ލިވަޕޫލް (ޑިސެމްބަަރު 17) - ކޮވިޑް-19 އާ ހެދި އިނގިރޭސި ޕްރިމިއާ ލީގުގެ މެޗުތައް ފަސްކުރުމަކީ އެކަން ކުރަން އޮތް އެންމެ ރަނގަޅު ގޮތްތޯ ލިވަޕޫލްގެ ކޯޗު ޔާގެން ކްލޮޕް ސުވާލު އުފައްދައިފި އެވެ.
އިނގިރޭސިވިލާތުގައި ކޮވިޑް-19ގެ އާ ވޭރިއަންޓް އޮމިކްރޮން ފެތުރޭތީ މިހާތަނަށް ކްލަބްތަކުން ފެނުނު ކޮވިޑް ކޭސްތަކުގެ ސަބަބުން ވަނީ އެކި ފަހަރު މަތިން ޖުމްލަ ނުވަ މެޗެއް ވަނީ ފަސްކޮށްފަ އެވެ. އޭގެ ތެރޭގައި އެއް ކްލަބެއްގެ މެޗުތައް ވަނީ ތަކުރާރުވެފަ އެވެ.
ލީގުގައި ރޭ ލިވަޕޫލާއި ޗެލްސީން މެޗު ކުޅުނީ އެ ޓީމުގެ ކުޅުންތެރިންތަކެއް ކޮވިޑަށް ޕޮޒިޓިވްވުމުން ދެން ތިބި ކުޅުންތެރިން އިތުރު ޓެސްޓްތަކެއް ކުރުމަށް ފަހު އިތުުރު ކުޅުންތެރިއަކު ޕޮޒިޓިވް ނުވާތީ އެވެ. ލިވަޕޫލުން ކޮވިޑަށް ޕޮޒިޓިވްވީ ވާޖިލް ވެން ޑައިކާއި ފަބީނިއޯ އަދި ކާޓިން ޖޯންސް އެވެ.
ކްލޮޕް ބުނީ ލިވަޕޫލްގެ ހުރިހާ ކުޅުންތެރިން ވަނީ ކޮވިޑް-19ގެ ވެކްސިން ދެ ޑޯޒް ފުރިހަމަކޮށްފައި ކަމަށާއި ބައެއް ކުޅުންތެރިން ބޫސްޓާ ޑޯޒް ވެސް ޖަހާފައިވާ ކަމަށެވެ.
"ލީގު މެޗުތައް ފަސްކޮށް، ލީގު ހުއްޓާލުމަކީ އެންމެ ރަނގަޅު ގޮތް ކަމަށް ނުދެކެން. މީގެ އެންމެ ރަނގަޅު ގޮތަކީ ވަގުތު ލިބޭ ފަދަ ރަނގަޅު ޝެޑިއުލެއް އޮތުން. ފުޓްބޯޅަ ކުޅުންތެރިން ކޮންމެ ފަހަރަކު ކޮވިޑަށް ޓެސްޓްކޮށް މި ކުރިމަތިލާ ކަމަކީ ކުޑަ ކަމެއް ނޫން. އެ ހުރިހާ ކަމެއް ކޮށްގެން މި ގޮތަށް މެޗުތައް ފަސްކޮށް، އަލުން ޝެޑިއުލް ކުރާއިރު ހަމައެއް ނެތުމަކީ ގޯހެއް،" ކްލޮޕް ބުންޏެވެ.
ކްލޮޕް ބުނީ ރޭގެ މެޗުގެ ކުރިން ޕޮޒިޓިވްވި ތިން ކުޅުންތެރިންނާ ހަމައިން އެ ކްލަބުން ޕޮޒިޓިވްވާ ކުޅުންތެރިންގެ ކަންކަން ނުނިމޭނެ ކަމަށާއި ކުރިއަށް އޮތް ދުވަސްތަކުގައި އިތުރު ކުޅުންތެރިންނާ ކޮވިޑް ޖެހުމުގެ ފުރުސަތު ބޮޑު ކަމަށެވެ.
މިދިޔަ އަންގާރަ ދުވަހު ލީގުގައި މެންޗެސްޓާ ޔުނައިޓެޑާއި ބްރެންޓްފޯޑް ކުޅެން އޮތް މެޗު ވަނީ ފަސްކޮށްފަ އެވެ. ބްރެންޓްފޯޑްގެ ކޯޗު ތޯމަސް ފްރޭންކް ބުނީ މީގެ ހައްލަކީ ހަފްތާއެއްހާ ދުވަހަށް ލީގާއި އިނގިރޭސި ލީގު ކަޕްގެ މެޗުތައް އެއްކޮށް ފަސްކުރުން ކަމަށެވެ.
ނިއުކާސަލްގެ ކޯޗު އެޑީ ހޯވް ބުނީ ވަކި މެޗުތަކެއް ކުޅެފައި، އެހެން މެޗުތަކެއް ނުކުޅުމަކީ ދެކޮޅު ޖެހޭނެ ގޮތެއް ނޫން ކަމަށެވެ. އަދި ހައްލަކީ ހުރިހާ މެޗެއް އެއްކޮށް ކުޅުން ނޫނީ އެ ގޮތަށް ކުޅެވޭނެ ހާލަތެއް އަންނަން ދެން މެޗުތައް ފަސްކުރުން ކަމަށް ހޯވް ދެކެ އެވެ.
ޗެލްސީން ރޭގެ މެޗުގެ ކުރިން ކޮވިޑަށް ޕޮޒިޓިވްވީ ރޮމެލޫ ލުކާކޫ އާއި ޓިމޯ ވާނާ އަދި ކަލުމް ހަޑްސަން އޮޑޯއި އެވެ.
ޗެލްސީގެ ކޯޗު ތޯމަސް ޓުޗެލް ބުނީ ސްޕޯޓްސް ޕޮލިޓިކްސްގެ ވާހަކަ އޭނާ ނުދައްކާނެ ކަމަށާއި އޭނާގެ ވަޒީފާ އަކީ ކޮވިޑް ވިޔަސް އަދި އެ ނޫން ކޮންމެ ހާލަތެއް ތެރޭގައި ވެސް ބޭނުންކުރެވޭނެ ކުޅުންތެރިން ލައިގެން މެޗުތަކަށް ޓީމު ތައްޔާރު ކުރުން ކަމަށެވެ.
