މި މަހު 12 ވަނަ ދުވަހު ސްޕެއިނުގައި ފެށި ބެޑްމިންޓަން ވޯލްޑް ފެޑެރޭޝަންގެ މުބާރާތުގައި ވާދަކުރަން ގައުމީ ބެޑްމިންޓަން ޓީމުގެ ދެބެން ކަމަށްވާ ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ) އަށް ނުދެވުނީ ވިސާ ހަމަޖައްސަން ވަގުތު ނުލިބުމުން ކަމަށް ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން ބުނެފި އެވެ.
މިރޭ ބެޑްމިންޓަން އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ބައެއް މީޑިއާތަކުގައި ސައްހަ ނޫން މައުލޫމާތު ފެތުރޭތީ ނަބާ އާއި ނަބީ އަށް ދުނިޔޭގެ މުބާރާތަށް ދާން ފުރުސަތު ނުލިބުނު ސަބަބު އޮޅުން ފިލުވައިދޭން ބޭނުންވާ ކަމަށެވެ.
ނަބާ އާއި ނަބާ އަށް ބެޑްމިންޓަން ވޯލްޑް ޗެމްޕިއަންޝިޕުން ފުރުސަތު ލިބުނު ގޮތާ ބެހޭގޮތުން ބީއޭއެމްގެ ބަޔާނުގައި ބުނެފައިވަނީ، މިއީ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)ގެ މޭޖާ އިވެންޓްސް ޑިޕާޓްމަންޓުން 28 ނޮވެމްބަރުގައި ބީއޭއެމްގެ ރައީސް މޫސާ ނާޝިދަށް ފޯނުން ގުޅައި، އެންމެ ފުރަތަމަ ދިން ފުރުސަތެއް ކަމަށެވެ. އަދި މި ފުރުސަތު ރާއްޖެ އަށް ފަހިވުމަށް މެދުވެރިވީ ވޯލްޑް ޗެމްޕިއަންޝިޕްގައި ބައިވެރިވާން އޮތް އިންޑޮނީޝިއާގެ ގިނަ ކުޅުންތެރިންތަކެއް ކޮވިޑް-19 ގެ އޮމިކްރޯން ވޭރިއަންޓް ޖެހިގެން މުބާރާތުން ވަކިވުމާ ގުޅިގެން ކަމަށެވެ.
"ވަކިވި ކުޅުންތެރިންގެ ބަދަލުގައި ހާއްސަ އިންވިޓޭޝަނެއް ދިނުމަށް ޝޯޓްލިސްޓު ކުރެވުނު ވޯލްޑް ރޭންކިންގެ ކްރައިޓީރިއާ މީޓް ކުރާ އެކި ގައުމުތަކުގެ އަންހެން ޕެއާ ތަކުގެ ތެރޭގައި ރާއްޖޭން ޕެއާއެއް ހިމެނިފައިވާތީ، ހާއްސަ އިންވިޓޭޝަނެއް ރާއްޖެ އަށް ދީފިނަމަ ދިވެހި ކުޅުންތެރިންނަށް މުބާރާތަށް ދަތުރުކުރެވިދާނެތޯ ބެޑްމިންޓަން އެސޯސިއޭޝަންގެ ރައީސްއާ ސުވާލު ކުރެވުނެވެ،" ބީއޭއެމްގެ ބަޔާނުގައިވެ އެވެ.
ބީއޭއެމްގެ ރައީސް މޫސަ އަށް ބީޑަބްލިއުއެފްގެ އެ ފޯނު ކޯލު އައިއިރު، ނަބާ އާއި ނަބީ ހުރީ މި މަހު ބަންގްލަދޭޝްގައި ކުރިއަށްދިޔަ ޗެލެންޖް މުބާރާތަށް ފުރަން ބޯޑު ކޮށްފައި ކަމަށް ބީއޭއެމުން ބުންޏެވެ. އަދި ނަބާ އާއި ނަބީ މުބާރާތުގައި ވާދަކުރަން ބޭނުންކަން އެނގުނު ހިސާބުން ބީޑަބްލިއުއެފް އަށް އެކަން އެންގި އެވެ.
"ޝޯޓްލިސްޓު ކުރެވުނު ގައުމުތަކުގެ ތެރެއިން ދިވެހިރާއްޖެ އަށް ފުރުސަތު ލިބުނު އެންމެ ބޮޑު ސަބަބަކީ، މުބާރާތުގައި އެހެން ގައުމެއްގެ ދިދަ ވިހުރުވާލަން ފުރުސަތު ދިނުމެވެ. މިއީ ބޮޑެތި މުބާރާތްތަކުގައި އިންޓަނޭޝަނަލް ފެޑެރޭޝަންތަކުން އާންމުކޮށް ކުރަމުން އަންނަ ކަމެކެވެ." ބީއޭއެމްގެ ބަޔާނުގައި ބީޑަބްލިއުއެފްގެ ނިންމުމާ ބެހޭގޮތުން ބުނެފައިވެ އެވެ.
ސަރުކާރާއި އެސޯސިއޭޝަނުން ވިސާ ހޯދަން ވަރަށް މަސައްކަތްކުރި: ބީއޭއެމް
މުބާރާތުގައި ވާދަކުރަން ނިންމި ހިސާބުން ނަބާ އާއި ނަބީ، ސްޕެއިނަށް ދިއުމުގެ ޓިކެޓް ނަގާފައިވާ ކަމަށް ބީއޭއެމް އިން މައުލޫމާތު ދެ އެވެ. އަދި ވަގުތުން ވިސާ ހަމަޖެއްސުމުގެ މަސައްކަތް ބެޑްމިންޓަން ދުނިޔޭގެ ފެޑެރޭޝަން، ބީޑަބްލިއުއެފްއާ އެކު ފެށި ކަމަށް ބެޑްމިންޓަން އެސޯސިއޭޝަނުން ބުންޏެވެ.
"މުބާރާތަށް ދިއުމުގެ ފުރުސަތު ލިބުނު ދުވަހުން ފެށިގެން ސްޕެއިނަށް ދަތުރުކުރުމާ މެދު ލިބިފައިވަނީ 10 ދުވަސްކަން ވެސް މި ފުރުސަތުގައި ފާހަގަކުރަމެވެ. އެހެން ނަމަވެސް ކުޅުންތެރިން ބަންގްލަދޭޝް މުބާރާތުން އެނބުރި އައި ދުވަހުން ފެށިގެން ސްޕެއިން އަށް ދަތުރުކުރުމާ ދެމެދު ލިބިފައިވަނީ ތިން ދުވަހެވެ،" ލިބުނު މުއްދަތުތައް ކުޑަކަން ފާހަގަކޮށް، ބެޑްމިންޓަން އެސޯސިއޭޝަންގެ ބަޔާނުގައި ފާހަގަކޮށްފައިވެ އެވެ.
ސްޕެއިނަށް ދާން ބޭނުންވާ ޝެންގެން ވިސާއެއް ހޯދުމަށް ޕާސްޕޯޓާ އެކު، ފުރިހަމަކޮށްފައިވާ ޑޮކިއުމެންޓާ އެކު ހުށަހެޅުމުން ވެސް 14 ދުވަހާއި 21 ދުވަހުގެ މުއްދަތެއް ނަގާ ކަމަށް ބީއޭއެމުން ބުންޏެވެ.
ބެޑްމިންޓަން އެސޯސިއޭޝަނުން ބުނީ ދަތުރު ހަރަދުތައް ކުޅިވަރާ ބެހޭ ވަޒީރު އަހުމަދު މަހުލޫފް ހަމަޖައްސައިދެއްވި ކަމަށާއި ފޮރިން މިނިސްޓަރު އަބްދުﷲ ޝާހިދުގެ ބެއްލެވުމުގެ ދަށުން ނަބާ އާއި ނަބީ އަށް ޑިސެމްބަރު އަށް ވަނަ ދުވަހު އިންޑިއާގެ ނިއު ދިއްލީގައި ހުންނަ ސްޕެއިން އެމްބަސީ އަށް ގޮސް ވިސާ ހަމަޖެއްސުމުގެ ފުރުސަތު ފަހިކޮށްދެއްވި ކަމަށް ބީއޭއެމުން ބުނެފައިވެ އެވެ.
"ނަމަވެސް ކުޅުންތެރިން ބަންގްލަދޭޝް އިން ރާއްޖެ އަށް (5 ޑިސެމްބަރު) ދަތުރުކުރި ދުވަހާއި ސްޕެއިނަށް ދަތުރުކުރަން އޮތް ދުވަހާއި (9 ޑިސެމްބަރު) ފްލައިޓް ރޫޓް އޮތްގޮތުން އިތުރު ދަތުރެއް ދެ ކުޅުންތެރިން އިންޑިއާގެ ނިއު ދިއްލީ އަށް 8 ޑިސެމްބަރުގެ ފަހުން ކުރުމަށް ފަހު އަނބުރާ ރާއްޖެ އައިސް، ސްޕެއިނުގައި އޮތް މުބާރާތަށް ހާޒިރުވާން ޖެހޭ ވަގުތަށް ދަތުރުކުރެވޭނެ މަގެއް ނެތުމުން، 8 ޑިސެމްބަރު ދުވަހުގެ ރޭގަނޑު ވަރަށް ލަސްވަގުތެއްގައި މި މުބާރާތަށް ދަތުރުނުކުރުމަށް ބެޑްމިންޓަން އެސޯސިއޭޝަނުން ނިންމާ ކަމާބެހޭ ފަރާތްތަކަށް ވަނީ މި މައުލޫމާތު ހިއްސާކޮށްފަ އެވެ،" ނަބާ އާއި ނަބީ، ސްޕެއިން މުބާރާތަށް ނުދެވޭނެކަން ނިންމަން ޖެހުނު ސަބަބު އެސޯސިއޭޝަނުން އޮޅުންފިލުވައިދިނެވެ.
ދާދި ފަހުން ރާއްޖޭގެ ޓޭބަލް ޓެނިސް ކުޅުންތެރިޔާ ފާތިމަތު ދީމާ އަލީ ވަނީ ޕޯޗުގަލްގައި ބޭއްވި ޓީޓީ ޔޫތު މުބާރާތުގައި ވާދަކޮށްފަ އެވެ. އެ މުބާރާތަށް ދާން ދީމާގެ ވިސާ ކަންތައްތައް ހަމަޖެހުނީ ސްރީ ލަންކާގައި ގިނަ ދުވަސްތަކެއް ވަންދެން ހުރެ ވިސާ ކަންތައްތައް ނިންމައިގެންނެެވެ. އެކަން ކުރެވުނީ ދީމާގެ ފަރާތުން މެނޭޖަރެއްގެ ޒިންމާ ނެގި ޓީޓީ އެސޯސިއޭޝަންގެ ނައިބު ރައީސް އިބްރާހިމް ޝިއުރީ ކުރި ބުރަ މަސައްކަތުންނެވެ. އޭގެ ކުރިން ސެޕްޓެމްބަރު މަހު ޕޯޗުގަލްގައި އޮތް ކޮންޓެންޑާ މުބާރާތެއްގައި ކުޅެން ވިސާ ހޯދަން ކުރި މަަސައްކަތް ކާމިޔާބެއް ނުވި އެވެ.
ރާއްޖޭގެ ގައުމީ ފުޓްބޯޅަ ޓީމުގެ ކުޅުންތެރިން 2019 ވަނަ އަހަރު ގުއާމާ ދެކޮޅަށް ކުޅެން އޮތް ވޯލްޑް ކަޕް ކޮލިފައިން މެޗަށް އެ ގައުމަށް ދާން ވިސާ ޖަހަން ލަންކާގައި މަހެއްހާ ދުވަހު މަޑުކުރަން ޖެހުނެވެ. އެކަމަކު، ބައެއް ކުޅުންތެރިންނަށް ވިސާ ނުލިބިގެން އެ ފަހަރު ޓީމާ އެކު ގުއާމަށް ނުދެވުނެވެ.
