ އެވެ.
އަމިއްލަ ދަނޑުގައި ކުޅުނު ބަޔާނަށް ރޭގެ މެޗުގެ ފުރަތަމަ ހާފުގައި ލީޑުނަގައިދިނީ ތޯމަސް މުލާ އެވެ. ބަޔާނުން އަނެއް ހަތަރު ގޯލު ޖެހީ ވެސް ދެ ވަނަ ހާފުގަ އެވެ.
ދެ ވަނަ ހާފުގެ ކުޅުން ފެށިގެން މާގިނައިރެއްނުވެ ބަޔާންގެ ލީޑުފުޅާކޮށްދިނީ ޑަޔޫޓް އުޕަމެކާނޯ އެވެ. އެއީ މެޗުގެ 57 ވަނަ މިނިޓްގަ އެވެ. އޭގެ ދެ މިނިޓް ފަހުން ލެރޯއި ސާނޭ ވަނީ ބަޔާންގެ ތިން ވަނަ ގޯލު ޖަހައިފަ އެވެ. ލެވަންޑޯސްކީ އެ ޓީމުގެ ފަހު ގޯލު ޖެހީ މެޗު ނިމެން ތިން މިނިޓަށް ވެފައި ހުއްޓަ އެވެ.
