ރާއްޖޭގައި ބޭއްވޭ އެންމެ ފޯރިގަަދަ ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕްގެ ސެމީ ފައިނަލް މެޗުތައް މިރޭ ކުޅޭއިރު، ފުރަތަމަ ސެމީގައި ބައްދަލުކުރާނީ ޕްރިޒަން ކްލަބާއި ފިއުލްސަޕްލައި މޯލްޑިވްސް (އެފްއެސްއެމް) އެވެ. ދެ ވަނަ ސެމީގައި ކުޅޭނީ ރޯޑް ޑިވެލޮޕްމަންޓް ކޯޕަރޭޝަންގެ، ރޯޑް ރެކްރިއޭޝަން ކްލަބް (އާރްއާރްސީ) އާއި ޓީމު ފެނަކަ ބައްދަލުކުރާނެ އެވެ.
މުބާރާތުގެ މިހާތަނަށް އެންމެ ހައިރާންކުރަނިވި ނަތީޖާތައް ނެރެފައިވާ ޓީމަކީ އެފްއެސްއެމް އެވެ. އެ ޓީމުން ވަނީ ގްރޫޕް ސްޓޭޖުގައި ކްލަބް އިމިގްރޭޝަން ބަލިކުރުމުގެ އިތުރުން ގަދަ 16 ބުރުގައި ކްލަބް ވެމްކޯ އާއި ކުއާޓާ ފައިނަލުގައި ކްލަބް އެޗްޑީސީ ކަޓުވާލައިފަ އެވެ. ވެމްކޯ އާއި އެޗްޑީސީން އައީ ކުޅުނު ކޮންމެ މެޗަކުން މޮޅުވަމުންނެވެ. އެކަމަކު، އެފްއެސްއެމްއާ ހަމައިން ޖެހުނީ މުބާރާތުން ވަކިވާށެެވެ.
އެފްއެސްއެމް އިން ފުރަތަމަ ފަހަރަށް ސެމީ ފައިނަލުގައި ކުޅޭއިރު، އިދިކޮޅުގައި އޮތް ޕްރިޒަން އަކީ ވެސް އަލަށް ސެމީން ފުރުސަތު ހޯދި ޓީމެކެވެ. ގްރޫޕް ސްޓޭޖުގައި ފެނަކަ އަތުން ބަލިވި ނަމަވެސް އޭގެ ފަހުން ޕްރިޒަން ފަސް އެނބުރި ބަލާފައެއް ނުވެ އެވެ. ދެ ވަނަ ބުރުގައި ޕޮލިސް ކްލަބް ބަލިކުރިިއިރު، ކުއާޓާގައި އެމްއޭސީއެލް ކަޓުވާލީ ފަހު ވަގުތު ގޯލުތައް ޖަހައި އެއްވަރުކޮށް، ޕެނަލްޓީ ޖަހައިގެންނެވެ.
އެފްއެސްއެމްގެ ކޯޗު އިސްމާއިލް އިބްރާހިމް "އަދަދު" އަށް ބުނީ މުހައްމަދު ޝާހީންގެ އިރުޝާދުގެ ދަށުން ކުޅޭ ޕްރިޒަން ޓީމަކީ ވެސް ވަރަށް "ހިތްވަރުގަދަ" ޓީމެއް ކަމަށް ބުނެފަ އެވެ. އަދި ފޯރިގަދަ ސެމީ ފައިނަލް މެޗެއް ފެންނާނެ ކަމުގެ އުއްމީދު އެބައޮތް ކަމަށެވެ.
މެޗަކަށް ފަހު މެޗެއް ވަރުގަދަ ކުޅުމެއް ދައްކަމުން އަންނަ އާރްއާރްސީ އާއި ފެނަކަ ކުޅޭ ސެމީ ފައިނަލް މެޗަކީ ގާތްގަނޑަކަށް ފައިނަލެއް ފަދަ ވަރުގަދަ މެޗެކެވެ. ދެ ޓީމުގެ ބެންޗަށް ބެލިޔަސް ގިނައިން ތިބީ ކްލަބް މޯލްޑިވްސް ކަޕްގެ ކޮންމެ ޓީމެއްގެ ފަށާ ފަސް ކުޅުންތެރިންގެ ތެރޭގައި ކުޅެވިދާނެ ފަދަ ހުނަރުވެރި ކުޅުންތެރިންނެވެ.
އަހުމަދު ނިސާމް (ފޮޓޯ)ގެ ކޯޗުކަމުގައި ކުޅެމުން އަންނަ ފެނަކަ ވަނީ މިހާތަނަށް މި މުބާރާތުގައި ކުޅުނު ފަސް މެޗުން ވެސް މޮޅުވެފަ އެވެ. ގްރޫޕް ސްޓޭޖަށް ފަހު ދެ ވަނަ ބުރުގައި ފެނަކަ އިން ވަނީ 3-0 އިން ސްޓެލްކޯ ބަލިކޮށްފަ އެވެ. ކުއާޓާ ފައިނަލުގައި އެސްޓީއޯ އަތުން މޮޅުވީ ޕެނަލްޓީ ޖަހައިގެންނެވެ.
ތަޖުރިބާކާރު ފުޓްސަލް ކޯޗު، އަބްދުﷲ ނަސީރު (އަބޯ)ގެ ކޯޗުކަމުގައި ކުޅޭ އާރްއާރްސީ ގްރޫޕް ސްޓޭޖުގައި އެޗްޑީސީ އަތުން ބަލިވި ނަމަވެސް ނޮކައުޓް ބުރުން ފުރުސަތު ހޯދީ އެންމެ ފަހުގެ ޗެމްޕިއަން ޔުނައިޓެޑް ބީއެމްއެލް ކަޓުވާލައިފަ އެވެ.
ދެ ވަނަ ބުރުގައި ދިރާގު އަތުން އާރްއާރްސީ މޮޅުވީ 8-3 އިންނެވެ. އޭގެ ފަހުން ކުއާޓާ ފައިނަލުގައި އެމްޕީއެލްއާ ދެކޮޅަށް ކުޅެގެން އާރްއާރްސީ މޮޅުވީ ފޯރިގަދަ މެޗަކަށް ފަހު 3-2 އިންނެވެ.
ސާޖީ އަށް އަނިޔާވެއްޖެ، އަޔާ ސަސްޕެންޑް!
ފެނަކަ ޓީމުގެ އަޔާ (ކ) އާއި ޕްރިޒަންގެ ސާޖީ: އަޔާ މިރޭގެ ސެމީ އަށް ސަސްޕެންޑްވެފައިވާއިރު، އަނިޔާގެ ސަބަބުން ސާޖީ އަށް ނުކުޅެވޭނެ.-
ސެމީ ފައިނަލްގެ މެޗުތަކަށް ނުކުންނައިރު، އެންމެ ބޮޑު ބޮލުގެ ރިހުމެއް އޮންނާނެ ދެ ޓީމަކީ ޕްރިޒަން އާއި ފެނަކަ އެވެ. ޕްރިޒަންގެ މުހިއްމު ކުޅުންތެރިޔާ ސާޖިދު ރަޝީދު (ސާޖީ)، އިއްޔެ އެކްސިޑެންޓްވެ، ލިބުނު އަނިޔާތަކުން ރަނގަޅުވާން އޮޕަރޭޝަނެއް ކުރަން ޖެހޭނެކަން ވަނީ ޔަގީންވެފަ އެވެ. ސާޖީ ނެތުމަކީ ޕްރިޒަން ޓީމަށް ލިބޭނެ ދެރައެކެވެ.
މި ފަހަރުގެ މުބާރާތުގައި އެންމެ ގިނަ ގޯލު ޖެހި ފެނަކަ ޓީމުގެ އަޔާޒް އަހުމަދު (އަޔާ) ވަނީ ސެމީ ފައިނަލް މެޗަށް ސަސްޕެންޑްވެފަ އެވެ. އެއީ ދެ ވަނަ ބުރުގައި ސްޓެލްކޯއާ ދެކޮޅަށް ކުޅުނު މެޗުގައި ދެއްކި ރީނދޫ ކާޑާއި ކުއާޓާ ފައިނަލް މެޗުގައި އެސްޓީއޯއާ ދެކޮޅަށް ފެނަަކަ އިން ކުޅުނު މެޗުގައި އަޔާ އަށް ދެއްކި ރީނދޫ ކާޑުގެ ސަބަބުންނެވެ. ފެނަކަ ޓީމުން އަޔާގެ ކާޑު އެޕީލްނުކުރާތީ އޭނާ ހުރީ މިރޭގެ މެޗަށް ސަސްޕެންޝަނުގަ އެވެ.
ހުޅުމާލެ ރެހެންދި ފުޓްސަލް ދަނޑުގައި މިރޭ ކުޅޭ ސެމީ ފައިނަލްގެ ފުރަތަމަ މެޗު ފަށާނީ 20:15 އެވެ. އެ ވަގުތު ފަށާނީ ޕްރިޒަން އާއި އެފްއެސްއެމް ބައްދަލުކުރާ މެޗެވެ. ދެ ވަނަ ސެމީ ފައިނަލް ފަށާނީ މިރޭ 22:15 ގަ އެވެ. އެ މެޗުގައި ބައްދަލުކުރާނީ އާރްއާރްސީ އާއި ފެނަކަ އެވެ.
