މެންޗެސްޓާ (ޑިސެމްބަރު 15) - އިނގިރޭސި ޕްރިމިއާ ލީގުގައި މިރޭ ލީޑްސް ޔުނައިޓެޑް އަތުން 7-0 އިން މޮޅުވެ، އެންމެ ފަހުގެ ޗެމްޕިއަން މެންޗެސްޓާ ސިޓީން އެއް ވަނައިގައި ހަތަރު ޕޮއިންޓަށް ލީޑުފުޅާކޮށްފި އެވެ.
ސިޓީ އެއް ވަނައިގައި އޮތީ 17 މެޗުން 41 ޕޮއިންޓާ އެކު އެވެ. ދެ ވަނައިގައި އޮތް ލިވަޕޫލަށް ވަނީ 16 މެޗުން 37 ޕޮއިންޓް ލިބިފަ އެވެ. ލިވަޕޫލުން ބުރާސްފަތި ދުވަހުގެރޭ އަމިއްލަ ދަނޑުގައި ނިއުކާސަލް ޔުނައިޓެޑް ބަލިކޮށްފިނަަމަ ސިޓީގެ ލީޑު އަލުން އެއް ޕޮއިންޓަށް ކުޑަވާނެ އެވެ.
ސިޓީގެ އިއްތިހާދު ސްޓޭޑިއަމްގައި މިރޭ ކުޅުނު މެޗު ފަށައިގެން އަށް ވަނަ މިނިޓްގައި ޒުވާން ތަރި ފިލް ފޯޑެން ސިޓީ އަށް ލީޑުނަގައިދިނެވެ. މިއީ ޕެޕް ގާޑިއޯލާ 2016 ވަނަ އަހަރު ސިޓީ ކޯޗުކަމާ ހަވާލުވި ފަހުން އެ ޓީމުން ލީގުގައި ޖެހި 500 ވަނަ ގޯލެވެ. އޭގެ ފަސް މިނިޓް ފަހުން ރިޔާދު މާރޭޒް ނަގައިދިން ހުރަހަކުން ޖެކް ގްރީލިޝް ބޮލުން ގޯލު ޖަހައި ސިޓީގެ ލީޑުފުޅާކޮށްދިނެވެ. މިއީ ސިޓީ އަށް އެންމެ ފަހުން ކުޅުނު 14 މެޗުގެ ތެރެއިން ގްރީލިޝް ޖެހި ފުރަތަމަ ގޯލެވެ.
މެޗުގެ 32 ވަނަ މިނިޓްގައި ސިޓީގެ ތިން ވަނަ ލަނޑު ރޮޑްރީ ދިން ބޯޅައަކުން ޖެހީ ކެވިން ޑިބްރޭނާ އެވެ. މިއީ ގިނަ ދުވަސްތަކަކަށް ފަހު ޑިބްރޭނާ ފުރަތަމަ އެގާރައިގައި ކުޅުނު ފުރަތަމަ މެޗެވެ. ދެ ވަަނަ ހާފް ފެށިގެން ހަަތަރު މިނިޓް ތެރޭ ރިޔާދު މާރޭޒް ސިޓީގެ ހަތަރު ވަނަ ގޯލު ޖެހި އެވެ. މިއީ ސިޓީ އަށް މާރޭޒް ލީގުގައި ކުޅެދިން 100 ވަނަ މެޗެވެ. މާރޭޒަކީ ތަފާތު ދެ ޓީމަށް ލީގުގައި ކުޅުނު 100 ވަނަ މެޗުގައި ލަނޑު ޖެހި ހަމައެކަނި ކުޅުންްތެރިޔާ އެވެ. މާރޭޒް ވަނީ ލެސްޓާ އަށް ލީގުގައި އޭނާ ކުޅެދިން 100 ވަނަ މެޗުގައި ވެސް ގޯލު ޖަހައިފަ އެވެ.
ސިޓީގެ ފަސް ވަނަ ގޯލު ޖެހީ މެޗުގެ މޮޅު ކުޅުންތެރިއަކަށް ހޮވުނު ޑިބްރޭނާ އެވެ. އޭގެ ފަހުން ޖޯން ސްޓޯންސާއި ނޭތަން އަކޭ ވަނީ ސިޓީ އަށް އިތުރު ދެ ގޯލު ޖަހައިދީފަ އެވެ. ދެ ވަނަ ހާފުގައި ބެނާޑޯ ސިލްވާގެ ބަދަލުގައި ކުޅެން އެރި އިލްކާއި ގުންޑޮގާން ވަނީ ދެ ގޯލު ޖަހަން ފުރުސަތު ތަނަވަސްކޮށްދީފަ އެވެ.
މިއީ ލީޑްސްގެ ކޯޗު މާސެލޯ ބިއެލްސާ، ކޯޗިން ކެރިއަރުގައި އިރުޝާދުދިން 568 މެޗުގައި އޭނާ އެންމެ ތަފާތު ބޮޑުކޮށް ބަލިވި މެޗެވެ. އަދި ލީޑްސް ވެސް އެ ކްލަބްގެ ތާރީހުގައި އެންމެ ތަފާތު ބޮޑުކޮށް ބަލިވި އެއް މެޗެވެ.
މީގެ ކުރިން ލީޑްސް އެންމެ ތަފާތު ބޮޑުކޮށް ބަލިވެފައިވަނީ 1934 ގައި ސްޓޯކް ސިޓީ އަތުން 8-1 އިންނާއި 1966 ގައި ވެސްޓް ހޭމް އަތުން 7-0 އިން އަދި 1979 ގައި އާސެނަލް އަތުން 7-0 އިންނެވެ.
މިރޭގެ ނަތީޖާއާ އެކު ލީޑްސް އޮތީ 17 މެޗުން 16 ޕޮއިންޓާ އެކު 16 ވަނައިގަ އެވެ.
ލީގުގައި މިރޭ ކުޅުނު އަނެއް މެޗުން ލީގު ތާވަލުގެ ފުލުގައި އޮތް ނޯވިޗް ސިޓީ އަތުން އެސްޓަން ވިލާ ވަނީ 2-0 އިން މޮޅުވެފަ އެވެ. ވިލާގެ ކޯޗުކަމާ ސްޓީވެން ޖެރާޑް ހަވާލުވީ މި ވަގުތު ނޯވިޗްގެ ކޯޗަކަށް ހުރި ޑީން ސްމިތު މަގާމުން ވަކިކުުރުމުންނެވެ. މިރޭގެ މޮޅާ އެކު ވިލާ ވަނީ ލީގުގެ ނުވަ ވަަަނަ އަށް އަރައިފަ އެވެ. އެއީ 17 މެޗުން 22 ޕޮއިންޓާ އެކު އެވެ.
މެންޗެސްޓާ ޔުނައިޓެޑްގައި ކޮވިޑް-19ގެ ކޭސްތަކެއް ފެނިގެން މިރޭ އެ ޓީމުން ބްރެންޓްފޯޑާ ދެކޮޅަށް ކުޅެން އޮތް މެޗު ވަނީ ފަސްކޮށްފަ އެވެ.
