ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން ރާއްޖޭގެ ގައުމީ ފިިރިހެން ވޮލީބޯޅަ ޓީމުން މިރޭ ކުޅުނު އެކުވެރިކަމުގެ މެޗުގައި ފަހަތުން އަރައި އިންޑިއާގެ ހައިދަރުއާބާދު ސްޕައިކާސް އަތުން މޮޅުވެއްޖެ އެވެ.
ސެންޓްރަލް ޒޯނަށް ރާއްޖޭގެ ގައުމީ ސީނިއާ ވޮލީ ޓީމުގެ ސްކޮޑު ފައިނަލް ކުރި ފަހުން ކުޅުނު ފުރަތަމަ މެޗުން މިރޭ ރާއްޖެ މޮޅުވީ 3-1 ސެޓުންނެވެ. ފުރަތަމަ ސެޓު 25-19 އިން ހައިދަރުއާބާދު ޓީމު ގެންދިޔައިރު، ރާއްޖެ ވަނީ ދެން ކުޅުނު ތިން ސެޓު ގެންގޮސްފަ އެވެ. އެއީ 18-25، 18-25 އަދި 17-25 އިންނެވެ.
ހައިދަރުއާބާދު ޓީމުން ރާއްޖެއާ ދެކޮޅަށް ތިން މެޗު ކުޅެން ހަމަޖެހިފައިވާއިރު، މިރޭގެ މެޗު އެ ޓީމުން ކުޅުނީ މިއަދު ހަވީރު މާލެ އައިގޮތަށެވެ.
މިރޭގެ މެޗަށް ފަހު މީޑިއާ އަށް ދިން އިންޓަވިއުއެއްގައި ގައުމީ ވޮލީ ޓީމުގެ ކޯޗު މުހައްމަދު ސާޖިދު (ކާއްޓެ) ބުނީ ދަތުރެއް ކޮށްފައި އައިސް ކުޅުމުގެ ވަރުބަލިކަން ހައިދަރުއާބާދު ޓީމުގެ ފަރާތުން ފެނުނު ކަމަށެވެ. އަދި ކުރިއަށް އޮތް މެޗުތަކުގައި ހައިދަރުއާބާދު ޓީމުން މޮޅަށް ކުޅޭނެ ކަމަށް ބެލެވޭ ކަމަށެވެ.
ހައިދަރުއާބާދު ޓީމުގައި އިންޑިއާ ގައުމީ ސްކޮޑުގައި ހިމެނޭ ކުޅުންތެރިން ތިބިކަން ކާއްޓޭ ފާހަގަކުރި އެވެ.
ދާދި ފަހުން ގައުމީ ވޮލީ ޓީމުން ވަނީ ލަންކާއާ ދެކޮޅަށް މާލޭގައި އެކުވެރިކަމުގެ ތިން މެޗެއް ކުޅެފަ އެވެ. އެ ތިން މެޗުން ވެސް ބަލިވީ ސެޓެއް ވެސް ނުލިބި އެވެ. އެ ތިން މެޗުގައި ހެދުނު ގިނަ ގޯސްތަކެއް މިރޭގެ މެޗުގައި ގައުމީ ޓީމުން ވަނީ ރަނގަޅުކޮށްފަ އެވެ.
ރާއްޖެ ޓީމުގެ ނިލާމް (މ) މިރޭގެ މެޗުގެ ތެރެއިން ބޯޅަ ފޮނުވާލަނީ.-- ފޮޓޯ: އާއިމް ޒަމީރު/ އަދަދު
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗު ފަށައިގެން ފުރަތަަމަ ސެޓުގެ ކުރީކޮޅުގައި ހައިދަރުއާބާދުން ހަތަރު ޕޮއިންޓުގެ ލީޑެއް ނެގި އެވެ. އެކަމަކު، ރާއްޖޭގެ ކުޅުންތެރިން ހިތްވަރުކޮށް، 5-4 އިން ކުރިހޯދި އެވެ. ހައިދަރުއާބާދު ޓީމުން ވަރުގަދަ ހަމަލާތަކެއް ފޮނުވާލި ނަމަވެސް ދިވެހި ކުޅުންތެރިންގެ ޑިފެންސް ފެނުނީ އެހެން މެޗުތަކާ ބަލާއިރު، ޖުމްލަކޮށް ވަރުގަދަކޮށެވެ. އެކަމަކު، ވަކި ހިސާބަކުން ހައިދަރުއާބާދު ކުޅުންތެރިން ސެޓުގެ ކޮންޓްރޯލް ނަގައި ފުރަތަމަ ސެޓު ގެންދިޔަ އެވެ. ހައިދަރުއާބާދުން ސެޓު ގެންދިޔައީ 25-17 އިންނެވެ.
ފުރަތަމަ ސެޓު ގެއްލުމުން ދިވެހި ޓީމުން ދެން ނުކުތީ ކުރިއަށް ވުރެ ރަނގަޅު ރޫހެއްގަ އެވެ. ދެ ފަހަރެއްގެ މަތިން ހައިދަރުއާބާދު ޓީމުން އެއްވަރުކުރި ނަަމަވެސް ގައުމީ ޓީމުން ލީޑު ހިފެހެއްޓުމުގައި ރަނގަޅު ކުޅުމެއް ދެއްކި އެވެ. ސެޓުގެ މެދެއްހާ ހިސާބުން ރާއްޖޭން ވަނީ ސެޓަރަކަށް ކުޅެމުން އައި ހުސެއިން ވިޝާމް (ބުޅިކެ)ގެ ބަދަލުގައި ހުސެއިން ޝާހިދު (ޝާޑު) ކުޅެން އަރުވައިފަ އެވެ. ޓީމުގެ ކެޕްޓަން އިސްމާއިލް ސާޖިދު (ކުޑަކާއްޓެ) އާއި އަލީ ހުޒާމް (ހުޒަންޓެ)ގެ ރަނގަޅު ހަމަލާތަކާ އެކު ރާއްޖޭން ދެ ވަނަ ސެޓު 18-25 އިން ގެންގޮސް މޮޅުވުމުގެ އުއްމީދު އާކުރި އެެވެ.
ތިން ވަނަ ސެޓުގެ ބޮޑުބައިގައި ގައުމީ ޓީމުން ކޮންފިޑެންސް ރަނގަޅު ކުުޅުމެއް ދައްކައި ބޮޑު ލީޑެއްނެގި އެވެ. މި ސެޓުގައި ދެ ފަހަރެއްގެ މަތިން ހައިދަރުއާބާދު ކުޅުންތެރިން ރެފްރީގެ ނިންމުމާ މެދު ހިތްހަމަ ނުޖެހުން ފާޅުކުރި އެވެ. ރާއްޖޭން މި ސެޓުގައި ހަސަން ނިލާމް (ޕާޓޭ)ގެ ބަދަލުގައި އާދަމް ނަސީމް (އެޑަމް) ކުޅެން އެރުވި އެވެ.
އެޑަމްގެ ރަނގަޅު ހަމަލާތަކެއް ފެނިގެންދިޔައިރު، ރާއްޖޭން މި ސެޓުގައި ފަސް ޕޮއިންޓަށް ވެސް ލީޑުފުޅާކުރި އެވެ. ރަނގަޅު ލީޑެއްގައި އޮތުމުން ރާއްޖޭން ވަނީ މި ސެޓުގައި ޒުވާން ކުޅުންތެރިޔާ، 19 އަހަރުގެ އަހުމަދު ނާފިއު ކުޅެން އަރުވައިފަ އެވެ. ރާއްޖޭން އިތުބާރާ އެކު ކުޅެ، މި ސެޓު ގެންދިޔައީ 18-25 އިންނެވެ.
މެޗުގެ ތެރެއިން ދިވެހި ކުޅުންތެރިން އުފާފާޅުކުރަނީ.-- ފޮޓޯ: އާއިމް ޒަމީރު/ އަދަދު
ޖެހިޖެހިގެން ދެ ސެޓު ރާއްޖެ އަށް ލިބުމުން ހަތަރު ވަނަ ސެޓަށް ނުކުމެ، ހައިދަރުއާބާދުން ކުޅުން ރަނގަޅު ކުރި އެެވެ. ނަމަވެސް ރާއްޖޭގެ ޓީމުން ވަނީ މި ސެޓުގައި ހައިދަރުއާބާދު ޓީމަށް ރަނގަޅު ފައިޓެއް ދީފަ އެވެ.
ދެ ޓީމުން ވެސް ލީޑުނެގި ފަހު ސެޓުގައި، ހައިދަރުއާބާދު ޓީމު ހަމަޔަކަށް އަޅުވަން އެ ޓީމުން ވަނީ ޓައިމްއައުޓްތަކެއް ވެސް ނަގައިފަ އެވެ. ރާއްޖޭގެ އާދަމް ފައިރޫޒްގެ ރަނގަޅު ބްލޮކްތަކެއް ފެނުނު މި ސެޓުގެ މެދެއްހާ ހިސާބުން ރާއްޖޭން ވަނީ ސެޓަރު ބަދަލުކޮށްފަ އެވެ. ސެޓަރަކަށް ހުރި ޝާޑުގެ ބަދަލުގައި މެޗު ފެށިއިރު، ހުރި ބުޅިކެ އަލުން އެރުވި އެވެ. ކުޅެން އެރި ގޮތަށް ބުޅިކެ ވަނީ މޮޅު ޕޮއިންޓެއް ހޯދައިފަ އެވެ. އަދި ރަނގަޅު ފޯމެއްގައި ކުޅެ، ރާއްޖެ މޮޅުކޮށްދޭން މެޗުގެ ފަހު ޕޮއިންޓް ހޯދީ ވެސް ބުޅިކެ އެވެ.
ހައިދަރުއާބާދު ޓީމާއި ގައުމީ ވޮލީ ޓީމު ކުޅޭ ދެ ވަނަ މެޗު އޮންނާނީ މާދަމާރޭ 9 ޖަހާއިރު އެވެ. މިއީ މި މަހު 23-29 އަށް ބަންގްލަދޭޝްގައި ބާއްވާ ސެންޓްރަލް ޒޯން މުބާރާތަށް ތައްޔާރުވާން ރާއްޖޭން ކުޅޭ މެޗުތަކެކެވެ. ވޮލީބޯލް އެސޯސިއޭޝަނުން، މި މެޗުތައް ހަމަޖެއްސީ ޓްރެއިނިން ކޭމްޕެއް ދިއުމަށް ކުރި މަސައްކަތުގައި އަލިމަގެއް ނުފެނުމުން، ޓީމަށް ވާދަވެރި މެޗުތަކެއް ހޯދައިދިނުމުގެ ބޭނުމުގަ އެވެ.
