ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން ރާއްޖޭގެ ގައުމީ ވޮލީބޯޅަ ޓީމުން މާލޭގައި އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ތިން މެޗު ކުޅެން ނިންމާފައިވާ ކަމަށް ވީއޭއެމް އިން ބުނެފި އެވެ.
މި މެޗުތައް ކުޅެން ހަަމަޖެހިފައިވަނީ ޒުވާނުންގެ މަރުކަޒު އެތެރެކޯޓުގައި މި މަހު 16, 17، އަދި 18 ވަނަ ދުވަހުގެރޭގަ އެވެ.
ބަންގްލަދޭޝްގައި މި މަހު 23-29 އަށް ކުރިއަށްދާ ސެންޓްރަލް ޒޯން މުބާރާތަށް ތައްޔާރުވާން ގައުމީ ވޮލީބޯޅަ ޓީމުން ދާދި ފަހުން ވަނީ މާލޭގައި ސްރީލަންކާއާ ދެކޮޅަށް ތިން މެޗު ކުޅެ، ތިން މެޗުން ވެސް ސީދާ ތިން ސެޓުން ބަލިވެފަ އެވެ. މިއީ ފާއިތުވި ދެ އަހަރެއްހާ ދުވަސްތެރޭ ގައުމީ ޓީމުން ކުޅުނު ފުރަތަމަ މެޗުތަކެވެ.
ވީއޭއެމްގެ ރައީސް މުހައްމަދު ރަނޭޝް (ރަނޭ)، މިއަދު "އަދަދު" އަށް ވިދާޅުވީ އިންޑިއާގެ ކްލަބާ ދެކޮޅަށް ކުޅޭ ތިން މެޗަކީ ސެންޓްރަލް ޒޯން މުބާރާތަށް ތައްޔާރުވުމުގެ އިތުރުން އެހެން ކަންކަން ވެސް ފުރިހަމަ ކުރެވޭނެ މެޗުތަކެއް ކަމަށެވެ. އެ ގޮތުން ވީއޭއެމް އިން ޒުވާން ވޮލީބޯޅަ ކުޅުންތެރިންތަކެއް އުފައްދަން ކުރިއަށްގެންދާ އެކްސެލަންސް ޕްރޮގްރާމްގައި ތިބި ކުޅުންތެރިންނަށް ވޮލީގެ މުސްތަގުބަލު އޮތްކަން ދައްކައިދިނުމަށް ވެސް މި މެޗުގެ ބޭނުންހިފޭނެ ކަމަށް ރަނޭ ދެކިލައްވަ އެވެ.
ސެންޓްރަލް ޒޯން މުބާރާތަށް ތައްޔާރުވާން ގައުމީ ޓީމު ރާއްޖޭން ބޭރުގައި ކޭމްޕެއް ޖެހޭތޯ މަސައްކަތްކުރި އެވެ. އެ ގޮތުން ބަހްރޭނާއި ގަތަރުގައި ޓްރެއިނިން ކުރިއަށް ގެންދަން ކުރި މަސައްކަތް ކާމިޔާބު ނުވި ނަމަވެސް އިންޑިއާ އަށް ކޭމްޕެއް ދިއުމުގެ ފުރުސަތު ފަހިވި އެވެ.
އެކަމަކު، ކޮވިޑް-19ގެ ހާލަތުގައި ދަތުރުތަކެއް ކުރުމުގެ ބަދަލުގައި ވީއޭއެމް އިން ނިންމީ އިންޑިއާ ޓީމެއް ގެނެސް ވަރުގަދަ މެޗުތަކެއް ގައުމީ ޓީމަށް ހޯދައިދިނުމަށެެވެ. އެ ގޮތުން ހައިދަރުއާބާދު ސްޕައިކާސް ޓީމު ގެންނަން ނިންމީ އެެވެ.
ސެންޓްރަލް ޒޯންގެ މި ފަހަރުގެ މުބާރާތުގައި ރާއްޖެ އާއި ބަންގްލަދޭޝް ކުޅޭ މުބާރާތުގެ ފުރަތަމަ މެޗު އޮންނާނީ މި މަހު 23 ވަނަ ދުވަހެވެ. ދެ ވަނަ މެޗުގައި އެއް ދުވަސް ފަހުން، މި މަހު 25 ވަނަ ދުވަހު ރާއްޖެ ކުޅެން ޖެހޭނީ އުޒްބެކިސްތާނާ ދެކޮޅަށެވެ. އޭގެ އަނެއް ދުވަހު (26 ޑިސެމްބަރުގައި) ނޭޕާލާ ދެކޮޅަށް ކުޅުމަށް ފަހު، ލީގު ބުރުގެ ފަހު މެޗުގައި ކުޅޭނީ ލަންކާއާ ދެކޮޅަށެވެ. އެ މެޗު އޮންނާނީ މި މަހު 27 ވަނަ ދުވަހު އެވެ.
އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށްދާ ގޮތަށް ފޯމެޓް އޮތްއިރު، ތިން ވަނަ އާއި ހަތަރު ވަނަ ރޭންކިން މެޗެއް ކުޅޭނެ އެވެ.
ސެންޓްރަލް ޒޯނުން އެންމެ ފަހުން ބޭއްވި މުބާރާތް އޮތީ 2019 ވަނަ އަހަރު އޮގަސްޓް މަހުގެ ތެރޭގަ އެވެ. ނޭޕާލުގެ ކަތުމަންޑޫގައި އެ ފަހަރު ބޭއްވި މުބާރާތުން ރާއްޖެ އަށް ލިބުނީ ހަތަރު ވަނަ އެެވެ.
